Srisailam | 14 నుంచి శ్రీశైలంలో కార్తీక మాసోత్స‌వాలు.. భ‌క్తుల‌కు వ‌స‌తుల క‌ల్ప‌న‌కు ప‌కడ్బందీ ఏర్పాట్లు

Srisailam | శ్రీశైల మహాక్షేత్రంలో నవంబర్ 14 నుంచి డిసెంబర్ 12 వరకూ కార్తీక మాసోత్సవాలు జరుగనున్నాయి.

Srisailam | శ్రీశైల మహాక్షేత్రంలో నవంబర్ 14 నుంచి డిసెంబర్ 12 వరకూ కార్తీక మాసోత్సవాలు జరుగనున్నాయి. కార్తీక మాసోత్సవాల్లో శ్రీ భమరాంబికామల్లిఖార్జున స్వామి అమ్మవార్లను దర్శించుకునేందుకు వచ్చే భక్తులకు ఎటువంటి అసౌకర్యం కలుగకుండా చర్యలు తీసుకోవాలని వివిధ విభాగాల అధికారులు, సిబ్బందికి దేవస్థానం ఈవో డీ పెద్దిరాజు ఆదేశాలు జారీ చేశారు. కార్తీక మాసోత్సవాల నిర్వహణ సన్నాహాలపై సోమవారం ఆయన సమీక్షించారు. భక్తులకు కల్పించే సౌకర్యాలన్నీ ముందస్తుగా పూర్తి చేయాలని సిబ్బందిని ఆదేశించారు. ముఖ్యంగా కార్తీక సోమవారాలు, కార్తీక పౌర్ణమి, శుద్ధ, బహుళ ఏకాదశులు, ప్రభుత్వ సెలవు రోజుల్లో భక్తుల రద్దీ ఎక్కువగా ఉంటుందని డీ పెద్దిరాజు చెప్పారు. భక్తుల రద్దీకి అనుగుణంగా ఏర్పాట్లు పకడ్బందీగా చేపట్టాలన్నారు.

పాతాళ గంగ వద్ద శౌచాలయాలు, స్త్రీలు దుస్తులు మార్చుకునే గదులకు, పాతాళగంగ మెట్ల మార్గం తదితర చోట్ల అవసరమైన మరమ్మతు పనులు వెంటనే పూర్తి చేయాలని సిబ్బందికి పెద్దిరాజు ఆదేశాలు జారీ చేశారు. గంగా భవానీ స్నాన ఘట్టాల వద్ద కూడా అవసరమైన మరమ్మతులు చేయించాలన్నారు.

భక్తులకు వసతుల కల్పన, మంచినీటి సరఫరా, సౌకర్యవంతమైన దర్శనం, శ్రీ స్వామి అమ్మవార్ల ఆర్జిత సేవలు, ఆలయ వేళలు, క్యూ లైన్ల నిర్వహణ, రద్దీ క్రమబద్దీకరణ, ట్రాఫిక్ క్రమబద్ధీకరణ, పారిశుద్ధ్యం, పార్కింగ్, కార్తీక సోమవారాల్లో లక్ష దీపోత్సవం, పుష్కరిణి హారతి, కార్తీక పౌర్ణమి సందర్భంగా జ్వాలాతోరణం, పుణ్య నదీ హారతి ఏర్పాట్లు, కార్తీక మాసంలో ఆకాశ దీపం ఏర్పాట్లు, సాంస్క్రుతిక కార్యక్రమాల నిర్వహణ తదితర అంశాలపై సుదీర్ఘంగా సమీక్షించారు.

కార్తీక మాసోత్సవాల నిర్వహణకు తీసుకున్న నిర్ణయాలివే..

శ్రీభ్రమరాంబికా మల్లికార్జున స్వామి అమ్మవార్లను దర్శించుకునేందుకు వచ్చే భక్తులకు సేవలు అందించేందుకు రద్దీ రోజుల్లో కార్యాలయ సిబ్బందికి ప్రత్యేక విధుల అప్పగింత.

దర్శనం ఏర్పాట్లు ఇలా

• వేకువజామున మూడు గంటలకు ఆలయాలు తెరవాలి.
• ప్రాత:కాల పూజల తర్వాత తెల్లవారుజామున 4.30 గంటల నుంచి సాయంత్రం నాలుగు గంటల వరకూ దర్శనాలు.
• సాయంత్రం 5.30 గంటల నుంచి రాత్రి 11 గంటల వరకూ దర్శనాలు.
  కార్తీక సోమవారాలు, ప్రభుత్వ సెలవు దినాలు తదితర రద్దీ రోజుల్లో (13 రోజులు) స్వామి వార్ల స్పర్శ దర్శనం పూర్తిగా నిలిపివేత.
• ఈ రద్దీ రోజుల్లో స్వామి వారి అలంకార దర్శనానికి మాత్రమే అనుమతి.

ఇలా ఆర్జిత సేవలు

• రద్దీ రోజుల్లో (మొత్తం 13 రోజులు) గర్భాలయ ఆర్జిత అభిషేకాలు, సామూహిక అభిషేకాలు పూర్తిగా నిలిపివేత.
• స్పర్శ దర్శనం క్యూ లైన్ భక్తులకు సౌకర్యవంతమైన దర్శకం కోసం కార్తీక మాసంలో సాధారణ రోజుల్లోనూ పరిమితంగా ఆర్జిత సేవలు.
• రెండు విడుతలుగా ఆర్జిత హోమాల నిర్వహణ.
• రద్దీ రోజుల్లో అమ్మవారి అంతరాలయంలో జరిపించే కుంకుమార్చనలు, అమ్మవారి ఆలయ ప్రాంగణంలోని ఆశీర్వచన మండపంలో నిర్వహణ.

అన్న ప్రసాదాల వితరణ

• అన్నదాన భవనంలో భక్తులకు ఉదయం 10.30 గంటల నుంచి అన్న ప్రసాదాల వితరణ.
• సాయంత్రం 6.30 గంటల నుంచి భక్తులకు అల్ఫాహారం పంపిణీ.
• క్యూ కాంప్లెక్స్‌లో దర్శనం కోసం వేచి ఉన్న భక్తులకు మంచినీరు, బిస్కట్లు, అల్పాహారం పంపిణీ.

లడ్డూ ప్రసాదాల పంపిణీ ఇలా

• కార్తీక మాసంలో వచ్చే భక్తుల రద్దీని దృష్టిలో ఉంచుకుని అవసరమైన సంఖ్యలో లడ్డూ ప్రసాదాలు సిద్ధం చేయాలి.
• భక్తుల రద్దీకి అనుగుణంగా లడ్డూ ప్రసాదాల విక్రయ కేంద్రాల ఏర్పాటు.
• రద్దీ రోజుల్లో ప్రస్తుతం ఉన్న ఏడు విక్రయ కేంద్రాలకు తోడు అదనపు కౌంటర్ల ఏర్పాటు

పాతాళ గంగ వద్ద ఏర్పాట్లు

• కార్తీక మాసంలో భక్తులు పుణ్య స్నానాలకు ప్రాధాన్యం ఇస్తారు. కనుక పాతాళ గంగ వద్ద అవసరమైన అన్ని ఏర్పాట్లు.
• పాతాళ గంగ వద్ద శౌచాలయాల నిర్వహణ, పారిశుద్ధ్యం నిర్వహణకు ప్రత్యేక శ్రద్ధ.. అదనపు లైటింగ్ ఏర్పాట్లు

కేశ ఖండన శాలలో ఏర్పాట్లు ఇలా

• భక్తులు తలనీలాలు సమర్పించడానికి వీలుగా కేశ ఖండనశాలలో ఏర్పాట్లు.
• భక్తుల రద్దీకి అనుగుణంగా కేశ ఖండన శాల వేళల నిర్ధారణ.

సూచికబోర్డుల ఏర్పాట్లు

• భక్తులకు సమాచారం తెలిపేందుకు వీలుగా మరిన్ని సూచిక బోర్డుల ఏర్పాటు.
• కార్తీక మాసం సందర్భంగా శివ చతుస్సప్తాహ భజనలు
• లోక కల్యాణం కోసం గతంలో మాదిరిగా ఈ ఏడాది కూడా కార్తీక మాసంలో అఖండ శివ చతుస్సప్తాహ భజనల నిర్వహణ
• పుష్కరిణి వద్ద లక్ష్మీ దీపార్చన.. పుష్కరిణి హారతి
• కార్తీక సోమవారాల్లో పుష్కరిణి వద్ద లక్ష దీపోత్సవం, పుష్కరిణి హారతి కార్యక్రమాల నిర్వహణ.

కార్తీక దీపోత్సవం

• భక్తులు కార్తీక దీపారాధన చేసుకోవడానికి వీలుగా ఆలయ ఉత్తర మాడ వీధి (శివ వీధి)లో ప్రత్యేక ఏర్పాట్లు.

పుణ్య నదీ హారతి

• కార్తీక పౌర్ణమి నవంబర్ 27నే అయినా.. ఆ రోజు పౌర్ణమి ఘడియలు మధ్యాహ్నం వరకే ఉన్నాయి. అంతకు ముందు రోజు 26న (రెండో ఆదివారం) ప్రదోష కాలంలో పౌర్ణమి ఘడియలు ప్రారంభం అయ్యాయి.
• అందుకే 26 సాయంత్రమే కృష్ణవేణీ నదీమాతల్లికి పుణ్య నదీ హారతి కార్యక్రమం నిర్వహిస్తారు.
• ఈ సందర్భంగా పాతాళ గంగ వద్ద ఉన్న కృష్ణవేణి విగ్రహానికి పూజాధికాలు, సారె సమర్పణ.
• అదే రోజు సాయంత్రం జ్వాలాతోరణం కార్యక్రమ నిర్వహణ.

సాంస్కృతిక కార్యక్రమాలు

• ఆలయ నిత్య కళా వేదిక వద్ద ప్రతి రోజూ ధార్మిక, సాంస్కృతిక కార్యక్రమాల నిర్వహణ
• ఈ ఏడాది జాతీయ, అంతర్జాతీయ స్థాయిలో పేరొందిన కళాకారులతో ఆయా కార్యక్రమాల నిర్వహణ.
• లక్ష దీపోత్సవం, పుష్కరిణి హారతి రోజుల్లో పుష్కరిణి వద్ద ధార్మిక కార్యక్రమాల ఏర్పాటు.