మీన.. పేదింటి కోయిల. నాన్న వేలు పట్టుకొని నడిచే అదృష్టం చిన్నప్పుడే కోల్పోయింది. కుటుంబ బాధ్యతలో అమ్మ ఆపేసినపాటను అందిపుచ్చుకుంది. పాటతో పాటే పెరిగింది. జానపదాన్ని భుజాన ఎత్తుకొని ఊరూరా తిరిగింది. ఆ పాటే తననిప్పుడు ఆకాశానికి ఎత్తుకుంది! పేరు తీసుకొచ్చిన పల్లె పాటను కీర్తిస్తూ జానపదాన్ని బతికించే ప్రయత్నం చేస్తున్న ఎములొల్ల మీనాగౌడ్ పాటల ముచ్చట!
మాది మెదక్ జిల్లా పెద్ద శంకరంపేట్. మా నాయిన నా చిన్నతనంలోనే చనిపోయిండు. ముగ్గురు ఆడపిల్లలం, ఒక అన్న. చాలా పేదరికం. పెద్దదిక్కు లేని ఇంటిని జనాలు ఎట్లా చూస్తరో తెలుసు కదా? అందుకే మా నలుగురినీ తీసుకొని అమ్మమ్మ వాళ్లింటికి వచ్చింది అమ్మ. మొక్కవోని ఆత్మైస్థెర్యంతో మమ్మల్ని పెంచి పెద్దచేసి చదివించింది. పాట నాకు అమ్మ నుంచి వారసత్వంగా వచ్చింది. అమ్మది అద్భుతమైన గొంతు. జానపదం, బతుకమ్మ, సువ్వి పాటలు పాడుతది. నా పాటల ప్రస్థానం చాలా గమ్మత్తుగా మొదలైంది. మా మామయ్య వాళ్ల పాప నేను పాట పాడితేనే నిద్రపోతుండె. అదే పాటను వేరేవాళ్లు పాడినా పడుకునేది కాదు. అట్లా రోజూ ‘వటపత్ర శాయికి వరహాల లాలీ’ పాడేదాన్ని. అప్పుడు నాకు ఆరేడేండ్ల వయసు కావచ్చు. నా గొంతు వాడకట్టంతా వినిపించేది. ‘ఆ పొల్ల సూడుర్రుల్లా పెద్ద మనుషుల్లెక్క ఎంత ముద్దుగ పాడుతుందో’ అని మెచ్చుకునేటోళ్లు. అట్లా నాకు తెల్వకుంటనే పాటకు దగ్గరైన.
సాయిలన్న సాయం
‘నేను పాటలు నేర్చుకుంటనే!’ అంటే, ‘నేర్చుకోగానీ చదువును లాపర్వా చేయకు’ అని అమ్మ మద్దతు ఇచ్చింది. స్కూల్లో ఏ కాంపిటీషన్ ఉన్నా పాట వినిపిస్తుండేదాన్ని. మామిడి సాయిలన్న మంచి పేరున్న కళాకారుడు. నా ప్రతిభ చూసిండంట. స్కూల్కి వచ్చి ‘బాగా పాడుతున్నవ్? ఇంకా నేర్చుకోవాలె, మంచి పేరు తెచ్చుకోవాలె. మాకొక టీమ్ ఉంది. దాంట్లో జాయిన్ అవ్వు. ప్రోగ్రామ్స్లో పాడే అవకాశం ఉంటది’ అన్నడు. హఠాత్తుగా అడిగే సరికి ఏం చెప్పాల్నో అర్థంకాలేదు. ఆలోచించుకున్నా. ‘పాటే నా కెరీర్ అనుకున్నప్పుడు ఈ భయాలన్నీ ఎందుకని ధైర్యం తెచ్చుకొని ఓకే చెప్పినా. ఇప్పటికీ ఆ బృందంతోనే ప్రయాణిస్తున్నా.
రాత మార్చిన పాట
ఓ సారి పాట రికార్డింగ్ పనిమీద స్టూడియోకి వెళ్లినప్పుడు జడల రమేశన్న పరిచయం అయ్యిండు. నా పాట తీరును చూసి ‘మస్తు పాడుతున్నవ్రా’ అని మెచ్చుకున్నడు. ‘ఒక పాట అప్పజెప్తా పాడుతవా మరి’ అని అడిగిండు. ‘సరే’నని చెప్పిన. దుబాయ్ పోయిన తన అన్న గురించి రాఖీ పండుగ రోజున చెల్లె పాడుకునే పాట అది. ఐతే.. ఆ మల్లతెల్లారే రాఖీ పండుగ. అంటే అప్పటికప్పుడే పాడాలన్నమాట. ఎట్లొస్తదో ఏమో అనుకొని.. ‘అన్నా! టైం లేదుగా. కనీసం ఒకట్రెండు సార్లయినా పాటను చూసుకోవాలె కదా? మీరు అనుకున్నట్లు రాకపోతే మనకే ప్రాబ్లమైతది’ అని చెప్పేసిన. ‘పాట మంచిగ రాకపోవడానికి చాన్సే లేదు. ఇది చాలా గొప్ప సందేశం ఉన్న పాట. మాకే కాదు, నీ కెరీర్కు కూడా ఉపయోగపడుతది. ఆ గ్యారెంటీ మేమిస్తున్నం’ అని అవగాహన కల్పించిండ్రు. అంత మంచి పాటను ఎందుకు వదులుకోవాలె? అనిపించింది. సరే అన్నా. మనసుపెట్టి పాడిన. ఒక్కరోజులో పాట పూర్తయ్యింది. రాఖీ పండుగ నాడు రిలీజ్ చేసిండ్రు. మూడ్రోజుల్లోనే లక్ష వ్యూస్ వచ్చినయి. ‘రంగు మెరుపుతో వచ్చె రాఖీల పండుగ.. దూరదేశంబోయిన నా అన్న చంద్రుడా.. రాకిట్ల పున్నానికీ వస్తవని వాకిట్ల నిలుసున్నరో నా అన్న’ అంటూ సాగే ఆ పాట ఎవర్గ్రీన్. ఈ ఒక్కపాటలో ఎన్నో నేపథ్యాలు, సందర్భాలు మన కండ్లముందు కనిపిస్తయి. పండుగ ఉద్దేశం, తోబుట్టువుల బంధం, వలస జీవుల గోసలు, పేదరికం కమ్మేసిన మంచి మనసులు ఈ పాట ద్వారా గుండెకు తాకుతయి.
అమ్మకు ఆసరా
‘రాఖీ పాట’ నా కెరీర్ను మలుపుతిప్పింది. దాని తర్వాత జడల రమేశన్ననే ‘అది ఇదీ తెమ్మంటవ్ ఓ మొగుడా’ పాట పాడే అవకాశం ఇచ్చిండు. దాని తర్వాత ఎన్నో ఆఫర్లు వచ్చినయి. తెలంగాణ ఉద్యమంలో కూడా నా గొంతు వినిపించిన. యూట్యూబ్లో 40 పాటల దాకా పాడిన. అంతలోనే, ఇద్దరు అక్కల పెండ్లీలు అయిపోయినయి. ‘నువ్వు కూడా చేసుకుంటే నా బరువు బాధ్యత తీరుతుంది బిడ్డా’ అనేది అమ్మ. మాకోసం ఎన్ని కష్టాలు పడింది అమ్మ? ఇప్పుడు ఎవరంతట వాళ్లం పెండ్లిలు చేసుకొని అత్తగారింటికి వెళ్లిపోతే ఆమె పరిస్థితి ఏంకావాలె? అందుకే ‘నీ కష్టాలన్నీ తీర్చినంకనే నేను పెండ్లి చేసుకుంటా’ అని చెప్పిన. నాకు గుర్తున్నప్పటి నుంచీ మాకు సొంత ఇల్లు లేదు. కనీసం అమ్మకు ఒక ఇల్లయినా కట్టివ్వాలన్నది నా ఆలోచన. అందుకే స్టేజీ ప్రోగ్రామ్లు, యూట్యూబ్ పాటలకు తోడు బ్యుటీషియన్ కోర్సు చేసిన. ఖాళీగా ఉన్నప్పుడు కుట్టుపని చేస్తా. వీటన్నిటితో వచ్చిన డబ్బుతో ఇల్లు కట్టించిన. తనకంటూ ఓ ఆదాయ మార్గం ఉండాలని కిరాణా షాప్ పెట్టించిన. ప్రస్తుతం పాటను ప్రపంచ స్థాయికి తీసుకెళ్లడానికి కృషి చేస్తున్నా. పల్లె జానపదాలు సేకరిస్తున్నా. తాజాగా ‘వచ్చెపోయె దారిలోనా రా మామీడి సాయిలు’ పాట పాడిన. మంచి
ఆదరణ లభిస్తున్నది. అయినా, నాకంటూ బ్రేక్ వచ్చే సాంగ్ ఇంకా రాలేదని అనుకుంటున్నా. ఈ స్థాయిదాకా రావడం కూడా గొప్పగానే భావిస్తున్నా. సినిమాలకు అవకాశం వస్తే నా టాలెంట్ నిరూపించుకుంటా.