Flight Tickets | విమాన చార్జీలకు రెక్కలు.. పండుగ ప్రయాణాలతో ప్రయాణికుల జేబులకు చిల్లులు

Flight Tickets | విమాన చార్జీలకు మళ్లీ రెక్కలొచ్చాయి. ప్రస్తుతం దేశవ్యాప్తంగా పండుగ వాతావరణం నెలకొంటుండటంతో విమానాల్లో ప్రయాణించేవారికి జేబులు మరింత చిల్లులు పడబోతున్నాయి.

Flight Tickets |  నూఢిల్లీ, సెప్టెంబర్‌ 8: విమాన చార్జీలకు మళ్లీ రెక్కలొచ్చాయి. ప్రస్తుతం దేశవ్యాప్తంగా పండుగ వాతావరణం నెలకొంటుండటంతో విమానాల్లో ప్రయాణించేవారికి జేబులు మరింత చిల్లులు పడబోతున్నాయి. విమానాల్లో సీట్ల లభ్యత తగ్గుముఖం పట్టడం, ముందస్తు బుకింగ్‌లు అధికంగా ఉండటంతో ఈసారి విమాన చార్జీలు రాకెట్‌ వేగంతో దూసుకుపోనున్నాయి. ప్రయాణ రద్దీ తీవ్రతరం కావడంతో దేశీయ చార్జీలు విపరీతంగా పెరిగాయి.

ఇది వినియోగదారుల బడ్జెట్‌పై తీవ్రస్థాయిలో ప్రభావం చూపనున్నది. కీలక విమానయాన రూట్లలో విమాన టికెట్‌ ధరలు 50 శాతం నుంచి 150 శాతం వరకు అధికమయ్యాయి. ప్రధానంగా న్యూఢిల్లీ-ముంబై రూట్లలో డిమాండ్‌ అధికంగా ఉంటుందని, కానీ, ఢిల్లీ-పాట్నా రూట్‌లో మాత్రం ఈసారి రెండింతలు అయింది. ప్రధాన రోజుల్లో రూ.3,500 నుంచి రూ.4,500 మధ్యలో విమాన టికెట్‌ ధరలు ఉండగా..ఈసారి పండుగ సీజన్‌లో ఇది రూ.12,500 పలికిందని, చివరి నిమిషంలో బుకింగ్‌ చేసుకున్నవారు రూ.13,500 చెల్లించాల్సి వచ్చింది.

ఏటీఎఫ్‌ కూడా కారణం

పశ్చిమాసియాలో నెలకొన్న ఉద్రిక్త పరిస్థితుల కారణంగా విమాన ఇంధన ధరలు ఆకాశమే హద్దుగా దూసుకుపోయాయి. దీంతో గడిచిన రెండు నెలల్లో ఇంధన ధరలు పది శాతానికి పైగా ఎగబాకాయి. సెప్టెంబర్‌ 1న రూ.115గావున్న లీటర్‌ ధర ప్రస్తుతం 5.46 శాతం అధికమై రూ.121.28కి చేరుకున్నది. విమానయాన సంస్థ నిర్వహణలో ఏటీఎఫ్‌ వాటా సుమారు 35-40 శాతంగా ఉంటుంది.

ఏయే రూట్లలో ఎంత..

• కోల్‌కతా నుంచి దేవ్‌ఘర్‌ మధ్య విమాన టికెట్‌ ధర రూ.2,800 నుంచి రూ.12,500కి పెరిగింది.
• ఢిల్లీ నుంచి లక్షదీప్‌ మధ్య టికెట్‌ విలువ రూ.8,500 నుంచి రూ.25 వేల వరకు..
• బెంగళూరు నుంచి ఝార్సుగూడ మధ్య నాన్‌-స్టాప్‌ ఫ్లైట్‌ టికెట్‌ చార్జీ రూ.4,200 నుంచి రూ.16,200 వరకు అధికమైంది.
• ముంబై నుంచి బరేలీ మధ్య సాధారణంగా రూ.4,500 ఉండగా, ఈ పండుగ సీజన్‌లో రూ.15 వేల వరకు పెరిగింది.
• ఢిల్లీ-కోల్‌కతా రూట్‌లో ఒకవైపు టికెట్‌ ధర రూ.4,800 నుంచి రూ.12,300 వరకు పెరిగింది.
• ఢిల్లీ-బెంగళూరు రూట్‌లో రూ.10 వేల వరకు, ఢిల్లీ-ముంబై రూట్‌లో రూ.7 వేల వరకు అధికమైంది.