Mutual Funds | డైరెక్ట్‌ vs రెగ్యులర్‌ మ్యూచువల్‌ ఫండ్స్‌.. దేన్ని ఎంచుకోవాలి? ఎందుకు?

పెట్టుబడులు పెట్టేందుకు నేడు ఎన్నో అవకాశాలు అందుబాటులో ఉన్నాయి. అయినప్పటికీ మదుపరుల్లో ఒకింత అయోమయం ఉంటూనే ఉంటుంది. ముఖ్యంగా స్టాక్‌ మార్కెట్‌ సంబంధిత ఇన్వెస్ట్‌మెంట్లపై ఇది ఇంకా ఎక్కువే.

పెట్టుబడులు (Mutual Funds) పెట్టేందుకు నేడు ఎన్నో అవకాశాలు అందుబాటులో ఉన్నాయి. అయినప్పటికీ మదుపరుల్లో ఒకింత అయోమయం ఉంటూనే ఉంటుంది. ముఖ్యంగా స్టాక్‌ మార్కెట్‌ (Stock Market) సంబంధిత ఇన్వెస్ట్‌మెంట్లపై ఇది ఇంకా ఎక్కువే. ఈ క్రమంలోనే డైరెక్ట్‌ మ్యూచువల్‌ ఫండ్స్‌, రెగ్యులర్‌ మ్యూచువల్‌ ఫండ్స్‌ల్లో ఏది ఉత్తమం? దేన్ని ఎంచుకోవాలి? ఎందుకు? అన్నదానిపై నిపుణులు ఏం చెప్తున్నారో తెలుసుకుందాం.

యువ మదుపరులు పెట్టుబడులకున్న రకరకాల మార్గాలపై సహజంగానే దృష్టి సారిస్తారు. కొందరు స్టాక్స్‌లో పెట్టుబడులకు మొగ్గు చూపితే.. మరికొందరు మ్యూచువల్‌ ఫండ్స్‌ను ఎంచుకుంటారు. అయితే మ్యూచువల్‌ ఫండ్స్‌లో రెండు విస్తృత శ్రేణి మార్గాలున్నాయి. అవే డైరెక్ట్‌ మ్యూచువల్‌ ఫండ్స్‌, రెగ్యులర్‌ మ్యూచువల్‌ ఫండ్స్‌.

డైరెక్ట్‌ మ్యూచువల్‌ ఫండ్స్‌
హెచ్‌డీఎఫ్‌సీ మ్యూచువల్‌ ఫండ్‌, పేటీఎం మనీ, గ్రో, కాయిన్‌ వంటి డిజిటల్‌ వేదికల ద్వారా నేరుగా మదుపరులు కొనేందుకు వీలున్న మార్గమే డైరెక్ట్‌ మ్యూచువల్‌ ఫండ్స్‌.

రెగ్యులర్‌ మ్యూచువల్‌ ఫండ్స్‌
పెట్టుబడులకు ఆసక్తి ఉన్న మదుపరులు సాధారణంగా మ్యూచువల్‌ ఫండ్‌ డిస్ట్రిబ్యూటర్ల ద్వారా కొంటూ ఉంటారు. వీటినే రెగ్యులర్‌ మ్యూచువల్‌ ఫండ్స్‌గా పిలుస్తారు.

ఇదీ సంగతి..

• డైరెక్ట్‌ మ్యూచువల్‌ ఫండ్‌ను ఎంచుకున్నా, రెగ్యులర్‌ మ్యూచువల్‌ ఫండ్‌ను అనుసరించినా మీరు పెట్టుబడులు పెట్టేది ఒకే మ్యూచువల్‌ ఫండ్‌ స్కీంలో అన్నది గుర్తుంచుకోవాలి. కాబట్టి మీ పెట్టుబడికి మీరు ఎంచుకున్న మార్గాన్నిబట్టే అది డైరెక్టా? రెగ్యులర్‌ మ్యూచువల్‌ ఫండ్సా అనేది తేలుతుంది.
• డైరెక్ట్‌ మ్యూచువల్‌ ఫండ్‌లో మదుపరులపై వ్యయభారం తక్కువగా ఉంటుంది. బ్రోకర్లకు కమీషన్లు ఇవ్వనక్కర్లేదు. కానీ రెగ్యులర్‌ మ్యూచువల్‌ ఫండ్స్‌ల్లో అధిక ఖర్చులను ఎదుర్కోవాల్సి ఉంటుంది. క్లయింట్లకు ఏది సరైన ఫండ్‌ అన్నది సిఫార్సు చేసినందుకు డిస్ట్రిబ్యూటర్లు కమీషన్‌ చార్జ్‌ చేస్తారు. అందుకే రెగ్యులర్‌ మ్యూచువల్‌ ఫండ్స్‌ల్లో మదుపరులకు లాభాల వాటా తక్కువగా కనిపిస్తుంది.
• కొత్త మదుపరులకు రెగ్యులర్‌ మ్యూచువల్‌ ఫండ్సే సరైనవి. ఎప్పట్నుంచో ఇన్వెస్ట్‌ చేస్తున్నవారికి మార్కెట్‌ కదలికలపై ఒకింత అవగాహన, పట్టు ఉంటాయి. దాంతో వారికి వారి అనుభవం కలిసొస్తుంది. కానీ న్యూ ఎంట్రీస్‌కు గైడెన్స్‌ అవసరం. కాబట్టి రెగ్యులర్‌ మ్యూచువల్‌ ఫండ్స్‌ను ఎంచుకొంటే డిస్ట్రిబ్యూటర్ల సహాయం లభిస్తుంది. వారే అన్ని చూసుకుంటారు.
• ఒకటికి మించి పెట్టుబడి సాధనాల్లో మదుపు చేయాలనుకునే ఇన్వెస్టర్లు రెగ్యులర్‌ మ్యూచువల్‌ ఫండ్స్‌నే ఎంచుకోవడం తెలివైన పని. దీనివల్ల వారికి సమయం ఆదా అవుతుంది. ఇతర పనులపై దృష్టి పెట్టవచ్చు. అలాగే సొంతంగా తమ ఇన్వెస్ట్‌మెంట్లపై ఆలోచించుకోవడానికి సమయాన్ని తగినంత కేటాయించుకోగలిగినవారు డైరెక్ట్‌ మ్యూచువల్‌ ఫండ్స్‌ను ఫాలో కావచ్చు.
• గ్రో, జెరోధా వంటి ఆన్‌లైన్‌ బ్రోకింగ్‌ వేదికల్లో ఖాతాలున్న మదుపరులు.. ప్రతీ అసెట్‌ మేనేజ్‌మెంట్‌ కంపెనీ వెబ్‌సైట్లకు ప్రత్యేకంగా వెళ్లకుండానే డైరెక్ట్‌ మ్యూచువల్‌ ఫండ్స్‌ను కొనవచ్చు.