వరంగల్, ఏప్రిల్ 21 : కొన్నేళ్ల కింద మూతపడ్డ మ్యూజికల్ గార్డెన్ ఇక సరికొత్తగా.. నగరవాసులకు వీనులవిందు చేయనున్నది. ఇందుకోసం కాకతీయ పట్టణాభివృద్ధి సంస్థ రూ.14.50 కోట్లు కేటాయించి అభివృద్ధి చేస్తోంది. వేగంగా పనులు జరుగుతుండగా, అధికార యంత్రాంగం పర్యవేక్షిస్తోంది. పిల్లల ఆట వస్తువులతో పాటు గార్డెన్ అంతా ఫుట్పాత్లు.. వాటి వెంట లైటింగ్ అమర్చుతున్నారు. మధ్య భాగాన కెఫటేరియా కోసం ప్రత్యేకంగా షెడ్ను నిర్మిస్తున్నారు. సందర్శకులకు వినసొంపైన సంగీతం అందించేందుకు ఫౌంటెయిన్ అందుబాటులోకి తేనున్నారు. మ్యూజికల్ గార్డెన్ను ఆనుకొని ఉన్న భద్రకాళీ చెరువు ఆందాలను వీక్షించేందుకు లేక్వ్యూ రెస్టారెంట్ను ఏర్పాటు చేసేందుకు సన్నాహాలు చేస్తున్నారు.
చారిత్రక వరంగల్ టూరిజం హబ్గా మారుతున్న తరుణంలో నగర నడిబొడ్డున ఉన్న కాకతీయ మ్యూజికల్ గార్డెన్ను సందర్శకులను ఆకట్టుకునేలా ముస్తాబు చేస్తున్నారు. కొన్ని సంవత్సరాలుగా మూతపడి ఉన్న మ్యూజికల్ గార్డెన్ను కొత్త అందాలతో నగరవాసుల ముందుకు తీసుకువచ్చేందుకు కాకతీయ పట్టణాభివృద్ధి సంస్థ అడుగులు వేస్తోంది. రూ. 14.50 కోట్లతో దీన్ని అభివృద్ధి చేస్తున్నారు. గార్డెన్లో గ్రీనరీ, ఫుట్పాత్లు, చిన్నారుల ఆట వస్తువుల ఏర్పాటు పనులు చకచకా సాగుతున్నాయి. సందర్శకులకు మరింత ఆహ్లాదం అందించేలా అధికారులు ప్రణాళికలు చేస్తున్నారు. మ్యూజికల్ గార్డెన్కు ఆనుకొని ఉన్న భద్రకాళీ చెరువు ఆందాలను కుటుంబంతో వీక్షిస్తూ హాయిగా గడిపేందుకు లేక్ వ్యూ రెస్టారెంట్ ఏర్పాటు చేయాలన్న ఆలోచనలు చేస్తున్నారు. అలాగే మ్యూజికల్ గార్డెన్కు వచ్చే సందర్శకులకు వీనుల విందైన సంగీతం అందించేందుకు ఫౌంటెయిన్ ఏర్పాటు చేయనున్నారు.
భద్రకాళీ చెరువు అందాలు వీక్షించేలా..
గార్డెన్ను ఆనుకొని ఉన్న భద్రకాళీ చెరువు అందాలను సందర్శకులు వీక్షించేలా ఏర్పాట్లు చేస్తు న్నారు. ఇందుకోసం లేక్ వ్యూ రెస్టారెంట్ ఏర్పాటు చేయాలన్న ఆలోచనలు చేస్తున్నారు. లేక్ అందాలు వీక్షిస్తూ రెస్టారెంట్లో విందు ఆరగించేలా ప్రణాళికలు చేస్తున్నారు. దీని కోసం హైదరాబాద్ నుంచి ఇద్దరు ఆర్కిటెక్ట్లు వచ్చి రెస్టారెంట్ను ఎక్కడ ఏర్పాటు చేయాలన్న దానిపై సూచనలు చేసినట్లు తెలిసింది. దశాబ్దానికి పైగా మ్యూజికల్ గార్డెన్ పేరు నుంచి మ్యూజికల్ పోయింది. అందులో ఫౌంటెయిన్ పనిచేయకపోవడంతో అధికారులు దానిని తొలగించారు. ప్రస్తుతం మ్యూజికల్ గార్డెన్లో వీనులవిందైన సంగీతం వినిపించే ఫౌంటెయిన్తో పాటు దానిలోంచి మిరుమిట్లు గొలిపే లేజర్ లైటింగ్ వచ్చేలా అధికారులు కసరత్తు చేస్తున్నారు. పర్యాటకం నుంచి సంపద సృష్టించుకోవాలన్న ఆలోచనలతో కుడా అధికారులు మ్యూజికల్ గార్డెన్లో సరికొత్త హంగులు కల్పించి సందర్శకులను ఆకట్టుకోవాలన్న లక్ష్యంతో అభివృద్ధికి ప్రణాళికలు వేస్తున్నారు.