Electric Vehicles | పెట్రో ధ‌ర‌ల ఎఫెక్ట్‌.. ఈ- వెహికిల్స్‌కే హైద‌రాబాదీల ఇంట్రెస్ట్‌

Electric Vehicles | ఇంధన ధరలు భగ్గుమంటున్న నేపథ్యంలో హైదరాబాద్‌లో వాహనదారులు, ముఖ్యంగా యువత ఈవీ కొనుగోళ్లకే మొగ్గు చూపుతున్నారు.

Electric Vehicles | హైదరాబాద్‌లో విద్యుత్తు ఆధారిత వాహనాల (ఎలక్ట్రిక్‌ వెహికిల్స్‌ లేదా ఈవీ)కు డిమాండ్‌ పెరుగుతున్నది. ఇంధన ధరలు భగ్గుమంటున్న నేపథ్యంలో వాహనదారులు, ముఖ్యంగా యువత ఈవీ కొనుగోళ్లకే మొగ్గు చూపుతున్నారు. లీటర్‌ పెట్రోల్‌ రూ.100కుపైగానే పలుకుతుండగా, డీజిల్‌ రూ.100కు సమీపంలో ఉన్నది. దీంతో ఎలక్ట్రిక్‌ వెహికిల్సే ఉత్తమం అన్న భావన పెరిగిపోతున్నది. నయా మోడళ్లూ ఆకట్టుకునేలా వస్తున్నాయి.

ఈ-రిక్షాలకూ ఆదరణ

కేవలం ఎలక్ట్రిక్‌ కార్లు, మోటర్‌ బైక్‌లకే హైదరాబాద్‌ మార్కెట్‌లో ఆదరణ పరిమితం కావడం లేదు. ఈ-రిక్షాలకూ డిమాండ్‌ ఉన్నది. ఈవీలకు సంబంధించి ప్రకటనలు, ప్రమోషన్లూ నగరంలో ఇప్పుడు బాగానే పెరిగాయి. దీంతో భారత్‌లో తమ ఈవీలను పరిచయం చేయాలనుకుంటున్న పలు అంతర్జాతీయ సంస్థలూ.. హైదరాబాద్‌ను వేదికగా చేసుకునే యోచనలో ఉన్నాయి.

రాష్ట్ర ప్రభుత్వ ప్రోత్సాహకాలు

రోజురోజుకూ మితిమీరిపోతున్న వాహన కాలుష్యాన్ని నియంత్రించే దిశగా రాష్ట్ర ప్రభుత్వం అడుగులు వేస్తున్న విషయం తెలిసిందే. ఇందులో భాగంగానే పర్యావరణ హితమైన ఎలక్ట్రిక్‌ వాహనాల వినియోగాన్ని అనేక రకాలుగా ప్రోత్సహిస్తున్నది. ఇది కూడా హైదరాబాద్‌లో ఈవీలకు డిమాండ్‌ను తెచ్చిపెట్టిందని నిపుణులు పేర్కొంటున్నారు. ఎలక్ట్రిక్‌ వెహికిల్స్‌ అండ్‌ ఎనర్జీ స్టోరేజ్‌ పాలసీ కింద ఉచిత రిజిస్ట్రేషన్‌, రహదారి పన్ను మినహాయింపు సైతం కల్పిస్తున్నారు.