Credit card | క్రెడిట్‌ కార్డును వాడుతున్నారా.. అయితే మీరు తప్పక తెలుసుకోవాల్సిన విషయం ఏంటంటే?

క్రెడిట్‌ కార్డులను సురక్షితంగా వాడితే ఎన్ని ప్రయోజనాలున్నాయో.. ఇష్టారీతిన వాడితే అన్ని నష్టాలూ ఉన్నాయి. క్రెడిట్‌ కార్డుల వాడకం గణనీయంగా పెరుగుతున్న వేళ.. ఏం చేయకూడదు?, ఏం చేయాలన్నది? వినియోగదారులు తప్పక తెలుసుకోవాల్సిన అవసరం ఉన్నది.

Credit card | క్రెడిట్‌ కార్డులను సురక్షితంగా వాడితే ఎన్ని ప్రయోజనాలున్నాయో.. ఇష్టారీతిన వాడితే అన్ని నష్టాలూ ఉన్నాయి. క్రెడిట్‌ కార్డుల వాడకం గణనీయంగా పెరుగుతున్న వేళ.. ఏం చేయకూడదు?, ఏం చేయాలన్నది? వినియోగదారులు తప్పక తెలుసుకోవాల్సిన అవసరం ఉన్నది. రిజర్వ్‌ బ్యాంక్‌ ఆఫ్‌ ఇండియా (ఆర్బీఐ) లెక్కల ప్రకారం దేశంలో 8.6 కోట్లకుపైగా క్రెడిట్‌ కార్డులున్నాయి. ఈ ఏడాది ఆఖరుకల్లా 10 కోట్లకు చేరవచ్చని అంచనా. కేవలం ఏడాది వ్యవధిలో కోటి మంది వినియోగదారులు పెరిగారు. ఇక ప్రస్తుత కార్డుల్లో గరిష్ఠంగా హెచ్‌డీఎఫ్‌సీ బ్యాంకుకు చెందినవే 1.78 కోట్లు. ఆ తర్వాత ఎస్బీఐ, ఐసీఐసీఐ, యాక్సిస్‌ బ్యాంకు వినియోగదారులున్నారు. దేశంలోని క్రెడిట్‌ కార్డుల్లో 71 శాతం ఈ నాలుగు బ్యాంకులు జారి చేసినవే.

వినియోగదారులు చేయాల్సినవి..

• ప్రతిసారి పూర్తి స్థాయిలో కార్డు బకాయిలను చెల్లించాలి. అలా చేయకపోతే వడ్డీ భారం తప్పదు. సహజంగా వార్షిక వడ్డీరేటు 40 శాతంగా ఉంటుంది.
• బిల్లు చెల్లింపుల్లో ఒక్కసారి ఆలస్యమైనా మీ క్రెడిట్‌ స్కోర్‌ ప్రభావితమవుతుంది. 100 పాయింట్లు కోల్పోవచ్చు.
• క్రెడిట్‌ కార్డుపై మీకున్న వ్యయ పరిమితిలో 30 శాతం వరకే వాడుకోండి. సకాలంలో బిల్లులు చెల్లించగలను అన్న నమ్మకం వచ్చినప్పుడే ఖర్చును పెంచుకోండి.
• మీ క్రెడిట్‌ కార్డుకు సంబంధించి ఫీజులు, జరిమానాలు ఇతరత్రా నియమ, నిబంధనలపై అవగాహన ఉండటం అవసరం.
• కార్డు నెంబర్‌, గడువు తేదీ, సీవీవీ, పాస్‌వర్డ్‌ వంటి విలువైన సమాచారాన్ని ఎవ్వరితోనూ పంచుకోవద్దు.
• మీ క్రెడిట్‌ కార్డు కనిపించకపోతే లేదా దొంగిలించబడిందని గుర్తించినా అశ్రద్ధ చేయకుండా వెంటనే దాన్ని జారిచేసిన సంస్థకు తెలియజేయాలి.
• క్రెడిట్‌ కార్డు స్టేట్‌మెంట్లను ఎప్పటికప్పుడు చెక్‌ చేస్తూ ఉండాలి. అనధికారిక లావాదేవీలను గుర్తించవచ్చు.
• గోప్యంగా ఉండాల్సిన ఆర్థిక సమాచారాన్ని కోరుతూ వచ్చే అనుమానిత ఈ-మెయిల్స్‌, కాల్స్‌పై జాగ్రత్తగా ఉండాలి. అవసరమైతే పోలీసులను సంప్రదించండి.