72 వేల దిగువకు పసిడి

బంగారం కొనుగోలు చేయాలనుకుంటున్నారా అయితే ఇదే సరైన సమయం. పసిడి, వెండిలపై కస్టమ్‌ డ్యూటీని తగ్గిస్తూ కేంద్ర సర్కార్‌ తీసుకున్న నిర్ణయంతో వరుసగా రెండోరోజు బుధవారం ధరలు భారీగా తగ్గాయి. అతి విలువైన లోహాలకు డిమాండ్‌ పడిపోవడంతోపాటు దిగుమతి సుంకాన్ని తగ్గించడంతో పుత్తడి ధర రూ.72 వేల దిగువకు పడిపోయింది.

• ఇంకో రూ.650 తగ్గిన తులం ధర

న్యూఢిల్లీ, జూలై 24: బంగారం కొనుగోలు చేయాలనుకుంటున్నారా అయితే ఇదే సరైన సమయం. పసిడి, వెండిలపై కస్టమ్‌ డ్యూటీని తగ్గిస్తూ కేంద్ర సర్కార్‌ తీసుకున్న నిర్ణయంతో వరుసగా రెండోరోజు బుధవారం ధరలు భారీగా తగ్గాయి. అతి విలువైన లోహాలకు డిమాండ్‌ పడిపోవడంతోపాటు దిగుమతి సుంకాన్ని తగ్గించడంతో పుత్తడి ధర రూ.72 వేల దిగువకు పడిపోయింది. ఢిల్లీ బులియన్‌ మార్కెట్లో తులం బంగారం ధర మరో రూ.650 దిగొచ్చి రూ.71,650కి తగ్గాయని ఆల్‌ ఇండియా సరాఫ అసోసియేషన్‌ వెల్లడించింది. అంతకుముందు ఈ ధర రూ.72,300గా ఉన్నది. గడిచిన రెండు రోజుల్లోనే ధరలు రూ.4 వేల స్థాయిలో తగ్గినట్టు అయింది. కానీ, వెండి ధరలు యథాతథంగా రూ.87,500 వద్ద ఉన్నాయి. కానీ, హైదరాబాద్‌లో మాత్రం ధరల్లో ఎలాంటి మార్పులు చోటుచేసుకోలేదు. 24 క్యారెట్ల పుత్తడి ధర రూ.70,860 వద్ద ఉండగా, 22 క్యారెట్‌ ధర రూ.64,950 వద్ద స్థిరంగా ఉన్నాయి. కానీ, వెండి మాత్రం రూ.500 తగ్గి రూ.92 వేలకు జారుకున్నది. కానీ, అంతర్జాతీయ మార్కెట్లో ధరలు పుంజుకుంటున్నాయి. ఔన్స్‌ గోల్డ్‌ ధర ఆరు డాలర్లు పెరిగి 2,461.20 డాలర్లకు చేరుకోగా, వెండి 29.38 డాలర్ల వద్ద ఉన్నది.