Vegetables on rooftop | మిద్దెపై కూరగాయలు పండించాలనుకుంటున్నారా..? ఈ జాగ్రత్తలు పాటించండి..!

Vegetables on rooftop | తాజా కూరగాయలు పండించటంతోపాటు రసాయనాలు లేని ఆహారం సొంతంగా తయారుచేసుకొనే ఈ తరహా తోటలు పెంచుకోవటానికి పలువురు ఆసక్తి చూపుతున్నారు. మిద్దె తోటలు ఏర్పాటు చేసుకోవాలనుకొనేవారికి కొన్ని జాగ్రత్తలు, సూచనలు..

Vegetables on rooftop | కాంక్రీట్‌ జంగిల్‌లుగా మారుతున్న నగరాలు, పట్టణాల్లో అటు పచ్చదనానికి, ఆరోగ్యాన్ని పెంచే అద్భుత వ్యాపకంగా మిద్దె తోటలు ఉన్నాయి. తాజా కూరగాయలు పండించటంతోపాటు రసాయనాలు లేని ఆహారం సొంతంగా తయారుచేసుకొనే ఈ తరహా తోటలు పెంచుకోవటానికి పలువురు ఆసక్తి చూపుతున్నారు. 50 గజాల స్థలం ఉంటే ఒక కుటుంబానికి సరిపడా కూరగాయలు, పండ్లు, ఆకుకూరలను పండించుకోవచ్చ. మిద్దె తోటలు ఏర్పాటు చేసుకోవాలనుకొనేవారికి కొన్ని జాగ్రత్తలు, సూచనలు..

పక్కా ఇల్లు అయి ఉండి దృఢంగా ఉండాలి. భీంపైన మట్టి తొట్లు పెడితే వాటి బరువును తట్టుకొని నిలబడేలా ఉండాలి. భవనంపై సూర్యరశ్మి పుష్కలంగా ఉండేలా చూడాలి. తోటలు పెంచుకోవటానికి మిగతా అన్ని వనరులు అందుబాటులో ఉన్నా సూర్యరశ్మి అందకపోతే పంటలు మందకొడిగా ఎదుగుతాయి. పురుగులు, తెగుళ్లు ఎక్కువగా ఆశిస్తాయి. ఎక్కువకాలం శాఖీయ దశలోనే ఉండిపోతాయి. ముఖ్యంగా పండ్లతోటలు, పండ్లు, కాయలనిచ్చే కూరగాయల పెంపకానికి సూర్యరశ్మి పుష్కలంగా అందాలి. కుండీలు, తోట్లు, మట్టితోకూడిన నిర్మాణాల నుంచి వచ్చే మురుగునీరు ఎప్పటికప్పుడు బయటకు వెళ్లేందుకు అనువుగా ఉండాలి. ప్రధాన రహదారులు, ఫ్యాక్టరీలకు దగ్గరగా ఉన్న గృహాలపై దుమ్ము ఎక్కువగా పడుతుంది. దాంతో కిరణజన్యసంయోగ క్రియ తక్కువగా జరిగి మొక్కల పెరుగుదల తక్కువగా ఉంటుంది. అందువల్ల ఇలాంటి గృహాలపై తోటలను పెంచకపోవటం మేలు.

ఇలా చేస్తే..

• ప్లాస్టిక్‌ బ్యాగులు, వాడిపడేసిన కూలర్లు, బకెట్లు, గ్రోబ్యాగ్స్‌, పేయింట్‌ డబ్బాలు, డ్రమ్ములను తొట్లుగా మార్చుకోవచ్చు.
• ఇలాంటి వస్తువులు లేకుంటే మార్కెట్లో లభించే తొట్లను వినియోగించుకోవచ్చు.
• పెరటితోటలను పెంచుకోవాలంటే ముందుగా ఎర్రమట్టి 45 శాతం, ఆవుపేడ ఎరువు 40 శాతం, ఇసుక లేక కోకాపీట్‌ 10 శాతం, వేపపిండి 5 శాతం తీసుకొని వాటిని బాగా కలిపి తొట్లలో నింపుకోవాలంటున్నారు. అలా నింపుకున్న తర్వాత తొట్లలో విత్తనాలు వేసుకోవాలి.
• అయితే, ఎనిమిది గంటలపాటు ఎండతగిలే ప్రాంతాల్లో వంకాయ, టమాటా, మిర్చి, బెండ, బీరతోపాటు తీగజాతి కూరగాయలు వేసుకోవాలని, నీడలో ఆకుకూరలను పెంచుకుంటే మంచి దిగుబడి వస్తుంది.
• వంట చేసే సమయంలో మిగిలిపోయే కూరగాయల తొక్కలతో కంపోస్టు ఎరువును తయారుచేసుకోవచ్చు.
• ఆవుపేడ 10 కిలోలు, గో మూత్రం 10 లీటర్లు, బెల్లం 2 కేజీలు, శనగపిండి 2 కేజీలు ఒక డ్రమ్ములో వేసి నిండుగా నీళ్లుపోసి వారంపాటు అలా ఉంచిన తర్వాత వాడుకోవాలి.