వాయుగుండంగా మాండూస్‌.. రాయలసీమ, తమిళనాడుకు ఆరెంజ్‌ అలర్ట్‌

Cyclone Mandous | మాండూస్‌ తుఫాను వాయుగుండంగా మారిందని, మరో 12 గంటల్లో బలహీనపడే అవకాశం ఉందని వాతావరణ శాఖ వెల్లడించింది. దీనిప్రభావంతో తమిళనాడు, ఆంధ్రప్రదేశ్‌, తెలంగాణ,

అమరావతి: మాండూస్‌ తుఫాను వాయుగుండంగా మారిందని, మరో 12 గంటల్లో బలహీనపడే అవకాశం ఉందని వాతావరణ శాఖ వెల్లడించింది. దీనిప్రభావంతో తమిళనాడు, ఆంధ్రప్రదేశ్‌, తెలంగాణ, పుదుచ్చేరిలో వర్షాలు కురిసే అవకాశం ఉందని తెలిపింది. దీంతో ఏపీలోని రాయలసీమ, తమిళనాడు, పుదుచ్చేరికి ఆరెంజ్‌ అలర్ట్‌ జారీచేసింది. తెలంగాణలో పలుచోట్ల రెండు రోజులు భారీ వర్షాలు కురిసే అవకాశం ఉందని వెల్లడించింది. ప్రజలు అప్రమత్తంగా ఉండాలని హెచ్చరించింది.

కాగా, తుఫాను ప్రభావంతో ఆంధ్రప్రదేశ్‌లో వాగులు, వంకలు పొంగిపొర్లుతున్నాయి. సోమశిల ప్రాజెక్టుకు క్రమంగా వరద ప్రవాహం పెరుగుతున్నది. దీంతో పెన్నా నదిలోకి 40 వేల క్యూసెక్కుల నీటిని వదిలేస్తున్నారు. కడప జిల్లాలో ప్రొద్దుటూరు, చాపారు, రాజుపాలెం, ఖాజీపేట, పెద్దముడియం మండలాల్లో వర్షం వల్ల పంటలు దెబ్బతిన్నాయి. చిత్తూరు జిల్లాలో 250 ఎకరాల్లో పంట నష్టం జరిగింది. 149 స్తంభాలు కూలిపోయాయి. లోతట్టు ప్రాంతాల్లో ఉన్న 388 మందిని అధికారులు పునరావాస కేంద్రాలకు తరలించారు.

తిరుపతి జిల్లాలో 3 వేల ఎకరాల్లో పంట నష్టం, 150 ఇండ్లు దెబ్బతిన్నాయని అధికారులు తెలిపారు. 360 విద్యుత్‌ స్తంభాలు దెబ్బతిన్నాయని వెల్లడించారు. తిరుపతితోపాటు నెల్లూరు జిల్లాలో భారీ వర్షపాతం నమోదయింది. దీంతో వెంకటగిరి, రావూరు మధ్య రాకపోకలు నిలిచిపోయాయి.