ఆటోకు అచ్చొచ్చిన జూలై

ఆటోమొబైల్‌ సంస్థలకు జూలై అచ్చొచ్చింది. గత నెలలో వార్షిక వృద్ధిరేటు 10 శాతంగా నమోదైంది. ప్యాసింజర్‌ వాహనాలు, ద్విచక్ర, కమర్షియల్‌ వాహనాలకు కొనుగోలుదారుల నుంచి లభించిన మద్దతుతో జూలై నెలలో వాహన విక్రయాలు రెండంకెల వృద్ధి నమోదైనట్లు ఇండస్ట్రీ బాడీ ఫాడా తెలిపింది.

• 10 శాతం పెరిగిన వాహన విక్రయాలు: ఫాడా

న్యూఢిల్లీ, ఆగస్టు 7: ఆటోమొబైల్‌ సంస్థలకు జూలై అచ్చొచ్చింది. గత నెలలో వార్షిక వృద్ధిరేటు 10 శాతంగా నమోదైంది. ప్యాసింజర్‌ వాహనాలు, ద్విచక్ర, కమర్షియల్‌ వాహనాలకు కొనుగోలుదారుల నుంచి లభించిన మద్దతుతో జూలై నెలలో వాహన విక్రయాలు రెండంకెల వృద్ధి నమోదైనట్లు ఇండస్ట్రీ బాడీ ఫాడా తెలిపింది. గత నెలలో మొత్తంగా 17,70,181 యూనిట్లు అమ్ముడయ్యాయి. జూలై 2022లో 16,08,217 యూనిట్లు జరిగాయి. వీటిలో ప్యాసింజర్‌ వాహన సేల్స్‌ 4 శాతం పెరిగి 2,84,064 యూనిట్లకు చేరుకున్నాయి. ఉత్తర భారతంలో వర్షాభావ పరిస్థితులు నెలకొన్నప్పటికీ నూతన ఉత్పత్తులను విడుదల చేయడం అమ్మకాలకు కలిసొచ్చిందని ఫాడా ప్రెసిడెంట్‌ మనీష్‌ రాజ్‌ సింఘానియా తెలిపారు.

• స్పోర్ట్స్‌ యుటిలిటీ వాహనాలను ఎగబడి కొనుగోలు చేస్తున్నారు.
• ద్విచక్ర వాహన రిటైల్‌ సేల్స్‌ 8 శాతం పెరిగి 12,28,139లకు చేరుకున్నాయి. గతేడాది ఇది 11,35,566యూనిట్లుగా ఉన్నది.
• కమర్షియల్‌ వాహన అమ్మకాలు కేవలం 2 శాతం వృద్ధిని కనబరిచాయి.
• త్రిచక్ర వాహన విక్రయాలు 74 శాతం చొప్పున పెరిగాయి. ట్రాక్టర్‌ అమ్మకాలు కూడా 21 శాతం అధికమయ్యాయి.