Vinayaka Chavithi | గణపయ్యతో సినిమాకు ఉన్న అనుబంధం ఏమిటో తెలుసా..?

సిద్ధి.. బుద్ధి.. ఈ రెండూ ఉన్నచోటే విజయంఉంటుంది. సిద్ధి ఉండి బుద్ధి లేకపోయినా.. బుద్ధి ఉండి సిద్ధి లేకపోయినా విఘ్నాలకు దారిచ్చినట్టే. ఇక అడుగడుగునా అవాంతరాలు.వాటిని అధిగమించేలోపే జరగాల్సిన డ్యామేజ్‌ జరిగిపోతుంది. ఈ పరిస్థితులు ప్రతిరంగంలోనూ ఉంటాయి. సినిమారంగంలో కాస్తంత ఎక్కువగా ఉంటాయి.కళాత్మక రంగం.. పైగా సృజనతో కూడిన వ్యాపారం.

సిద్ధి.. బుద్ధి.. ఈ రెండూ ఉన్నచోటే విజయంఉంటుంది. సిద్ధి ఉండి బుద్ధి లేకపోయినా.. బుద్ధి ఉండి సిద్ధి లేకపోయినా విఘ్నాలకు దారిచ్చినట్టే. ఇక అడుగడుగునా అవాంతరాలు.వాటిని అధిగమించేలోపే జరగాల్సిన డ్యామేజ్‌ జరిగిపోతుంది. ఈ పరిస్థితులు ప్రతిరంగంలోనూ ఉంటాయి. సినిమారంగంలో కాస్తంత ఎక్కువగా ఉంటాయి.కళాత్మక రంగం.. పైగా సృజనతో కూడిన వ్యాపారం. బెడిసికొడితే నిర్మాత గతి అధోగతే. బహుశా అందుకే అనుకుంటా.. సినిమావాళ్లకు భక్తి ఎక్కువ. ప్రారంభోత్సవాల్లో దేవుళ్ల పటాలకు తెగ కొబ్బరికాయలు కొట్టేస్తుంటారు. ముఖ్యంగా గణపయ్యకి. ఎందుకంటే.. ఆ విఘ్నాల పోర్టుఫోలియో ఆయనదేగదా! ఈ వినాయక చవితి సందర్భంగా అసలు గణపయ్యతో సినిమాకున్న అనుబంధంఏంటి? అనేది కాసేపు చర్చించుకుందాం.

పెద్దగా సాంకేతికతలేని తొలినాళ్లలో తెరపై వినాయకుడిగా కొందరు కనిపించినా, వాళ్లు జనాలకంత రిజిస్టర్‌ కాలేదు. గణపయ్య కథతో వచ్చి అఖండ విజయాన్ని చూసిన తొలి సినిమా ఎన్టీయార్‌ ‘వినాయకచవితి’ (1957). ప్రఖ్యాత సినీ రచయిత సముద్రాల సీనియర్‌ ఈ సినిమాకు దర్శకుడు. ‘మాయాబజార్‌’ తర్వాత ఎన్టీయార్‌ కృష్ణుడిగా చేసిన సినిమా ఇది. అలాగే అపర సత్యభామగా పేరుగాంచిన జమున తొలిసారి సత్యభామగా కనిపించింది కూడా ఇందులోనే. వినాయక జననం, గజముఖుడిగా వినాయకుడు మారటం, విఘ్నాధిపతి పట్టాభిషేకం, చంద్రుడి గర్వభంగం, శమంతకోపాఖ్యానం.. ఇవన్నీ ఇందులో ఉంటాయ్‌. ఓ విధంగా ఈ సినిమా చూస్తే ‘వినాయక వ్రతకల్పం’ చదివినట్టే.

ఆ పుస్తకాన్నే సినిమాగా తీసేశారు సముద్రాల. ‘వినాయకచవితి’ సినిమా విషయంలో ప్రత్యేకంగా స్మరించుకోవాల్సిన నటుడు ‘బొడ్డపాటి కృష్ణారావు’. ఈ పేరు చాలామందికి తెలియకపోవచ్చు. కానీ ‘మాయాబజార్‌’లో ‘శంఖుతీర్థులు’ అంటే మాత్రం ఠపీమని గుర్తుపట్టేస్తారు. ‘శంఖుతీర్థులవారంటే.. కూలంకష ప్రజ్ఞావంతులు..’ అని కౌరవుల పక్షానుండే శాస్త్రి (వంగర) శ్లాఘిస్తారు చూశారా.. ఆయనే ఈ బొడ్డపాటి. ఇంతకీ ఈ బొడ్డపాటికీ ‘వినాయకచవితి’ సినిమాకీ సంబంధం ఏంటా అనుకుంటున్నారా?. ఈ సినిమాలో వినాయకుడిగా నటించింది ఆయనే. స్వతహాగా పొట్టివాడు, దానికితోడు బొజ్జవాడు, వీటికితోడు స్వచ్ఛమైన ఉచ్చారణ. ఈ అర్హతలే ఆయనకు వినాయకుని పాత్ర దక్కేలా చేశాయ్‌. “ ‘వినాయకచవితి’ సినిమాలో హీరో నేనే..” అని చనిపోయే వరకూ చెప్పుకొనేవారు బొడ్డపాటి. నిజానిక్కూడా విఘ్నపతిగా అద్భుతంగా నటించారాయన. ఇక ఇందులో ఘంటసాల పాడిన ‘వాతాపి గణపతింభజే’ పాట నేటికీ ప్రజాదరణ పొందుతూనే ఉంది. తెలుగు నేలపై ఈ పాట వినిపించని వినాయకుని పందిరే ఉండదు.

తమిళంలోనే ఎక్కువ

వినాయకస్వామి నేపథ్యంలో సినిమాలు తెలుగు కంటే తమిళంలో ఎక్కువ వచ్చాయని చెప్పాలి. అక్కడ శైవం ఎక్కువగా భాసిల్లడం కూడా అందుకు కారణం కావొచ్చు. ఇక తెలుగులో వచ్చిన మరో విఘ్నేశ్వరుని సినిమా ‘వినాయక విజయం’ (1979). కమలాకర కామేశ్వర్రావ్‌ దర్శకత్వం వహించిన ఈ సినిమా కూడా మంచి విజయాన్ని అందుకుంది. ఇందులో శివపార్వతులుగా కృష్ణంరాజు, వాణిశ్రీ నటించారు. ఎన్టీయార్‌ ‘వినాయక చవితి’లోని అంశాలన్నిటినీ స్పృశిస్తూనే.. గజాసుర, మూషికాసుర సంహారాలను కూడా జనరంజకంగా చూపించారు దర్శకుడు. అలాగే, చిరకాలం నిలిచిపోయే సుస్వరాలను ఎస్‌.రాజేశ్వరరావు అందించారు. ఇందులోని ‘ఎవరవయ్యా.. ఎవరవయ్యా’ పాట ఇప్పటికీ హిట్టే.

బలమైన నమ్మకం

వినాయకుడిపై ఒక పాటైనా ఉంటే సినిమాకు మేలు జరుగుతుందని దర్శక, నిర్మాతల నమ్మకం. అలా పెట్టిన పాటలన్నీ దాదాపు హిట్లే. అందులో ముఖ్యంగా చెప్పుకోవాల్సిన పాట ‘కూలీనంబర్‌ 1’ సినిమాలోని ‘దండాలయ్యా ఉండ్రాలయ్యా..’ పాట. సిరివెన్నెల సీతారామశాస్త్రి రాయగా, ఇళయరాజా స్వరపరిచిన ఈ పాట తెలుగునాట నేటికీ మారుమోగుతూనే ఉంది. అలాగే రజనీకాంత్‌ ‘బాషా’, చిరంజీవి ‘జై చిరంజీవ’, మహేశ్‌బాబు ‘పోకిరి’.. ఇలా చాలా సినిమాల్లో వినాయకుడి పాటలు చూశాం. త్వరలో రానున్న బాలకృష్ణ ‘భగవంత్‌ కేసరి’లో కూడా వినాయకుడి విగ్రహం నేపథ్యంలో పాట పెట్టాడు దర్శకుడు అనిల్‌ రావిపూడి. ఈ పాట ప్రస్తుతం జన బాహుళ్యంలో బాగానే వినిపిస్తున్నది.

మొత్తంగా వెండితెరపై వినాయక వైభవం నేటికీ ఈ రీతిగా విలసిల్లుతూనే ఉన్నది. అదేంటో విజయాల శాతం కూడా అలాగే ఉంది. అంతా విఘ్నపతి లీల! చివరిగా చెప్పొచ్చేదేంటంటే.. ఏడాది అంతా తలుచుకోకపోయినా.. ఏదో ఒక్కరోజు కాస్తంత పత్రి, కూసంత పుష్పం.. ఓ గిన్నెడు పాయసం.. మూడు కుడుములు.. ఆరు ఉండ్రాళ్లూ లాంఛనాలుగా చదివించేస్తే, మళ్లీ పండగొచ్చేదాకా ఢోకాలేకుండా చూసుకుంటాడనేది జనం పిచ్చి నమ్మకం. కానీ, నిజానికి ఆయన కోరుకునేది.. మంచితనం. మానవత్వం, ప్రేమతత్వం. ఇవి ఉంటే.. మనం ఏం సమర్పించకపోయినా సిద్ధినీ బుద్ధినీ అనుగ్రహించేస్తాడు.

– నరసింహా బుర్రా