మహాకాళీ మహాలక్ష్మీ మహాసారస్వతీ ప్రభా
ఇష్ట కామేశ్వరీ కుర్యాత్ విశ్వశ్రీః విశ్వ మంగళమ్
నిత్యజీవితంలో మనకు అనేక కోరికలు కలుగుతుంటాయి. కొన్ని తప్పనిసరి అవసరాలు అయితే, మరికొన్ని మనసుకు సంతోషకరాలు అవుతుంటాయి. కనీసం మన స్థాయిలో ఉన్నవానిని కూడా ఒక్కోసారి మనం పొందలేని సందర్భాలు ఎదురవుతుంటాయి. దానికి మన కర్మలే కారణం. గతజన్మల్లో, కర్మల్లో ఇతరులకు మనం చేసిన గుణదోషాలే ఈ జన్మలో మన సుఖదుఃఖాలకు కారణమవుతుంటాయి. ఇది అవగాహన లేక ఏవో బాధలు పడుతూ, అనుభవం పొందలేక, ఇంకా కొత్త కోరికలకు శ్రీకారం చుడుతూ జీవితాన్ని చాలిస్తున్నవాళ్ళు ఎందరో. ఇలాంటి వారందరికీ సంచితకర్మలన్నీ పెరిగి పోతుంటాయి. కోరిక అనుభవించాలి లేదా జ్ఞానంతో అధిగమించాలి. దానికి దైవధ్యానం ముఖ్యమైన మార్గం. ప్రయత్నపూర్వకంగా కృషి చేసినప్పుడే మళ్ళీ మనకు భగవంతుడు ఇచ్చిన యోగాలన్నీ మన ఈ జీవితంలో అనుభవంలోకి వస్తాయి. అలాంటి ప్రయత్నమే ‘ఇష్టకామేశ్వరీదేవి’ జపం.
కామేశ్వరీదేవి కోరిన కోరికలు తీర్చే శక్తి స్వరూపం. మనకు ఇష్టమైన కోరికలు తీర్చే అమ్మ ఆమె. ఏది మనకు తీరాలన్నా కొంత శక్తి ఉండాలి. అదే విధంగా సంపదలూ ఉండాలి. తగిన జ్ఞానమూ కలగాలి. ఈ మూడింటికీ కాళి, లక్ష్మి, సరస్వతీ దేవతలు సంకేతాలు. ఈ ముగ్గురి వెలుగులమూర్తి స్వరూపమే ఇష్టకామేశ్వరీ దేవి. ఈ అమ్మవారి ధ్యానం వల్ల మనకు కోరికలు తీరి, అవి అనుభవంలోకి రావడం అతి త్వరగా జరుగుతుంది. కనుక, ప్రతి రోజూ కనీసం 1 గంటపాటు ‘ఓం శ్రీం ఇష్టకామేశ్వరియై నమః’ అనే జపం చేద్దాం.
సాగి
కమలాకరశర్మ