Tariff War | తగ్గేదేలే.. తారస్థాయికి అమెరికా, చైనా మధ్య వాణిజ్య యుద్ధం

అమెరికా-చైనా మధ్య వాణిజ్య యుద్ధం తారస్థాయికి చేరింది. అగ్రరాజ్యాధినేత డొనాల్డ్‌ ట్రంప్‌ తాను ప్రకటించిన ప్రతీకార సుంకాల అమలును 90 రోజులపాటు నిలుపుదల చేసినా.. చైనాకు మాత్రం ఆ ఊరటనివ్వలేదన్న విషయం తెలిసిందే.

• అమెరికాపై చైనా 125 శాతం టారిఫ్‌లు

బీజింగ్‌, ఏప్రిల్‌ 11: అమెరికా-చైనా మధ్య వాణిజ్య యుద్ధం తారస్థాయికి చేరింది. అగ్రరాజ్యాధినేత డొనాల్డ్‌ ట్రంప్‌ తాను ప్రకటించిన ప్రతీకార సుంకాల అమలును 90 రోజులపాటు నిలుపుదల చేసినా.. చైనాకు మాత్రం ఆ ఊరటనివ్వలేదన్న విషయం తెలిసిందే. ఈ క్రమంలో గురువారం కూడా మరో 20 శాతం అదనపు సుంకాలు వేసి మొత్తం డ్రాగన్‌పై 145 శాతానికి చేర్చారు. ఈ నేపథ్యంలో శుక్రవారం చైనా కూడా దీటుగా స్పందించింది. తమ దేశంలోకి వచ్చే అమెరికా వస్తూత్పత్తులపై మరో 41 శాతం టారిఫ్‌లు పడుతాయని స్పష్టం చేసింది. దీంతో అమెరికాపై చైనా అదనపు సుంకాల భారం 84 శాతం నుంచి 125 శాతానికి పెరిగిపోయింది. శనివారం నుంచి పెంపు అమల్లోకి రానున్నది. కాగా, పరస్పర సుంకాలపై అమెరికాతో చర్చలకు సిద్ధమని చెప్తూనే.. బెదిరింపులకు పాల్పడితే ఊరుకోబోమని చైనా హెచ్చరిస్తున్నది. ఇందుకు తగ్గట్టుగానే ట్రంప్‌ దూకుడుకు తగ్గట్టుగా జిన్‌పిన్‌ సర్కారు ముందుకెళ్తున్నది చూస్తూనే ఉన్నాం. ఇక అమెరికా టారిఫ్‌ల పెంపు అంశాన్ని ప్రపంచ ఆర్థిక చరిత్రలో ఓ పెద్ద జోక్‌గా చైనా కస్టమ్స్‌ టారిఫ్‌ కమిషన్‌ అభివర్ణించింది. అంతేగాక 125 శాతం సుంకాల భారం వల్ల చైనాలో అమెరికా వస్తూత్పత్తులకు ఇక గిరాకీ ఉండబోదని, కాబట్టి మళ్లీ చైనాపై ట్రంప్‌ సుంకాలను పెంచినా.. దానికి మేమేమీ స్పందించబోమని కమిషన్‌ చెప్పింది. అయితే అమెరికా టారిఫ్‌లపై చివరిదాకా పోరాడుతామని పునరుద్ఘాటించింది.

ఈయూతో కలిసి ఉమ్మడి పోరు
అమెరికా ప్రతీకార సుంకాలపై ఆయా దేశాల మద్దతు కూడగట్టే పనిలో బిజిబిజీగా ఉన్న చైనా.. యూరోపియన్‌ యూనియన్‌ (ఈయూ)పైనే ఎక్కువగా దృష్టి సారిస్తున్నది. ఈయూ కూటమిలో చాలా దేశాలు ఉండటం, ట్రంప్‌ ఎక్కువగా టారిఫ్‌లు వేసిన దేశాల జాబితాలో అవీ భాగం కావడంతో ఆ వైపు నుంచి డ్రాగన్‌ పావులు కదుపుతున్నది. ఇందులో భాగంగానే తాజాగా చైనా అధ్యక్షుడు జీ జిన్‌పిన్‌.. ఈ టారిఫ్‌ వార్‌పై ఉమ్మడి పోరుకు పిలుపునిచ్చారు. అందులో భాగం కావాలని ఈయూను కోరారు. ఇక ఈ వాణిజ్య యుద్ధంలో ఎవరూ విజేత కాలేరన్న ఆయన ప్రపంచంపై ఈ తరహా విధానాలను అనుసరిస్తే ఒంటరిగా మిగిలిపోతారని ట్రంప్‌ను హెచ్చరించారు. ఇప్పటికే అమెరికా తీరుపై ప్రపంచ వాణిజ్య సంస్థ (డబ్ల్యూటీవో)లో చైనా ఫిర్యాదు చేసిన సంగతి విదితమే.

టారిఫ్‌లకు బ్రేక్‌.. భారత్‌ ఏం చేయాలి?

• భారత్‌-అమెరికా మధ్య ప్రతిపాదిత ద్వైపాక్షిక వాణిజ్య ఒప్పందం అమలుకు చర్చలను వేగవంతం చేయాలని భారతీయ ఎగుమతి సంస్థల సమాఖ్య (ఎఫ్‌ఐఈవో) అధ్యక్షుడు ఎస్‌సీ రల్హన్‌ సూచించారు.
• చైనాపై అధిక టారిఫ్‌ల నేపథ్యంలో అక్కడి ఎలక్ట్రానిక్స్‌ తయారీ సంస్థలను ఆకర్షించి ఆ పెట్టుబడులు భారత్‌కు వచ్చేలా కేంద్ర ప్రభుత్వం కృషి చేయాలని ఇండియా సెల్యులార్‌ అండ్‌ ఎలక్ట్రానిక్స్‌ అసోసియేషన్‌ (ఐసీఈఏ) చైర్మన్‌ పంకజ్‌ మహింద్రూ సలహా ఇచ్చారు.
• అల్యూమినియం ఉత్పత్తులపై అమెరికా ఈ ఏడాది మార్చిలోనే 25 శాతం అదనపు సుంకాలను వేసిందని, దీంతో టారిఫ్‌ల వాయిదా వల్ల తమకేమీ ఊరట దక్కలేదని భారతీయ మినరల్‌ ఇండస్ట్రీస్‌ సమాఖ్య అదనపు ప్రధాన కార్యదర్శి బీకే భాటియా అంటున్నారు. కాబట్టి అమెరికాతో చర్చల సందర్భంగా ఈ పరిశ్రమపైనా భారం తప్పేలా కృషి చేయాలని మోదీ సర్కారును కోరుతున్నారు.
• టారిఫ్‌లు వాయిదాపడ్డప్పటికీ అమెరికాపై ఎక్కువగా ఆధారపడకపోవడమే భారత్‌కు మంచిదని, కనుక ఇతర దేశాల మార్కెట్లపై దృష్టిసారించి అక్కడి ఎగుమతులు పెరిగేలా చూసుకోవాలని కేంద్రానికి ఈవై ఇండియా ట్యాక్స్‌ పార్ట్‌నర్‌ బిపిన్‌ సప్రా సూచించారు.
• అమెరికాలో చైనా దిగుమతులపై 145 శాతానికి టారిఫ్‌లు చేరడంతో అక్కడ భారతీయ ఉత్పత్తులకు మరింత గిరాకీ పెరగవచ్చని గ్లోబల్‌ ట్రేడ్‌ రిసెర్చ్‌ ఇనీషియేటివ్‌ (జీటీఆర్‌ఐ) అంచనా వేస్తున్నది. ఈ పరిస్థితిని అందిపుచ్చుకుంటే భారత్‌కు ఎగుమతుల పరంగా లాభిస్తుందంటున్నది.