బాసర ట్రిపుల్‌ ఐటీ విద్యార్థులకు మురికినీరు.. చర్మవ్యాధుల భారినప‌డుతున్న‌ విద్యార్థులు

బాసర ట్రిపుల్‌ ఐటీలో విద్యార్థులను మురికినీటి సమస్య వెంటాడుతున్నది.

ముథోల్‌, నవంబర్‌ 10 : నిర్మల్‌ జిల్లా ముథోల్‌ మండలంలోని బాసర ట్రిపుల్‌ ఐటీలో విద్యార్థులను మురికినీటి సమస్య వెంటాడుతున్నది. ప్రస్తుతం పీయూసీ-1, పీయూసీ-2 విద్యార్థులు దాదాపు మూడు వేలకుపైగా ఉండగా.. వచ్చే మంగళవారం నుంచి ఈ-1 విద్యార్థులు రానుండడంతో సమస్య జఠిలం కానున్నది. గంగా, యమున వసతి గృహాల్లో కొన్ని రోజుల నుంచి కుళాయిల నుంచి మురికి నీరు వస్తున్నదని, విద్యార్థులు పలుమార్లు అధికారుల దృష్టికి తీసుకవెళ్లినా పట్టించుకోవడం లేదని విద్యార్థులు ఆరోపిస్తున్నారు.

ఈ నీటిని వాడడం వల్ల ఇన్‌ఫెక్షన్‌తో చర్మవ్యాధులు వస్తున్నాయని మండిపడుతున్నారు. ట్రిపుల్‌ ఐటీ సమస్యలు పరిష్కరించడంలో అధికారులు పూర్తిగా నిర్లక్ష్యం వహిస్తున్నారని, విద్యార్థుల తల్లిదండ్రులు మండిపడుతున్నారు. నీటి సమస్యను శాశ్వతంగా పరిష్కరించాలని డిమాండ్‌ చేస్తున్నారు. ప్రభుత్వం, ఉన్నతాధికారులు కల్పించుకొని విద్యార్థులకు నీటి సరఫరా సజావుగా జరిపే విధంగా చూడాలని కోరుతున్నారు.