Rupee- Gold Rates | రూపాయి బలహీనంతో బంగారం.. వెండి ధగధగలు..!

Rupee- Gold Rates | ఫారెక్స్‌ మార్కెట్లో అమెరికా డాలర్‌పై రూపాయి మారకం విలువ పతనం కావడంతో దేశీయ బులియన్ మార్కెట్లో బంగారం, వెండి ధరలు ధగధగ మెరిశాయి.

Rupee- Gold Rates | ఫారెక్స్‌ మార్కెట్లో అమెరికా డాలర్‌పై రూపాయి మారకం విలువ పతనం కావడంతో దేశీయ బులియన్ మార్కెట్లో బంగారం, వెండి ధరలు ధగధగ మెరిశాయి. మంగళవారం దేశ రాజధాని ఢిల్లీలో 99.9 శాతం స్వచ్ఛత గల తులం బంగారం రూ.700 వృద్ధి చెంది రూ.79,700లకు చేరుకున్నది. సోమవారం తులం బంగారం (99.9 శాతం స్వచ్ఛత) ధర రూ.79 వేల వద్ద ముగిసింది. మరోవైపు కిలో వెండి ధర రూ.1300 పుంజుకుని మూడు వారాల గరిష్ట స్థాయి రూ.92,000 వద్ద స్థిర పడింది. సోమవారం కిలో వెండి ధర రూ.90,700 వద్ద నిలిచింది.

ఇక 99.5శాతం స్వచ్ఛత గల బంగారం ధర మంగళవారం  రూ.700 వృద్ధితో రూ.79,300 వద్ద ముగిసింది. సోమవారం రూ.78,600 వద్ద నిలిచింది. మల్టీ కమోడిటీ ఎక్స్చేంజ్‌ (ఎంసీఎక్స్‌)లో ఫిబ్రవరి డెలివరీ బంగారం తులం ధర రూ.122 పెరిగి రూ.77,280లకు చేరుకున్నది. మార్చి డెలివరీ కిలో వెండి ధర రూ.551 పుంజుకుని రూ.91,105 వద్ద ముగిసింది. అంతర్జాతీయ మార్కెట్లో కామెక్స్‌ గోల్డ్‌ ఫ్యూచర్స్‌లో ఔన్స్‌ బంగారం ధర 0.28 శాతం వృద్ధితో 2654.90 డాలర్లు పలికింది. కామెక్స్‌ సిల్వర్‌ ఫ్యూచర్స్‌లో ఔన్స్‌ వెండి ధర 0.73 శాతం పెరిగి 30.81 డాలర్లకు చేరింది.