కళ తప్పుతున్న ఐపీవోలు

ఈ ఆర్థిక సంవత్సరం ప్రథమార్ధంలో  ఇనీషియల్‌ పబ్లిక్‌ ఆఫర్లు (ఐపీవో) ద్వారా ఆయా కంపెనీలు సమీకరించిన నిధులు గత ఏడాది ఇదే సమయంతో పోలిస్తే 26 శాతం తగ్గాయి.

న్యూఢిల్లీ, అక్టోబర్‌ 4: ఈ ఆర్థిక సంవత్సరం ప్రథమార్ధంలో  ఇనీషియల్‌ పబ్లిక్‌ ఆఫర్లు (ఐపీవో) ద్వారా ఆయా కంపెనీలు సమీకరించిన నిధులు గత ఏడాది ఇదే సమయంతో పోలిస్తే 26 శాతం తగ్గాయి. ప్రైమ్‌ డాటాబేస్‌ వెల్లడించిన గణాంకాల ప్రకారం 2022 ఏప్రిల్‌-సెప్టెంబర్‌ మధ్యకాలంలో 14 ఇష్యూల ద్వారా రూ.35,456 కోట్లు సమకూరగా, ఈ ఏడాది ప్రధమార్థంలో ఇష్యూల సంఖ్య రెట్టింపునకుపైగా పెరిగి 31కు చేరినప్పటికీ, అవి సేకరించిన నిధుల మొత్తం మాత్రం రూ.26,300 కోట్లకు తగ్గింది. అయితే 2022 మే నెలలో వచ్చిన ఎల్‌ఐసీ ఐపీవోను మినహాయిస్తే ఈ ఏడాది నిధుల సమీకరణ 76 శాతం పెరిగిందని ప్రైమ్‌ డాటా బేస్‌ మేనేజింగ్‌ డైరెక్టర్‌ ప్రణవ్‌ హాల్దియా తెలిపారు. వివరాలు&

• వివిధ ఈక్విటీ ఇష్యూల ద్వారా ప్రస్తుత ఆర్థిక సంవత్సరం ఏప్రిల్‌-సెప్టెంబర్‌లో జరిగిన నిధుల సమీకరణ 69 శాతం క్షీణించి రూ.73,747 కోట్ల నుంచి రూ.43,694 కోట్లకు పడిపోయింది.
• వీటిలో ఎస్‌ఎంఈ ఇష్యూ ప్లాట్‌ఫామ్స్‌, ఇన్విట్స్‌, రీట్స్‌, ఓఎఫ్‌ఎస్‌, క్విప్‌ ఇష్యూలు ఉన్నాయి
• ఎస్‌ఎంఈ ఇష్యూలు సమీకరించిన నిధుల మొత్తం రూ.36,594 కోట్ల నుంచి రూ.29,032 కోట్లకు తగ్గింది
• ఇన్విట్స్‌, రీట్స్‌తో సహా ఆఫర్‌ ఫర్‌ సేల్‌ (ఓఎఫ్‌ఎస్‌) ద్వారా సమీకరించిన నిధులు రూ.15,541 కోట్ల నుంచి రూ.1,446 కోట్లకు తగ్గింది
• క్విప్‌ల ద్వారా సేకరించిన మొత్తం రూ.20,748 కోట్ల నుంచి రూ.5,238 కోట్లకు పడిపోయింది
• ఇన్విట్స్‌, రీట్స్‌ సమీకరణ మొత్తం రూ.8,426 కోట్ల నుంచి అత్యంత కనిష్ఠస్థాయి రూ.416 కోట్లకు తగ్గింది
• డెట్‌ పబ్లిక్‌ ఇష్యూల ద్వారా వచ్చిన నిధులు రూ.10,992 కోట్ల నుంచి రూ.3,372 కోట్లకు తగ్గాయి.
• మెయిన్‌బోర్డ్‌ ఇష్యూల్లో అత్యధికంగా మ్యాన్‌కైండ్‌ ఫార్మా రూ.4,326 కోట్లు సమీకరించగా, జేఎస్‌డబ్ల్యూ ఇన్‌ఫ్రా రూ.2,800 కోట్లతో ద్వితీయస్థానంలో నిలిచింది. అన్నింటికంటే చిన్న ఐపీవో ప్లాజా వైర్స్‌ నుంచి వచ్చింది. ఇది రూ.67 కోట్లు మాత్రమే సేకరించింది
• ఈ ఆర్థిక సంవత్సరం ద్వితీయార్థంలో ఐపీవోలు జారీచేసేందుకు 28 కంపెనీలు సిద్ధంగా ఉన్నాయి. ఇప్పటికే సెబీ అనుమతి పొందిన ఇవి రూ.38,000 కోట్లు సమీకరించాలని ప్రతిపాదించాయి
• మరో రూ.44,000 కోట్ల సమీకరణ కోసం 41 కంపెనీలు సెబీ ఆమోదం కోసం వేచిచూస్తున్నాయి