Credit Card | నిర్దేశిత టైంలో వడ్డీలేకుండా అప్పు పొందడానికి క్రెడిట్ కార్డులు ఆధారం. సకాలంగా సౌకర్యవంతంగా చెల్లింపులు జరిపేవారికి క్రెడిట్ కార్డులు పాపులర్. ఒకవేళ బాధ్యతారాహిత్యంగా వాటిని వాడితే మాత్రం భారీ ఆర్థిక సంక్షోభంలోకి, ఒత్తిళ్లలోకి కూరుకుపోవడం ఖాయంగా కనిపిస్తున్నది. ఒకవేళ, మీరు క్రెడిట్ కార్డు కోసం దరఖాస్తు చేస్తున్నారా.. అయితే, అవి ఎలా పని చేస్తాయో.. అందుకు మీరేం చేయాలో తెలుసుకుందాం..
క్రెడిట్ కార్డులు తీసుకుని వాడే వారిపై జాయినింగ్ ఫీజు, వార్షిక ఫీజు, కార్డు రీప్లేస్మెంట్ ఫీజు, స్టేట్మెంట్ ఫీజు తదితర చార్జీల మోత మోగుతుంది. క్రెడిట్ కార్డు జారీ సంస్థ మీకు ఆఫర్ చేసిన సేవలను బట్టి చార్జీలు వర్తిస్తాయి. తొలిసారి క్రెడిట్ కార్డు తీసుకుంటున్నట్లయితే.. జీరో లేదా తక్కువ జాయినింగ్/ వార్షిక ఫీజు గల కార్డులు తీసుకోవడం ఉత్తమం అని నిపుణులు చెబుతున్నారు.
సకాలంలో బిల్లులు చెల్లించే వారికి వడ్డీలేని స్వల్పకాలిక రుణాలు పొందే ఆధారంగా క్రెడిట్ కార్డులు పని చేస్తాయి. క్రెడిట్ కార్డు వాడుకున్న రోజు నుంచి 50 రోజుల వరకు వడ్డీలేకుండా బిల్లు పే చేయొచ్చు. ఒకవేళ మీరు డెడ్లైన్ మిస్ అయ్యారో లేట్ ఫీజుతోపాటు మీ బకాయిపై వడ్డీ కూడా చెల్లించాల్సి ఉంటుంది.
ప్రతి క్రెడిట్ కార్డుపైనా నిర్దిష్ట పరిమితి వరకు వాడుకోవచ్చు. ఒక క్రెడిట్ సైకిల్ను బట్టి క్రెడిట్ కార్డుపై గరిష్ఠ చార్జీ విధిస్తారు. క్రెడిట్ కార్డు ఖాతాదారు క్రెడిట్ (సిబిల్) స్కోర్, చెల్లింపుల చరిత్ర ( payment history ), ఆదాయం, రుణ వినియోగ నిష్పత్తి తదితర అంశాల ఆధారంగా క్రెడిట్ కార్డు సంస్థలు రుణ పరిమితి ఆఫర్ చేస్తాయి. తొలిసారి క్రెడిట్ కార్డు యూజర్ల వాడకంపై ఆంక్షలు సమర్థవంతంగా అమలవుతాయి. దాన్ని బట్టే క్రెడిట్ లిమిట్ కూడా ఖరారవుతుంది. సకాలంలో బిల్లులు చెల్లిస్తూ.. తెలివిగా క్రెడిట్ కార్డులను వాడుకుంటున్నట్లయితే, సంబంధిత బ్యాంక్ మీ క్రెడిట్ లిమిట్ పెంచేస్తుంది.
క్రెడిట్ కార్డు మొత్తం బిల్లులో కనీస మొత్తం బకాయి గానీ, మొత్తం బిల్లు గానీ చెల్లిస్తే వడ్డీ భారం పడదు. కనీస మొత్తం బిల్లు అంటే.. మొత్తం బిల్లులో ఐదు శాతం మాత్రమే. కనీస మొత్తం బిల్లు చెల్లింపుతో క్రెడిట్ కార్డు యాక్టివ్గా ఉంటుంది. మిగతా బకాయిపై వడ్డీ వడ్డింపు ఉంటుంది. కనుక గడువులోగా మొత్తం క్రెడిట్ బిల్లు చెల్లించడం బెటరని ఆర్థిక, బ్యాంకింగ్ నిపుణులు అంటున్నారు. ఒకవేళ మొత్తం బిల్లు చెల్లించలేకపోతే.. సంబంధిత బ్యాంకర్తో మాట్లాడి దాన్ని ఈఎంఐలుగా మార్చుకోవచ్చు.
మీ నెలవారీ క్రెడిట్ కార్డు స్టేట్మెంట్పైన అటెన్షన్ పెట్టాలి. కొనుగోళ్లు, క్రెడిట్, కనీస మొత్తం బకాయి, చెల్లించాల్సిన వడ్డీ, ఆలస్యపు చెల్లింపు, గడువులోగా చెల్లింపు తదితర విషయాల పట్ల అప్రమత్తంగా ఉండాలి. ఈ అంశాలపై ఎప్పటికప్పుడు చెక్ చేసుకుంటూ ఉంటే లావాదేవీల్లో పొరపాట్లను నివారించడానికి వీలవుతుంది.
క్రెడిట్ కార్డు వాడుతున్న ప్రతి ఒక్కరూ .. వడ్డీ లేదా లేట్ ఫీజు భారం పడకుండా చూసుకునేందుకు గడువు తేదీలను గుర్తు పెట్టుకోవాలి. ఉదాహరణకు మీ క్రెడిట్ కార్డు స్టేట్మెంట్ ప్రతి నెలా రెండో తేదీన వస్తుందనుకుందాం.. దానర్థం అంతకుముందు నెల మూడో తేదీ నుంచి ఈ నెల రెండో తేదీ వరకు క్రెడిట్ సైకిల్ మొదలవుతుంది. క్రెడిట్ బిల్లింగ్ సైకిల్ మొదలైనప్పటి నుంచి బిల్లు చెల్లింపునకు 50 రోజుల గడువు ఉంటుంది. ఒకవేళ రీపేమెంట్ డెడ్లైన్ మిస్సయితే.. మొత్తం బిల్లుపై లేటు ఫీజు లేదా వడ్డీ భారం పడుతుంది.
క్యాష్బ్యాక్ ఆఫర్లు, రివార్డులతో షాపింగ్ చేయడంతో క్రెడిట్ కార్డు సుసంపన్నం అవుతాయి. మీ క్రెడిట్ కార్డు రెగ్యులర్ వాడకాన్ని బట్టి సెలెక్టెడ్ రిటైలర్లను బట్టి డిస్కౌంట్లు వస్తాయి. గ్రాసరీ షాపింగ్, ట్రావెల్, భోజనం వంటి రోజువారీ ఖర్చుల విషయంలో రివార్డు పాయింట్లు మీ సొమ్ము ఆదా చేస్తాయి. రివార్డు పాయింట్ల గడువు తేదీ కూడా మీ బిల్లు స్టేట్మెంట్లో ప్రస్తావిస్తారు. ఒక క్రెడిట్ కార్డును ఎంచుకుంటున్నప్పుడు మీ ఖర్చులను, అవసరాలను విశ్లేషించుకోవాలి.
డెబిట్ కార్డుల మాదిరిగానే ఏటీఎంల నుంచి క్రెడిట్కార్డులను వాడి నగదు విత్డ్రా చేసుకోవచ్చు. కానీ, అలా నగదు విత్డ్రా చేసుకున్న నిమిషం నుంచి దానిపై వడ్డీ వడ్డిస్తుంది బ్యాంక్. నెలవారీ వడ్డీరేటు 3.5 శాతం ఎక్కువ వడ్డిస్తారు. కనుక క్రెడిట్ కార్డుతో నగదు విత్ డ్రాయల్స్ చేస్తున్నప్పుడు దాని అవసరం గురించి అంచనా వేసుకోవాలి.
ఒక ఏడాదిలో నిర్దిష్ట మొత్తం క్రెడిట్కార్డు ఖాతాదారు వాడితే.. వార్షిక ఫీజు మాఫీ అవుతుంది. క్రెడిట్ లిమిట్ ఆధారంగా ఆ మొత్తం ఖరారవుతుంది. బాధ్యతాయుతంగా క్రెడిట్ కార్డు వాడకమే మీ సిబిల్ స్కోర్ నిర్మాణంలో కీలకం అవుతుంది. భవిష్యత్లో మీరు తీసుకునే రుణాలపైనా ప్రభావం చూపుతుంది.