శ్రీవారి సాల‌క‌ట్ల బ్రహ్మోత్సవాల బుక్‌లెట్ ఆవిష్కరణ

తిరుమల శ్రీవారి సాల‌క‌ట్ల బ్రహ్మోత్సవాల‌ వాహ‌న‌సేవ‌ల‌ బుక్‌లెట్‌ను టీటీడీ కార్యనిర్వహణాధికారి ఏవీ ధ‌ర్మారెడ్డి ఆవిష్కరించారు. సాలకట్ల బ్రహ్మోత్సవాలు ఈ నెల 27 నుంచి అక్టోబ‌రు 5 వ తేదీ వ‌రకు జ‌రుగ‌నున్నాయి.

తిరుపతి జిల్లా : తిరుమల శ్రీవారి సాల‌క‌ట్ల బ్రహ్మోత్సవాల‌ వాహ‌న‌సేవ‌ల‌ బుక్‌లెట్‌ను టీటీడీ కార్యనిర్వహణాధికారి ఏవీ ధ‌ర్మారెడ్డి ఆవిష్కరించారు. బుధ‌వారం తిరుప‌తిలోని ప‌రిపాల‌నా భ‌వ‌నంలో జరిగిన ఒక కార్యక్రమంలో ఈవో బుక్‌లెట్‌ను ప్రజలకు అందుబాటులోకి తీసుకొచ్చారు. సాలకట్ల బ్రహ్మోత్సవాలు ఈ నెల 27 నుంచి అక్టోబ‌రు 5 వ తేదీ వ‌రకు జ‌రుగ‌నున్నాయి.

సాలకట్ల బ్రహోత్సవాల నేపథ్యంలో ఈ నెల 20న ఉద‌యం 6 నుంచి 11 గంట‌ల వ‌ర‌కు కోయిల్ ఆళ్వార్ తిరుమంజ‌నం నిర్వహించనున్నారు. 26వ తేదీన రాత్రి 7 నుంచి 9 గంట‌ల వ‌ర‌కు అంకురార్పణ నిర్వహిస్తారు. 27న సాయంత్రం 5.45 నుంచి 6.15 గంట‌ల మ‌ధ్య మీన ల‌గ్నంలో ధ్వజారోహ‌ణం జ‌రుగ‌నున్నది. బ్రహ్మోత్సవాల్లో ప్రధానంగా అక్టోబరు 1న గరుడవాహనం, 2న స్వర్ణరథం, 4న ర‌థోత్సవం, 5 వ తేదీన చక్రస్నానం జరుగనున్నాయి. ఈ కార్యక్రమంలో జేఈఓలు శ్రీమ‌తి స‌దా భార్గవి, వీర‌బ్రహ్మం, న్యాయాధికారి రెడ్డెప్పరెడ్డి, బోర్డు సెల్ డిప్యూటీ ఈఓ శ్రీ‌మ‌తి క‌స్తూరి బాయి త‌దిత‌రులు పాల్గొన్నారు.

వాహనసేవల వివరాలు..

• సెప్టెంబరు 27న మొద‌టి రోజు సాయంత్రం 5.45 నుంచి 6.15 గంట‌ల వ‌ర‌కు ధ్వజారోహణం, రాత్రి 9 నుంచి 11 గంట‌ల వ‌ర‌కు పెద్ద శేష వాహనం.
• సెప్టెంబరు 28న రెండో రోజు ఉదయం 8 నుంచి 10 గంటల వ‌ర‌కు చిన్నశేష వాహనం, మధ్యాహ్నం 1 నుంచి 3 గంట‌ల వ‌ర‌కు స్నపన తిరుమంజనం, రాత్రి 7 నుంచి 9 గంట‌ల వ‌ర‌కు హంస వాహనం.
• సెప్టెంబర్ 29న మూడో రోజు ఉదయం 8 నుంచి 10 గంటల వ‌ర‌కు సింహ వాహనం, రాత్రి 7 నుంచి 9 గంట‌ల వ‌ర‌కు ముత్యపు పందిరి వాహనం.
• సెప్టెంబర్ 30న నాలుగో రోజు ఉదయం 8 నుంచి 10 గంటల వ‌ర‌కు కల్పవృక్ష వాహనం, రాత్రి 7 నుంచి 9 గంట‌ల వ‌ర‌కు సర్వభూపాల వాహనం.
• అక్టోబర్ 1న ఐదో రోజు ఉదయం 8 నుంచి 10 గంటల వ‌ర‌కు మోహినీ అవతారం, రాత్రి 7 నుండి గరుడ వాహనం.
• అక్టోబర్ 2న ఆరో రోజు ఉదయం 8 నుంచి 10 గంటల వ‌ర‌కు హనుమంత వాహనం, సాయంత్రం 4 నుంచి 5 గంట‌ల వ‌ర‌కు ర‌థ‌రంగ డోలోత్సవం (స్వర్ణ రథం), రాత్రి 7 నుంచి 9 గంట‌ల వ‌ర‌కు గజ వాహనం.
• అక్టోబర్ 3న ఏడో రోజు ఉదయం 8 నుంచి 10 గంటల వ‌ర‌కు సూర్యప్రభ వాహనం, మధ్యాహ్నం 1 నుంచి 3 గంట‌ల వ‌ర‌కు స్నపన తిరుమంజనం, రాత్రి 7 నుంచి 9 గంట‌ల వ‌ర‌కు చంద్రప్రభ వాహనం.
• అక్టోబర్ 4న ఎనిమిదో రోజు ఉదయం 7 గంటలకు రథోత్సవం (చెక్క రథం), రాత్రి 7 నుంచి 9 గంట‌ల వ‌ర‌కు అశ్వ వాహనం.
• అక్టోబర్ 5న తొమ్మిదో రోజు ఉదయం 6 నుంచి 9 గంట‌ల వ‌ర‌కు చక్రస్నానం, రాత్రి 9 నుంచి 10 గంట‌ల వ‌ర‌కు ధ్వజావరోహణం.