Sugarcane cultivation | బిందు సేద్యంలో చెరకు సాగు చేపట్టి లాభాలు పొందండి

Sugarcane cultivation | చెరకు పైరు ఎదుగుదలకు ఉష్ణోగ్రతలు ప్రతిబంధకాలు. లాంటి పరిస్థితుల్లో బిందుసేద్య పద్ధతి ద్వారా భూమిలో తేమను కాపాడుకుంటూ చెరకు పైరును రక్షించుకోవడం ఎలాగో...

Sugarcane cultivation | చెరకు పైరు ఎదుగుదలకు ఉష్ణోగ్రతలు ప్రతిబంధకాలు. అధిక, తక్కువ ఉష్ణోగ్రతల్ని చెరకు పైరు తట్టుకోలేదు. లేత తోటలు ఇలాంటి ప్రతికూల వాతావరణ పరిస్థితుల్ని తట్టుకొని నిలబడడం చాలా కష్టం. జనవరి, ఫిబ్రవరి నెలల్లో వేసిన చెరకు తోటలు ప్రస్తుతం పిలకలు తొడిగి, పెరిగే దశలో ఉన్నాయి. జూన్ వరకూ ఉష్ణోగ్రతలు అత్యధిక స్థాయిలో ఉంటాయి. గాలిలో తేమ బాగా తక్కువగా ఉంటుంది. ఇలాంటి పరిస్థితుల్లో బిందుసేద్య పద్ధతి ద్వారా భూమిలో తేమను కాపాడుకుంటూ చెరకు పైరును రక్షించుకోవడం ఎలాగో తెలుసుకుందాం.

బిందుసేద్యం ద్వారా అనేక ప్రయోజనాలు పొందవచ్చు. సాధారణంగా ఎకరం విస్తీర్ణంలో చెరకు తోటకు అందించే నీటితో బిందుసేద్య పద్ధతిలో మూడు, నాలుగు ఎకరాల్లో సాగు చేయొచ్చు. వేసవిలో విద్యుత్ కోతలు సర్వసామాన్యమే అయినప్పటికీ బిందుసేద్య పద్ధతిలో చెరకు పంట సాగు చేస్తే ఆందోళన చెందాల్సిన అవసరం ఉండదు. ఎప్పుడు కరెంటు వచ్చినా అప్పుడు ఆటోమేటిక్ పరికరం సాయంతో ఏ ఇబ్బందీ లేకుండా తోటకు నీరు అందించే వీలుంటుంది. పైగా నీరు పెట్టేందుకు ప్రత్యేకంగా మనిషి అవసరం ఉండదు. బిందుసేద్య పద్ధతిలో పాములు, విషపురుగుల బారిన పడే ప్రమాదం ఉండదు.

ప్రయోజనాలు

• బిందుసేద్య పద్ధతి వల్ల కలుపు మొక్కల బెడద తగ్గుతుంది.
• సారవంతమైన మట్టి కొట్టుకుపోయే ప్రమాదం ఉండదు. తద్వారా భూసారాన్ని కాపాడుకోవచ్చు.
• భూమికి ఎక్కువ నీరు అందుతున్నదన్న ఆందోళన అవసరం లేదు.
• మొక్కలకు క్రమ పద్ధతిలో సరిపడినంత నీరు అందుతుంది. పైగా తోట అంతటికీ సమానంగా అందుతుంది.
• భూమి చౌడు బారదు. ధాతు లోపాలు తలెత్తవు. మొక్కలు ఆరోగ్యవంతంగా, ఏపుగా, క్రమ పద్ధతిలో పెరుగుతాయి.
• చీడపీడల తాకిడి తగ్గుతుంది. దీనివల్ల నాణ్యమైన పంటను పొందవచ్చు.
• రసం యొక్క నాణ్యత కూడా మంచిగా ఉంటుంది.
• కూలీలు, సస్యరక్షణపై పెట్టే ఖర్చు కలిసి వస్తుంది. దిగుబడి 40-50 శాతం పెరుగుతుంది.
• బిందుసేద్య పద్ధతిలో చెరకు తోటలో అంతర పంటలు కూడా సాగు చేసి అదనపు ఆదాయం పొందవచ్చు.
• ఎరువులు, సూక్ష్మ పోషకాల్ని మొక్కలకు సరైన మోతాదులో సమానంగా అందించవచ్చు. తద్వారా
• ఎరువులు, సూక్ష్మ పోషకాలపై పెట్టే అనవసరపు ఖర్చును నియంత్రించుకోవచ్చు.
• ఇసుక నేలలు, ఎగుడు దిగుడుగా ఉండే భూముల్ని చదును చేయాల్సిన అవసరం లేకుండానే తోట వేసుకోవచ్చు.

ప్రోత్సాహం-దిగుబడులు
చెరకు సాగులో బిందుసేద్యాన్ని ప్రోత్సహించేందుకు పలు చక్కెర కర్మాగారాలు రైతులకు సబ్సిడీలు అందిస్తున్నాయి. దీని కారణంగా బిందుసేద్యంపై రైతుల్లో ఆసక్తి పెరుగుతున్నది. ఇప్పటికే చాలా మంది రైతులు బిందుసేద్య పద్ధతిలో చెరకు సాగు చేసి మంచి ఫలితాలు పొందుతున్నారు. పశ్చిమ గోదావరి జిల్లా నల్లజర్ల మండలం పోతవరం గ్రామంలో ఎకరానికి సగటున 70 టన్నులు, పిలక తోటలో 69.4 టన్నుల దిగుబడి సాధించారు. తూర్పు గోదావరి జిల్లా గోకవరం మండలం కొత్తపల్లికి చెందిన రైతు ఒకరు ఎకరానికి సగటున 70 టన్నుల దిగుబడి పొందారు.

ఈ జాగ్రత్తలు తీసుకోవాలి

• జంట సాళ్ల పద్ధతిలో చెరకు ముచ్చెలు నాటినట్లయితే లేటరల్ పైపుల అవసరం తక్కువగా ఉంటుంది. దీనివల్ల డ్రిప్‌లపై పెట్టుబడి వ్యయం తగ్గుతుంది.
• సాళ్ల మధ్య నాలుగు లేదా ఐదు అడుగుల దూరాన్ని పాటించిన వారు లేదా సాధారణ పద్ధతిలో (సాళ్ల మధ్య మూడు అడుగుల దూరం) ముచ్చెలు నాటిన వారు కూడా బిందుసేద్య పద్ధతిని అనుసరించవచ్చు.
• బావులు, చెరువులు వంటి నీటి వనరుల ద్వారా చెరకు సాగు చేసే వారు ప్రతి 15 రోజులకు ఒకసారి సిస్టమ్ ఫిల్టర్లను శుభ్రపరచుకోవాలి.
• ఫర్టిగేషన్ (పైపుల ద్వారా పైరుకు ఎరువులు అందించడం) తర్వాత 10 నిమిషాల పాటు లేటరల్ పైపుల ద్వారా మంచినీటిని పారించాలి.
• పంటను కోసిన తర్వాత యాసిడ్ (33%) ట్రీట్‌మెంట్‌తో పైపుల్ని శుభ్రపరచాలి. మొక్కల దగ్గర పీడనాన్ని పరీక్షించాలి.