విజయవాడ కనకదుర్గ ఆలయంలో ముమ్మరంగా దసరా ఏర్పాట్లు

దసరా పండుగ సమీపిస్తుండటంతో విజయవాడ కనకదుర్గమ్మ ఆలయంలో ఏర్పాట్లు ముమ్మరంగా సాగుతున్నాయి. దసరా ఉత్సవాలు ఈ నెల 26 నుంచి ప్రారంభమై.. అక్టోబర్ 5 వరకు 10 రోజుల పాటు...

ఎన్టీఆర్‌ జిల్లా : దసరా పండుగ సమీపిస్తుండటంతో విజయవాడ కనకదుర్గమ్మ ఆలయంలో ఏర్పాట్లు ముమ్మరంగా సాగుతున్నాయి. ఎండ, వాన నుంచి భక్తులకు రక్షణ కల్పించేందుకు పందిళ్లు వేస్తున్నారు. అన్నప్రసాదాలు, తాగునీరు, పారిశుద్ధ్యం, ఆరోగ్యం, రోడ్డు రవాణా ఏర్పాట్లపై అధికారులు తమ తమ విభాగాల్లో సమీక్షలు జరుపుతూ అందుకనుగుణంగా ఏర్పాట్లలో నిమగ్నమయ్యారు.

ఇంద్రకీలాద్రిపై కొలువుదీరిన కనకదుర్గమ్మ ఆలయంలో దసరా ఉత్సవాలు మొదలవడానికి ఇంకా వారం రోజులే ఉన్నాయి. దాంతో అధికారులు ఏర్పాట్లను వేగవంతం చేశారు. దేవాదాయ, మున్సిపల్‌‌, పోలీసు, వైద్య, ఆరోగ్య శాఖలతో పాటు ఆలయ అధికారులు గత 15 రోజులుగా ఏర్పాట్లలో నిమగ్నమయ్యారు. ఈ ఆలయంలో దసరా ఉత్సవాలు ఈ నెల 26 నుంచి ప్రారంభమై.. అక్టోబర్ 5 వరకు 10 రోజుల పాటు కొనసాగుతాయి. దాదాపు 15 లక్షల మంది భక్తులు ఆలయాన్ని సందర్శిస్తారని భావిస్తున్నారు.

క్యూ లైన్లు, టికెట్ కౌంటర్లు, ప్రసాదం కౌంటర్లు, ఇతర సౌకర్యాలు కల్పించడంతోపాటు ఇతర మౌలిక సదుపాయాలకు వివిధ శాఖలు సన్నాహాలు చేస్తున్నాయి. రూ.100, రూ.300 టికెట్ హోల్డర్లతో పాటు వీఐపీల కోసం ప్రత్యేక క్యూ లైన్లను ఏర్పాటు చేస్తున్నారు. మొత్తం ఆరు క్యూ లైన్లు ఏర్పాటుకానున్నాయి. వీటిలో రెండు ఉచిత దర్శనం, ఒకటి రూ.100 టికెట్, మరొకటి రూ.300 టికెట్‌దారులకు. వీఐపీలు రూ.500 టికెట్‌ కొనుగోలు చేసిన తర్వాతే దర్శనానికి అనుమతిస్తామని, ఇంద్రకీలాద్రిపై ఉన్న ఓఎం సెంటర్‌లో వారి కోసం ప్రత్యేకంగా ప్రత్యేక క్యూ లైన్‌ ఏర్పాటు చేస్తున్నట్లు అధికారులు తెలిపారు. భక్తుల కోసం 800 తాత్కాలిక షవర్లు, మరుగుదొడ్లు, 600 మందికి పైగా క్షురకులను అందుబాటులో ఉంచనున్నారు.