Health Insurance | శిల్ప ఒక ప్రైవేట్ కంపెనీలో ఉద్యోగిని. వయస్సు 30 ఏండ్లు. హైదరాబాద్లో కుటుంబంతో నివసిస్తున్నారు. భర్త, ఇద్దరు పిల్లలున్నారు. కంపెనీ నుంచి ఎలాంటి ఆరోగ్య బీమా సౌకర్యం లేకపోవడంతో తానే రూ.3 లక్షలకు ఓ ప్రముఖ సంస్థ నుంచి హెల్త్ ఇన్సూరెన్స్ ( Health Insurance ) తీసుకున్నారు. ఒకసారి తన భర్త సురేష్కు గుండెపోటు రావడంతో దవాఖానలో చేర్పించాల్సి వచ్చింది. స్టంట్ వేయడంతోపాటు కొన్ని గుండె సంబంధ సమస్యలు కూడా ఉండటంతో 15 రోజులపాటు చికిత్స జరిగింది. ఖర్చు సుమారు రూ.15 లక్షలు అయింది. కానీ బీమా కంపెనీ ఇచ్చిన క్లెయిం మాత్రం రూ.3 లక్షలే. చేతి నుంచి రూ.12 లక్షలు కట్టుకోవాల్సి రావడంతో అందిన చోటల్లా అప్పులు చేయాల్సి వచ్చింది.
చాలామందికి ఇలాంటి అనుభవం ఎదురై ఉండవచ్చు. కరోనా తర్వాత ఆరోగ్య బీమా ఎంత అవసరమో ప్రపంచం మొత్తానికి తెలిసొచ్చింది. అయితే ఎంత మొత్తంలో ఇన్సూరెన్స్ అవసరమనే విషయాన్ని కూడా మనం ఖచ్చితంగా తెలుసుకోవాలి. లేకపోతే ఖర్చుల భారం తప్పదు. సాధారణ జలుబు, జ్వరం వచ్చినా తట్టుకోలేక టెస్టులు, దవాఖానల చుట్టూ తిరిగే రోజులొచ్చాయి. ఇక గుండెపోటు, బీపీ, షుగర్ మూడు పదుల వయసుకే వచ్చేస్తున్నాయి. కాబట్టి పూర్తిస్థాయిలో మనకు ఇన్సూరెన్స్ కవరేజీ ఉండాలి.
వాస్తవానికి ఇంత మొత్తమైతే బీమా సరిపోతుందనే థంబ్ రూల్ హెల్త్ ఇన్సూరెన్స్ విషయంలో వర్తించదు. ఎందుకంటే ఒక్కో కుటుంబ అవసరం, ఒకొక్కరి ఆరోగ్య స్థితి ఒక్కో రకంగా ఉంటుంది. అయితే నగరాల్లో ఉంటున్నవాళ్లు కనీసం రూ.5 లక్షల ఫ్యామిలీ ఫ్లోటర్ హెల్త్ ఇన్సూరెన్స్ పాలసీ తీసుకోవడం ఉత్తమం. అదే పట్టణాల్లో ఉన్న వాళ్లకైతే మెడికల్ ఖర్చులు సాధారణంగానే తక్కువగా ఉంటాయి. అందుకే రూ.3 లక్షలకు తగ్గకుండా బీమా చేయించుకోవడం మంచిది. ఫైనాన్షియల్ ప్లానర్స్ అంచనా ప్రకారం మీ వార్షిక జీతంలో కనీసం యాభై శాతమైనా బీమా కవరేజీ ఉంటే నిశ్చింతగా ఉండొచ్చు. అంటే మీకు ఏడాదికి రూ.20 లక్షల జీతం వస్తోందంటే.. కనీసం రూ.10 లక్షలకైనా హెల్త్ ఇన్సూరెన్స్ ఉండటం మంచిది. అదే సీనియర్ సిటిజన్స్ అయితే కనీసం రూ.10 లక్షలకు తక్కువ లేకుండా బీమా ఉంటే ధీమాగా ఉండొచ్చు. కంపెనీలు ఇస్తున్నాయి కదా అని అవసరానికి మించి రూ.25 లక్షలు, రూ.50 లక్షలకు బీమా తీసుకుంటే.. ఏటికేడు ప్రీమియం కూడా చెల్లించాల్సిన బాధ్యత మనదే. అందుకే ఎంత అవసరమో అంతే తీసుకోవాలి.
ఆరోగ్య బీమా తీసుకునే ముందు మన వయస్సెంత?, మనపై ఆధారపడిన కుటుంబ సభ్యులు ఎంత మంది?, ఏ ప్రాంతంలో ఉంటున్నాం?, మన ఫ్యామిలీ హిస్టరీలో ఎవరికైనా ఏదైనా జబ్బులు ఉన్నాయా?, మన జీవనశైలి ఎలా ఉంది?, మనం ఎలాంటి కంఫర్ట్ కోరుకుంటాం? అనేవి ప్రధానాంశాలు. సగటున ఒక్కో కుటుంబానికి కనీసం రూ.5 లక్షల ఫ్యామిలీ ఫ్లోటర్ కవరేజీ అవసరమనుకుంటున్న రోజుల్లో కొన్ని కంపెనీలు ఏకంగా రూ.50 లక్షలకు, కోటి రూపాయలకు కూడా బీమా చేయిస్తున్నాయి.
ఏదైనా అతివృష్టి, అనావృష్టి పనికిరాదు. తక్కువ వయస్సులో ఉన్నప్పుడు అంతంత పెద్ద మొత్తాల్లో హెల్త్ ఇన్సూరెన్స్ అవసరం ఉండదు. కుటుంబం పెరుగుతున్నకొద్దీ ఒక్కో సభ్యుడిని మనం యాడ్ చేస్తాం. కాబట్టి ఫ్యామిలీ ఫ్లోటర్ పాలసీ తీసుకున్నప్పుడు మనం బీమా మొత్తాన్ని మెల్లిగా మన అవసరాల కోసం పెంచుకోవచ్చు. తల్లిదండ్రులను ఈ పాలసీలో చేర్చకుండా వాళ్ల కోసం ప్రత్యేకంగా మరో పాలసీని తీసుకోవడం వల్ల ప్రీమియం మొత్తాన్ని భారీగా ఆదా చేసుకోవచ్చు. ఎందుకంటే ఫ్యామిలీలో వయస్సు ఎక్కువగా ఉన్నవాళ్ల ఆధారంగానే ప్రీమియం లెక్కింపు ఉంటుంది.
రూమ్ సబ్ లిమిట్స్, కో పేమెంట్ ఆప్షన్, ఎక్స్క్లూజన్స్ను జాగ్రత్తగా గమనించండి. పాలసీ వర్డింగ్, క్లెయిమ్ సెటిల్మెంట్ రేషియో, క్యాష్లెస్ ఆప్షన్ వంటివి కూడా చూడాలి.
బీమా సంస్థలు క్రిటికల్ ఇల్నెస్ రైడర్స్ను ఆఫర్ చేస్తాయి. క్యాన్సర్, బ్రెయిన్ స్ట్రోక్, హార్ట్ స్ట్రోక్, కిడ్నీ ఫెయిల్యూర్ వంటివి సంభవించినప్పుడు పెద్ద మొత్తంలో ఒకేసారి సంస్థలు బీమా చెల్లింపుదారుకు ఇస్తాయి. కాబట్టి కొద్దిగా అధిక ప్రీమియం చెల్లించి క్రిటికల్ రైడర్స్ను ఎంపిక చేసుకున్నా కూడా మంచిదే.
-నాగేంద్ర సాయి కుందవరం