నల్ల మచ్చలకు తువాలు మంత్రం

ముఖంపై నల్లమచ్చలు పోగొట్టేందుకు రకరకాల ప్రయత్నాలు చేస్తుంటారు. స్క్రబింగ్‌, పీలింగ్‌ అంటూ మార్కెట్లోకి వచ్చిన ప్రతి ప్రొడక్ట్‌తో ప్రయోగాలు చేస్తుంటారు. అయితే ఈ నల్లమచ్చలను సహజంగా, కేవలం మెత్తటి తువాలుతో దూరం చేసుకోవచ్చు.

ముఖంపై నల్లమచ్చలు పోగొట్టేందుకు రకరకాల ప్రయత్నాలు చేస్తుంటారు. స్క్రబింగ్‌, పీలింగ్‌ అంటూ మార్కెట్లోకి వచ్చిన ప్రతి ప్రొడక్ట్‌తో ప్రయోగాలు చేస్తుంటారు. అయితే ఈ నల్లమచ్చలను సహజంగా, కేవలం మెత్తటి తువాలుతో దూరం చేసుకోవచ్చు. సాధారణంగా ముక్కు, గదవ, నుదురు భాగాల్లో ఈ నల్లమచ్చలు ఎక్కువగా కనిపిస్తాయి. చర్మపు రంధ్రాల్లో నూనె (సీబమ్‌), మృత కణాలు, దుమ్ము ధూళి చేరడం వల్ల అవి మూసుకుపోతాయి. దాంతో అక్కడ నల్ల మచ్చలు ఏర్పడతాయి.

మరి వీటిని తువాలుతో ఎలా తగ్గించుకోవాలంటే..

• ముందుగా ముఖాన్ని మైల్డ్‌ క్లెన్సర్‌తో శుభ్రం చేసుకోవాలి. దానివల్ల ముఖంపై ఉండే మేకప్‌, సన్‌ స్క్రీన్‌, కాలుష్య కారకాలు లాంటివి తొలగిపోతాయి.
• శుభ్రంగా ఉతికిన తువాలును గోరువెచ్చని నీళ్లలో నానబెట్టాలి. ఆ తర్వాత నీళ్లు కొద్దిగా పిండేసి.. తువాలును ముఖంపై పర్చుకోవాaలి. రెండు నిమిషాలు అలాగే ఉంచి తీసేయాలి. కావాలంటే ఆ నీళ్లలో మూడు చుక్కల టీ ట్రీ ఆయిల్‌ గానీ, లావెండర్‌ ఆయిల్‌ గానీ వేసుకోవచ్చు.
• అప్పటికే ముఖంపై చర్మం వేడిగా, మృదువుగా అనిపిస్తుంది. అప్పుడు అదే తువాలుతో నల్ల మచ్చలు ఉన్న చోట వృత్తాకారంలో మర్దనా చేయాలి. మరీ గట్టిగా కాకుండా నిదానంగా రుద్దాలి. దీనివల్ల స్వేద రంధ్రాల్లోని మృత కణాలు, నూనె, దుమ్ము బయటికి వచ్చేస్తాయి.
• తువాలుతో రుద్దుకున్నాక, చల్లటి నీళ్లతో ముఖాన్ని శుభ్రం చేసుకోవాలి. దానివల్ల చర్మ రంధ్రాలు శుభ్రమై మూసుకుపోతాయి.
• చివరిగా ముఖానికి రోజువారీ మాయిశ్చరైజర్‌ రాసుకుంటే సరిపోతుంది. దానివల్ల చర్మం హైడ్రేట్‌ అవుతుంది. ఇలా తువాలు చిట్కాను వారానికి రెండు మూడుసార్లు చేస్తే తక్కువ సమయంలోనే నల్లమచ్చలు దూరమవుతాయి.