Visit:
BRS Party | బీఆర్ఎస్ పార్టీ ఆంధ్రప్రదేశ్‌ రాష్ట్ర అధ్యక్షుడు తోట చంద్రశేఖర్‌ సమక్షంలో పలు జిల్లాలకు చెందిన నేతలు పార్టీ తీర్థం స్వీకరించారు. ఈ సందర్భంగా ఈ సందర్భంగా తోట చంద్రశేఖర్‌ మాట్లాడుతూ వైసీపీ అధికారం చేపట్టిన నాటి నుంచి ఏపీ అభివృద్ధిలో ఆమడదూరంలో ఉందని దుయ్యబట్టారు. రాష్ట్రంలో యువతకు ఉపాధి అవకాశాలు లేక ఇతర ప్రాంతాలకు తరలి వెళ్లాల్సిన దుస్థితి ఏర్పడిందని ఆగ్రహం వ్యక్తం చేశారు. ఏపీ రాజధాని ఏదో చెప్పుకోలేని అయోమయ స్థితిలో రాష్ట్ర ప్రజానీకం ఉన్నారని ఆవేదన వ్యక్తం చేశారు. ఈ క్రమంలో ప్రజలు బీఆర్ఎస్ నాయకత్వాన్ని కోరుకుంటున్నారన్నారు.
ఏపీలో బీఆర్ఎస్ పార్టీ ప్రత్యామ్నాయ రాజకీయ శక్తిగా ఎదిగిందని చెప్పారు. రానున్న కాలంలో బీఆర్ఎస్ రాష్ట్ర రాజకీయాల్లో కీలక పాత్ర పోషించనుందని పేర్కొన్నారు. రాబోయే ఎన్నికల్లో బీఆర్ఎస్ ప్రభుత్వాన్ని ఏర్పాటు చేస్తామని ధీమా వ్యక్తం చేశారు. పార్టీలో చేరిన వారిలో పుంగనూరుకు చెందిన రమ్య యాదవ్, పవన్, విజయవాడకు చెందిన కంది ప్రశాంత్, శరత్ కే, మోహన్ బాబు, రఘు వీరాప్రసాద్ (బీసీ సంక్షేమ సంఘం జాతీయ అధ్యక్షుడు) ఉన్నారు. చీరాలకు చెందిన స్వప్నగౌడ్, అనంతపురం జిల్లాకు చెందిన సుధాకర్‌తో పాటు పలు జిల్లాలకు చెందిన నేతలు, కార్యకర్తలు బీఆర్‌ఎస్‌లో చేరగా.. తోట చంద్రశేఖర్‌ వారికి కండువాలు కప్పి పార్టీలోకి ఆహ్వానించారు. తెలంగాణ మోడల్ అభివృద్ధిని ఏపీ ప్రజలు కోరుకుంటున్నారని స్పష్టం చేశారు.
