Swiss Bank | స్విస్‌ బ్యాంకుల్లో తగ్గిన భారతీయుల డిపాజిట్లు

స్విస్‌ బ్యాంకుల్లో భారతీయులు, దేశీయ సంస్థల డిపాజిట్లు మరింత తగ్గాయి. వరుసగా రెండో ఏడాది 2023లోనూ స్విస్‌ బ్యాంకుల్లో డిపాజిట్లు 70 శాతం తగ్గి నాలుగేండ్ల కనిష్ఠ స్థాయి రూ.9,771 కోట్ల(1.04 బిలియన్ల స్విస్‌ ఫ్రాంక్స్‌)కు పరిమితమయ్యాయని స్విట్జర్లాండ్‌ సెంట్రల్‌ బ్యాంక్‌ విడుదల చేసిన వార్షిక నివేదికలో వెల్లడించింది.

• 2023లో 70 శాతం దిగి రూ.9,771 కోట్లకు..

Swiss Bank | న్యూఢిల్లీ, జూన్‌ 20: స్విస్‌ బ్యాంకుల్లో భారతీయులు, దేశీయ సంస్థల డిపాజిట్లు మరింత తగ్గాయి. వరుసగా రెండో ఏడాది 2023లోనూ స్విస్‌ బ్యాంకుల్లో డిపాజిట్లు 70 శాతం తగ్గి నాలుగేండ్ల కనిష్ఠ స్థాయి రూ.9,771 కోట్ల(1.04 బిలియన్ల స్విస్‌ ఫ్రాంక్స్‌)కు పరిమితమయ్యాయని స్విట్జర్లాండ్‌ సెంట్రల్‌ బ్యాంక్‌ విడుదల చేసిన వార్షిక నివేదికలో వెల్లడించింది. 2021లో 14 ఏండ్ల గరిష్ఠ స్థాయి 3.83 బిలియన్ల స్విస్‌ ఫ్రాంక్స్‌కి చేరుకున్న డిపాజిట్లు ఆ తర్వాత వరుసగా రెండేండ్ల పాటు తగ్గుముఖం పట్టడం విశేషం. బాండ్లు, సెక్యూరిటీ, ఇతర ఆర్థిక మార్గాల ద్వారా వచ్చిన పెట్టుబడుల ఆధారంగా సెంట్రల్‌ బ్యాంక్‌ ఈ నివేదికను రూపొందించింది. అయినప్పటికీ స్విట్జర్లాండ్‌లో భారతీయులు కలిగివున్న నల్లధనం ఎంత అనేది ఇప్పటికీ తెలియరాలేదు. ఇండియన్స్‌, ఎన్‌ఆర్‌ఐలు లేదా ఇతరులు స్విస్‌ బ్యాంకుల్లో ఇతర దేశాలకు చెందిన సంస్థల పేర్లతో పెట్టిన డిపాజిట్లను ఈ గణాంకాల్లో చేర్చలేదు. 2006లో రికార్డు స్థాయిలో 6.5 బిలియన్ల స్విస్‌ ఫ్రాంక్స్‌ డిపాజిట్లు ఉండగా, ఆ తర్వాతి తగ్గుముఖం పట్టాయని తన నివేదికలో వెల్లడించింది.

• 2020లో 39 శాతం పెరిగిన దేశీయ డిపాజిట్లు, 2021లో 8 శాతం అధికమవగా, 2022లో మాత్రం 18 శాతం తగ్గాయి.
• డిపాజిట్లలో బ్రిటన్‌ తొలిస్థానంలో నిలిచింది. 254 బిలియన్ల స్విస్‌ ఫ్రాంక్స్‌ డిపాజిట్లు కలిగివున్నది. ఆ తర్వాతి స్థానంలో అమెరికా(71 బిలియన్ల స్విస్‌ ఫ్రాంక్స్‌), ఫ్రాన్స్‌(64 బిలియన్ల స్విస్‌ ఫ్రాంక్స్‌) ఉన్నాయి.
• ఆ తర్వాతి స్థానాల్లో వెస్టిండీస్‌, జర్మనీ, హాంకాంగ్‌, సింగపూర్‌, లగ్జంబర్గ్‌ దేశాలున్నాయి.
• 2022లో 46వ స్థానంలో ఉన్న భారత్‌ ర్యాంక్‌.. ఈసారికిగాను 67వ స్థానానికి పడిపోయింది.
• మొత్తంగా 2022లో 1.15 ట్రిలియన్‌ స్విస్‌ ఫ్రాంక్స్‌గా ఉన్న డిపాజిట్లు 2023లో 983 బిలియన్‌ స్విస్‌ ఫ్రాంక్స్‌లకు తగ్గాయి.