AP News | ముంచుకొస్తున్న ‘ముర‌సు’.. ఏపీ స‌ర్కారు అప్ర‌మ‌త్తం.. విద్యాసంస్థ‌ల‌కు సెల‌వు..!

AP News | ఆంధ్ర‌ప్ర‌దేశ్ తీరంవైపు ముర‌సు తుపాను ముంచుకొస్తున్న‌ది. దాంతో ఆంధ్రప్రదేశ్ ప్రభుత్వం అప్రమత్తమైంది. ముందు జాగ్ర‌త్త చ‌ర్య‌గా కోస్తాంధ్రలోని పలు జిల్లాల్లో విద్యాసంస్థలకు సెలవు ప్రకటించింది. మంగ‌ళ‌వారం స్కూళ్లు, కాలేజీలను మూసివేయాలని ఆయా జిల్లాల కలెక్టర్లు అధికారికంగా ఆదేశాలు జారీచేశారు.

AP News : ఆంధ్ర‌ప్ర‌దేశ్ తీరంవైపు ముర‌సు తుపాను ముంచుకొస్తున్న‌ది. దాంతో ఆంధ్రప్రదేశ్ ప్రభుత్వం అప్రమత్తమైంది. ముందు జాగ్ర‌త్త చ‌ర్య‌గా కోస్తాంధ్రలోని పలు జిల్లాల్లో విద్యాసంస్థలకు సెలవు ప్రకటించింది. మంగ‌ళ‌వారం స్కూళ్లు, కాలేజీలను మూసివేయాలని ఆయా జిల్లాల కలెక్టర్లు అధికారికంగా ఆదేశాలు జారీచేశారు. భారత వాతావరణ కేంద్రం అంచనాల ప్రకారం.. ‘మురసు’ తీవ్ర తుపానుగా బలపడి, నవంబర్ 2 అర్ధరాత్రి నుంచి న‌వంబ‌ర్ 3న‌ తెల్లవారుజాము వ‌ర‌కు నెల్లూరు–నర్సాపురం మధ్య ఒంగోలు సమీపంలో తీరందాటే అవకాశం ఉంది.

తీరం దాటే సమయంలో గంటకు 100 నుంచి 110 కిలోమీటర్ల వేగంతో పెనుగాలులు వీస్తాయని, గరిష్ఠంగా 120 కిలోమీటర్ల వేగానికి చేరవచ్చని హెచ్చరించింది. ఈ హెచ్చరికల నేపథ్యంలో కృష్ణా, ఎన్టీఆర్, గుంటూరు, పల్నాడు, బాపట్ల, ప్రకాశం, నెల్లూరు, ఏలూరు జిల్లాల్లోని అన్ని ప్రభుత్వ, ప్రైవేటు పాఠశాలలు, జూనియర్, డిగ్రీ కాలేజీలతోపాటు అంగన్‌వాడీ కేంద్రాలకు కూడా సెలవు వర్తిస్తుందని అధికారులు స్పష్టంచేశారు. తుపాను ప్రభావం ఎక్కువగా ఉండే అవకాశం ఉన్న కృష్ణా, గుంటూరు, బాపట్ల, ప్రకాశం, నెల్లూరు జిల్లాలకు వాతావరణ శాఖ రెడ్ అలర్ట్ జారీచేసింది.

విద్యార్థులు, ప్రజలు అప్రమత్తంగా ఉండాలని, అత్యవసరమైతే తప్ప ఇళ్ల నుంచి బయటకు రావద్దని అధికారులు సూచించారు. ఈ సెలవులను తదుపరి ప్రభుత్వ సెలవు రోజుల్లో భర్తీ చేయనున్నట్లు విద్యాశాఖ వర్గాలు తెలిపాయి. తుపాను పరిస్థితిని ఎప్పటికప్పుడు సమీక్షిస్తూ అధికార యంత్రాంగం సహాయక చర్యలకు సిద్ధంగా ఉన్న‌ది.