Budget 2023-24 | బడ్జెట్‌లో ప్రకటించిన కొత్త ట్యాక్స్‌ పాలసీ అసలు కథ ఇదీ..

Budget 2023-24 | మ‌ధ్య త‌ర‌గ‌తి ప్ర‌జ‌ల‌ను ల‌క్ష్యంగా చేసుకుని కేంద్ర ఆర్థిక మంత్రి నిర్మ‌లా సీతారామ‌న్ ఇన్‌కం టాక్స్ శ్లాబ్‌లు స‌వ‌రించారు. కానీ, కొత్త పాల‌సీతో పోలిస్తే పాత విధానంలోనే వేత‌న జీవుల‌కు రిలీఫ్ ల‌భిస్తోంది.

Budget 2023-24 | కేంద్ర మంత్రి నిర్మ‌లా సీతారామ‌న్ 2023-24 ఆర్థిక సంవ‌త్స‌ర బ‌డ్జెట్‌ను బుధ‌వారం లోక్‌స‌భ‌కు స‌మ‌ర్పించారు. ప్ర‌తి ఏటా కేంద్ర ఆర్థిక మంత్రి బ‌డ్జెట్ ప్ర‌తిపాదించిన‌ప్పుడ‌ల్లా వేత‌న జీవులు త‌మ‌కు ఇన్‌కం టాక్స్‌లో రాయితీలు ఇస్తారా? అన్న విష‌యాన్నే ప‌రిశీలిస్తున్నారు. పాత‌ ఇన్‌కం టాక్స్ పాల‌సీలో కేంద్ర మంత్రి నిర్మ‌లా సీతారామ‌న్ తాజాగా  కొన్ని స‌వ‌ర‌ణ‌లు చేసి, మ‌ధ్య త‌ర‌గ‌తి ప్ర‌జ‌ల‌కు రిలీఫ్ క‌ల్పించిన‌ట్లు చెప్పారు. రూ.7 ల‌క్ష‌ల వ‌ర‌కు ఆదాయం గ‌ల వ‌ర‌కు నూత‌న ప‌న్ను విధానంలో ప‌న్ను చెల్లించాల్సిన అవ‌స‌రం లేదు. అయితే, ఏడు శ్లాబ్‌ల ఆదాయం ప‌న్ను విధానాన్ని ఐదు శ్లాబ్‌ల‌కు కుదించారు. కానీ, కేంద్ర మంత్రి స‌వ‌రించిన శ్లాబ్‌ల మాయాజాలంలో అస‌లు వాస్త‌వాలివి..

రూ. 3 ల‌క్ష‌ల వ‌ర‌కు ఆదాయం ప‌న్ను పూర్తిగా మాఫీ చేశారు కేంద్ర మంత్రి నిర్మ‌లా సీతారామ‌న్. అంత‌కు మించి ఆదాయం ఉంటే శ్లాబ్‌ల వారీ ఆదాయం చెల్లించాల్సి ఉంటుంది. ఉదాహ‌ర‌ణ‌కు మీకు రూ.10 ల‌క్ష‌ల ఆదాయం వ‌స్తుంద‌నుకుందాం.. అందులో రూ.3 ల‌క్ష‌ల ఆదాయానికి ప‌న్ను మిన‌హాయిస్తే మిగ‌తా రూ.7 ల‌క్ష‌ల‌పై కొత్త‌గా ప్ర‌తిపాదించిన‌ ప‌న్ను చెల్లించాల్సి ఉంటుంది. అంటే రూ.70 వేలు ప‌న్ను చెల్లించాల్సిందే.

ఇప్ప‌టి వ‌ర‌కు అమ‌ల‌వుతున్న‌ నూత‌న ఐటీ పాల‌సీ (2020) ప్ర‌కారం వేత‌న జీవుల‌పై ఆదాయం ప‌న్ను ఇలా:

• రూ.2.5-5 ల‌క్ష‌ల ఆదాయం వ‌ర‌కు ఐదు శాతం.
• రూ.5-7.5 ల‌క్ష‌ల వ‌ర‌కు 10 శాతం
• రూ.7.5 నుంచి రూ.10 ల‌క్ష‌ల వ‌ర‌కు 15 శాతం
• రూ.10-12.5 ల‌క్ష‌ల వ‌ర‌కు 20 శాతం
• రూ.12.5- రూ.15 ల‌క్ష‌ల వ‌ర‌కు 25 శాతం
• రూ.15 ల‌క్ష‌ల పై చిలుకు 30 శాతం

నూత‌న ఇన్‌కం టాక్స్ శ్లాబ్‌లు ఇలా (2023)

• రూ.3 ల‌క్ష‌ల ఆదాయం వ‌ర‌కు నో ప‌న్ను
• రూ.3-6 ల‌క్ష‌ల మ‌ధ్య ఆదాయంపై 5 శాతం
• రూ.6-9 ల‌క్ష‌ల మ‌ధ్య ఆదాయంపై 10 శాతం
• రూ.9-12 ల‌క్ష‌ల మ‌ధ్య ఆదాయంపై 15 శాతం
• రూ. 12-15 ల‌క్ష‌ల మ‌ధ్య ఆదాయంపై 20 శాతం
• రూ.15 ల‌క్ష‌ల‌పై చిలుకు ఆదాయంపై 30 శాతం.

పాత ఆదాయం ప‌న్ను చ‌ట్టం ప్ర‌కారం టాక్స్ శ్లాబ్‌లు

• రూ. 2.5 ల‌క్ష‌ల ఆదాయం వ‌ర‌కు పూర్తిగా ప‌న్ను మిన‌హాయింపు.
• రూ.2.5- రూ.5 ల‌క్ష‌ల మ‌ధ్య ఆదాయంపై ఐదు శాతం
• రూ.5 – రూ.7.5 ల‌క్ష‌ల మ‌ధ్య ఆదాయంపై 15 శాతం
• రూ.7.5 -రూ. 10 ల‌క్ష‌ల మ‌ధ్య ఆదాయంపై 20 శాతం
• రూ.10 ల‌క్ష‌ల పైచిలుకు ఆదాయంపై 30 శాతం

తాజాగా చేసిన స‌వ‌ర‌ణ ప్ర‌కారం పాత ప‌న్ను విధానంలో స్టాండ‌ర్డ్ డిడ‌క్ష‌న్ రూ.50 వేల నుంచి రూ.52,500ల‌కు పెంపు.

2014 ప‌న్ను పాల‌సీ.. 2020 ప‌న్ను పాల‌సీలో తేడాలివి

• 2014 నుంచి ఆదాయం ప‌న్ను శ్లాబ్‌ల్లో మార్పులు లేవు.
• చివ‌రిసారిగా 2014లో ప‌న్ను మిన‌హాయింపు ప‌రిమితి పెంపు.
• 2020లో నూత‌న ప‌న్ను విధానాన్ని ప్ర‌వేశ పెట్టిన‌ ఆర్థిక మంత్రి నిర్మ‌లా సీతారామ‌న్‌.
• నూత‌న ప‌న్ను చెల్లింపు విధానం ఆప్ష‌న‌ల్‌.
• ప‌న్ను చెల్లింపు దారు ఇష్టాన్ని బ‌ట్టి 2014 నాటి పాత ప‌న్ను విధానాన్ని గానీ, 2020 ప‌న్ను విధానాన్ని గానీ ఎంచుకోవ‌చ్చు.
• 2020 నూత‌న ప‌న్ను విధానం ఎంచుకుంటే అద‌న‌పు ప‌న్ను మిన‌హాయింపులు ఉండ‌వు.
• తాజాగా 2020 పాల‌సీ ఎంచుకున్న వారికి కొత్త‌గా శ్లాబ్‌లు స‌వ‌రించిన ఆర్థిక మంత్రి నిర్మ‌లా సీతారామ‌న్‌.

పాత ఆదాయం ప‌న్ను విధానంలో మిన‌హాయింపులు ఇవి

• 2014లో చివ‌రి సారి స‌వ‌రించిన పాత ఆదాయం ప‌న్ను శ్లాబ్‌ల విధానంలో స్టాండ‌ర్డ్ డిడ‌క్ష‌న్ రూ.50 వేలు.
• అద్దె ఇండ్ల‌లో ఉన్న వేత‌న జీవుల‌కు ఆదాయం ప‌న్ను 80జీజీ సెక్ష‌న్ కింద నెల‌కు రూ.5000 చొప్పున రూ.60 వేల వ‌ర‌కు మిన‌హాయింపు.
• బీమా రంగం, జాతీయ పొదుపు పథకాల్లో పెట్టుబడులపై ఆదాయం పన్ను చట్టంలోని 80సీ సెక్షన్ కింద 2014-15లో రూ.లక్ష నుంచి రూ.1.5 లక్షలకు పెంపు.
• ప్రతి ఒక్కరికి రూ.25 వేల నుంచి రూ.50 వేల వరకు హెల్త్ ఇన్సూరెన్స్ ప్రీమియం మీద పన్ను రాయితీ.
• నేషనల్ పెన్షన్ స్కీమ్‌లో పెట్టుబడులపై 80సీసీడీ (1బీ) సెక్షన్ కింద రూ.50 వేల వరకు స్పెషల్ డిడక్షన్ క్లయిమ్.
• ఇంటి రుణం తీసుకున్న వారికి ఆదాయం ప‌న్ను చ‌ట్టంలోని సెక్ష‌న్‌-24 ప్ర‌కారం రూ.2 ల‌క్ష‌ల మిన‌హాయింపు..
• ఇంకా పిల్ల‌ల ఉన్న‌త విద్యా కోర్సుల రుణాల‌, తల్లిదండ్రుల‌కు వైద్య చికిత్స‌, హెల్త్ బీమా త‌దిత‌ర వ‌స‌తుల‌పైనా అందుబాటులో ప‌లు ప‌లు రాయితీలు.. డిడ‌క్ష‌న్‌లు.