Credit Card | ఇంతకుముందు 20 ఏండ్ల క్రితం వరకు క్రెడిట్ కార్డు పొందాలంటే చాలా సంక్లిష్టంగా ఉండేది. కానీ, ఇప్పుడు పరిస్థితులు మారిపోయాయి. బ్యాంకింగ్ లావాదేవీలు సజావుగా సాగితే చాలు.. పలు బ్యాంకులు తమ ఖాతాదారులకు క్రెడిట్ కార్డులు తేలిగ్గా జారీ చేస్తున్నాయి. కానీ, గతంలోనైనా.. ఇప్పుడైనా తీసుకున్న క్రెడిట్ కార్డులు క్యాన్సిల్ చేయడం అంతే ఈజీ కాదు. క్రెడిట్ కార్డు జారీ సంస్థలు తమ ఖాతాదారులను కాపాడుకోవడానికి పలు మార్గాలు వెతుకుతుంటాయి.
క్రెడిట్ కార్డుల వాడకం అవసరం లేని వారు తమకు జారీ చేసిన క్రెడిట్ కార్డును క్లోజ్ చేయడానికి సంబంధిత బ్యాంక్.. ఆర్థిక సంస్థ లేదా క్రెడిట్ కార్డు జారీ సంస్థ టోల్ ఫ్రీ నంబర్కు కాల్ చేస్తే.. ఆ కార్డు ఉపయోగాలు.. దాని కొనసాగింపునకు ఖాతాదారులను ఒప్పించడానికి ఆయా బ్యాంకులు.. సంస్థలు ప్రయత్నిస్తుంటాయి. అందులో భాగంగా కార్డు పరిమితి పెంచడంతోపాటు అప్గ్రేడ్ చేయడం, యాన్యువల్ చార్జీల నుంచి మినహాయింపు వంటి ఆఫర్లు అందుబాటులోకి తెస్తాయి. యూజర్లు తమ క్రెడిట్ కార్డు మూసివేయడానికి ముందు కనీసం రెండు, మూడు సార్లయినా.. సంబంధిత క్రెడిట్ కార్డు జారీ సంస్థ నుంచి దాని పరిమితి పెంపు లేదా అప్గ్రేడ్ తదితర ఆఫర్లు ఇస్తామని ఫోన్ కాల్స్ వస్తాయి.
ఆర్బీఐ రూల్స్ ప్రకారం క్రెడిట్ కార్డును రద్దు చేయాలని ఏ క్రెడిట్ కార్డ్ యూజర్ అభ్యర్థించినా సంబంధిత క్రెడిట్ కార్డు జారీ సంస్థ తప్పనిసరిగా స్వీకరించాలి. ఆ క్రెడిట్ కార్డుపై ఎటువంటి బకాయిల్లేకపోతే వారం (ఏడు) రోజుల్లోగా దాన్ని క్యాన్సిల్ చేసేయాలి. నిర్దిష్ట గడువు లోగా కార్డు రద్దు చేయకుంటే.. రద్దు చేసే వరకు ప్రతి రోజూ రూ.500 జరిమానా పే చేయాల్సి వస్తుంది.
క్రెడిట్ కార్డు యూజర్లు ఈ-మెయిల్, ఎస్ఎంఎస్, ఇంటరాక్టివ్ వాయిస్ రెస్పాన్స్ (ఐవీఆర్), ఇంటర్నెట్ బ్యాంకింగ్, మొబైల్ యాప్ తదితర మార్గాల్లో తమ క్రెడిట్ కార్డు రద్దు చేయాలని అప్పీల్ చేయొచ్చు. పోస్టాఫీసు ద్వారా మాత్రమే క్రెడిట్ కార్డు క్లోజర్ అప్పీల్ పంపాలని సంబంధిత క్రెడిట్ కార్డు జారీ సంస్థలు తమ ఖాతాదారులపై ఒత్తిడి తేలేవు. పోస్టాఫీసు ద్వారా అప్పీల్ పంపితే ఆలస్యం అవుతుంది. క్రెడిట్ కార్డు రద్దు చేశాక సంబంధిత సమాచారం ఎస్ఎంఎస్ ద్వారా గానీ, ఈ-మెయిల్ ద్వారా గానీ తమ ఖాతాదారులకు సమాచారం ఇవ్వాలి.
ఒకటి కంటే ఎక్కువ క్రెడిట్ కార్డులు కలిగి ఉండి.. వాటి నిర్వహణ కష్టమని భావిస్తున్నప్పుడు.. సదరు క్రెడిట్ కార్డులతో లభించే ప్రయోజనాల కంటే.. ఏటా చెల్లించే వార్షిక చార్జీలు ఎక్కువైనా.. వడ్డీరేట్లు తడిసి మోపెడవుతున్నా సంబంధిత యూజర్ తన క్రెడిట్ కార్డు రద్దు చేసుకోవచ్చు. అలా కాకుండా స్టూడెంట్ కార్డు లేదా సెక్యూర్డ్ కార్డ్ వాడుతున్నట్లయితే .. దాన్ని రెగ్యులర్ కార్డుగా మార్చుకోవడానికి ఇప్పుడు ఉన్న కార్డు రద్దు చేసుకోవచ్చు.
క్రెడిట్ కార్డు రద్దు చేయాలని అప్పీల్ చేయడానికి ముందు దానిపై ఉన్న బకాయిలు పూర్తిగా చెల్లించేయాలి. ఒకవేళ ఔట్ స్టాండింగ్ బ్యాలెన్స్ ఉండగా రద్దు కోసం అప్పీల్ చేసినా, క్రెడిట్ కార్డు జారీ సంస్థలు మీ అభ్యర్థనను తోసిపుచ్చుతాయి. కనుక బకాయిలేమీ లేవని నిర్ధారించుకున్నాకే ఆ క్రెడిట్ కార్డును రద్దు చేయాలని సంబంధిత క్రెడిట్ కార్డు జారీ సంస్థను కోరాలి.
క్రెడిట్ కార్డు తీసుకున్నా కొందరు వాటిని ఉపయోగించరు. అయినా సంబంధిత సంస్థలు చార్జీలు వసూలు చేస్తూనే ఉంటాయి. కార్డు వార్షిక రుసుము, వడ్డీ, ఆలస్య రుసుము తదితర చార్జీలతో పే చేయాల్సిన మొత్తం బకాయి పెరిగిపోవచ్చు. ఇవన్నీ చెల్లిస్తేనే సంబంధిత క్రెడిట్ కార్డును రద్దు చేయడానికి ఆయా సంస్థలు అనుమతించవు. కనుక క్రెడిట్ కార్డు అవసరం లేదనుకున్నవారు.. ఎటువంటి చార్జీలు వర్తింప జేయకముందే క్రెడిట్ కార్డు క్లోజ్ చేయడం బెటరని నిపుణులు చెబుతున్నారు. క్రెడిట్ కార్డును రద్దు క్లోజ్ చేయాలనుకుంటే సంబంధిత సంస్థ రూల్స్ను తెలుసుకోవాలి. ఇలా చేయడంతో క్లోజర్ సమయంలో ఏయే కారణాలతో పెనాల్టీలు వేస్తారో అర్థమవుతుంది. చివరి నిమిషంలో ఎటువంటి చార్జీలు, పెనాల్టీలు పడకుండా క్రెడిట్ కార్డు చివరి స్టేట్మెంట్ను చెక్ చేయండి.
క్రెడిట్ కార్డుతో.. వస్తు సేవల బిల్లులు చెల్లిస్తే వచ్చే రివార్డు పాయింట్లను ఉపయోగించుకోవడంతో కొంత సొమ్ము ఆదా చేయొచ్చు. కనుక క్రెడిట్ కార్డు క్లోజ్ చేయడానికి ముందు సంబంధిత రివార్డు పాయింట్లు పూర్తిగా రిడీమ్ చేసేసుకోవాలి. క్రెడిట్ కార్డు క్లోజర్ కోసం అప్పీల్ చేశాక.. ఎన్ని రోజులకు దాన్ని క్యాన్సిల్ చేస్తారో కస్టమర్ కేర్ ప్రతినిధితో మాట్లాడి చెక్ చేసుకోవాలి. అంతే కాదు.. క్రెడిట్ కార్డు రద్దయినట్లు రిటెన్ డాక్యుమెంట్ పొందాలి.
ఆటోమేటిక్ బిల్లు పేమెంట్స్, బదిలీలపై నిర్ధిష్టమైన ఇండికేషన్లు ఉంటే తొలుత వాటిని క్యాన్సిల్ చేయాలి. ఆ సూచనలు రద్దు చేయకుండా క్రెడిట్ కార్డు రద్దు చేయడానికి ముందే ఏదైనా పేమెంట్స్ జరిపితే, కార్డులో ఔట్ స్టాండింగ్ బ్యాలెన్స్ వస్తుంది.. పెనాల్టీల మోత తప్పదని నిపుణులు చెబుతన్నారు. క్రెడిట్ కార్డు రద్దు చేస్తున్నప్పుడు దాని ప్రభావం మన సిబిల్ స్కోర్పై పడకుండా చెక్ చేసుకోవాలి. బ్యాలెన్స్ బ్లిలు క్లియర్ చేస్తే సరి లేదంటే సిబిల్ స్కోర్ పడిపోతుంది. క్రెడిట్ కార్డ్ క్లోజ్ చేస్తే మీ క్రెడిట్ లిమిట్ మొత్తం తగ్గిపోయి, క్రెడిట్ యుటిలైజేషన్ నిష్పత్తి పెరగడం వల్ల సిబిల్ స్కోర్ మీద ప్రతికూల ప్రభావం చూపుతుందని నిపుణులు చెబుతున్నారు.