జుట్టుకు జట్టు!

తెల్లజుట్టు.. యువతరంలో సర్వసాధారణ సమస్యగా మారిపోయింది. నిండా ముప్పయ్‌ ఏండ్లు నిండకుండానే.. నెత్తి నెరిసిపోయి కనిపిస్తున్నది. జీవనశైలి లోపాలతోపాటు ఒత్తిడి, నిద్రలేమి, జంక్‌ఫుడ్‌.. ఇలా అనేక కారణాలతో జుట్టు తెల్లబడుతున్నది.

తెల్లజుట్టు.. యువతరంలో సర్వసాధారణ సమస్యగా మారిపోయింది. నిండా ముప్పయ్‌ ఏండ్లు నిండకుండానే.. నెత్తి నెరిసిపోయి కనిపిస్తున్నది. జీవనశైలి లోపాలతోపాటు ఒత్తిడి, నిద్రలేమి, జంక్‌ఫుడ్‌.. ఇలా అనేక కారణాలతో జుట్టు తెల్లబడుతున్నది. ముఖ్యంగా.. ‘మెలనిన్‌ లోపం’ వల్ల చిన్న వయసులోనే వెంట్రుకల రంగు మారుతున్నదని నిపుణులు చెబుతున్నారు. శరీరంలో తగినంత ‘మెలనిన్‌’ ఉత్పత్తి కావాలంటే.. ఎలాంటి ఆహారం తీసుకోవాలో సూచిస్తున్నారు.

• శరీరంలో విటమిన్లు లోపిస్తే.. మెలనిన్‌ కూడా తగ్గుతుంది. కాబట్టి, ఆహారంలో అన్నిరకాల పోషకాలు ఉండేలా చూసుకోవాలి. జుట్టులో మెలనిన్‌ ఉత్పత్తిని పెంచడంలో విటమిన్‌ ఎ, సితోపాటు బి12 ముందుంటాయి. నారింజ, ద్రాక్ష, పైనాపిల్‌, పుచ్చకాయ వంటి పండ్లతో మెలనిన్‌ ఉత్పత్తి పెరుగుతుంది. మటన్‌, చికెన్‌ లివర్‌, చేపలు, కోడి గుడ్లు.. శాకాహారులైతే బంగాళాదుంపలు, క్యారెట్లు, బీన్స్‌ వంటి కూరగాయలు ఎక్కువగా తినాలి.
• జుట్టు తెల్లబడటానికి మరో కారణం.. ఐరన్‌, కాపర్‌ లోపం. ఈ రెండు ఖనిజాలు మెలనిన్‌ ఉత్పత్తిని ప్రోత్సహిస్తాయని పలు పరిశోధనలు తేల్చాయి. డార్క్‌ గ్రీన్‌ వెజిటెబుల్స్‌, బాదం, పల్లీలు, డార్క్‌ చాక్లెట్లు, కాయధాన్యాలలో పుష్కలమైన ఐరన్‌ లభిస్తుంది.
• ఫ్రీ రాడికల్స్‌ ప్రభావాల నుంచి యాంటి ఆక్సిడెంట్లు శరీరాన్ని రక్షిస్తాయి. ఇవి జుట్టులో మెలనిన్‌ ఉత్పత్తిని కూడా పెంచుతాయి. వీటికోసం డార్క్‌ చాక్లెట్‌, బీన్స్‌, ఆకుకూరలు, బ్రకోలీ, క్యారెట్‌, గుమ్మడికాయ గింజలను ఆహారంలో భాగం చేసుకోవాలి.
• జుట్టుతోపాటు ఆరోగ్యానికి మేలు చేసే ఉసిరి.. మెలనిన్‌ ఉత్పత్తిలోనూ సాయపడుతుంది. ఇందులోని యాంటి ఆక్సిడెంట్లు.. ఫ్రీ రాడికల్స్‌ను నియంత్రిస్తాయి. మెలనిన్‌ ఉత్పత్తిని ప్రోత్సహించి.. జుట్టు సహజరంగును కోల్పోకుండా కాపాడుతాయి. ఉసిరిని నేరుగా తీసుకోవడంతోపాటు ఉసిరి నూనె, ఉసిరితో చేసే హెయిర్‌ మాస్క్‌లతోనూ అనేక ప్రయోజనాలు పొందవచ్చు.
• గుడ్లు.. శరీరానికి కావాలసిన ప్రొటీన్‌ను అందిస్తాయి. ఇందులో లభించే విటమిన్‌ బి12 వంటి విటమిన్లు, ఇతర ఖనిజాలు.. మెలనిన్‌ ఉత్పత్తిని పెంచుతాయి. కోడిగుడ్లను నేరుగా తీసుకున్నా, ప్యాక్స్‌ రూపంలో వాడినా.. జుట్టు ఆరోగ్యం మెరుగుపడుతుంది. జుట్టు బలంగా, సిల్కీగా మారుతుంది.