ముప్పైల్లోనే ఆగమాగం

వయసులో ఉన్నవాళ్లు పోట్లగిత్తలా పోటుమీద ఉంటారని ఇప్పటి దాకా అందరి భావన! కానీ, వయసు పైబడిన వృద్ధ భారతీయులతో పోలిస్తే.. యంగిస్థాన్‌లు తీవ్ర ఒత్తిడికి గురవుతున్నట్టు ఓ నివేదికలో వెల్లడైంది. భారతీయ వెల్‌నెస్‌ సంస్థ యువర్‌దోస్త్‌ తాజా సర్వేలో ఇరవై నుంచి ముప్పయ్‌ ఏండ్ల మధ్యనున్న వాళ్లు ఎక్కువ ఒత్తిడికి లోనవుతున్నట్టు తేలింది.

వయసులో ఉన్నవాళ్లు పోట్లగిత్తలా పోటుమీద ఉంటారని ఇప్పటి దాకా అందరి భావన! కానీ, వయసు పైబడిన వృద్ధ భారతీయులతో పోలిస్తే.. యంగిస్థాన్‌లు తీవ్ర ఒత్తిడికి గురవుతున్నట్టు ఓ నివేదికలో వెల్లడైంది. భారతీయ వెల్‌నెస్‌ సంస్థ యువర్‌దోస్త్‌ తాజా సర్వేలో ఇరవై నుంచి ముప్పయ్‌ ఏండ్ల మధ్యనున్న వాళ్లు ఎక్కువ ఒత్తిడికి లోనవుతున్నట్టు తేలింది. అదే సమయంలో నలభై ఏండ్లు పైబడిన వాళ్లు కాస్త కులాసాగా ఉంటున్నారనీ నివేదిక పేర్కొన్నది. 5,000 మంది భారతీయ ఉద్యోగులపై జరిపిన సర్వే ఆధారంగా కొన్ని విషయాలను తేటతెల్లం చేసింది. యువర్‌దోస్త్‌ నివేదిక ప్రకారం వర్క్‌ఫ్రమ్‌ హోమ్‌, పనివేళలు, భవిష్యత్తుపై బెంగ కారణంగా 21 నుంచి 30 ఏండ్ల మధ్య వయసు ఉన్నవాళ్లు ఎక్కువగా ఆందోళన చెందుతున్నారట. అదే సమయంలో 31 నుంచి 40 ఏండ్ల మధ్య ఉన్నవాళ్లూ స్ట్రెస్‌గానే ఉంటున్నారట. నలభై దాటిన వాళ్లు కాస్త రిలాక్స్‌డ్‌గా ఉండటానికి కారణం.. ఆ వయసుకు జీవితంపై స్పష్టమైన అవగాహన రావడమే అంటున్నారు సర్వేకారులు. అధిక ఒత్తిడికి గురవుతున్నవారిలో పురుషుల కన్నా స్త్రీలు ఎక్కువ శాతం ఉంటున్నారు. సర్వేలో పాల్గొన్న వారిలో 72 శాతం మంది మహిళలు తాము మానసిక ఆందోళన చెందుతున్నామని పేర్కొన్నారు. పని, కుటుంబ జీవితం ఈ రెండిటి మధ్య సమతుల్యత కోల్పోవడం వల్లే ఈ తరం తీవ్ర ఒత్తిడికి గురవుతున్నదని నిపుణులు చెబుతున్నారు. వారి జీవితంలో సమస్యలను గుర్తించడంలోనూ విఫలమవుతున్నారని అంటున్నారు. అదే సమయంలో లేని సమస్యను ఊహించుకొని తగిన పరిష్కారం కోసం వెతుకుతున్నారని విశ్లేషిస్తున్నారు. ఫలితంగా వ్యక్తిగత జీవితంలో సంతృప్తిని కోల్పోతున్నారని చెబుతున్నారు.