వాగు పారక సాగు సాగక

కళ్ల ముందే ఎండుతున్న పంటలను చూసి అన్నదాతల గుండెలు పగులుతున్నాయి. వాటికి ప్రాణం పోసి బతికించుకునేందుకు నానాతంటాలు పడుతున్నారు. సాగునీళ్ల కోసం భగీరథ ప్రయత్నం చేస్తున్నారు.

• నీళ్లు లేక ఆకేరు వాగు వెలవెల.. ఎండుతున్న వరి
  ఎక్స్‌కవేటర్‌తో వాగులో గుంతలు.. గంటకు రూ.3వేలు ఖర్చు
  పంటను కాపాండేందుకు భగీరథ ప్రయత్నం
  తొమ్మిదేళ్లలో ఇంత కరువు చూడలేదంటున్న రైతులు
  పంటలు ఎండి.. గుండెలు పగిలి..

నర్సింహులపేట, మార్చి 9 : కళ్ల ముందే ఎండుతున్న పంటలను చూసి అన్నదాతల గుండెలు పగులుతున్నాయి. వాటికి ప్రాణం పోసి బతికించుకునేందుకు నానాతంటాలు పడుతున్నారు. సాగునీళ్ల కోసం భగీరథ ప్రయత్నం చేస్తున్నారు. నర్సింహులపేట మండలంలోని పలు గ్రామాల శివార్ల నుంచి పారే ఆకేరు వాగు ఈ సారి ఎండిపోయింది. చుక్క నీరు లేక వెలవెల బోతున్నది. వాగు ఆసరాగా చేసుకొని వేసిన యాసంగి వరి పంటలు నీళ్లు లేక ఎండిపోతుండగా, వాటిని కాపాడుకునేందుకు అరిగోస పడుతున్నారు. కౌసల్యదేవిపల్లి శివారులో వాగుపై నిర్మించిన చెక్‌డ్యాం పూర్తిగా ఎండిపోవడంతో వరి చివరి దశలో ఉన్న వరికి నీళ్లు అందించడానికి రైతులు ఇబ్బందిపడుతున్నారు. భవిష్యత్‌లో నీళ్లు వచ్చే పరిస్థితి లేకపోవడంతో వాగులో గంటకు రూ.3వేలు ఖర్చు చేసి ఎక్స్‌కవేటర్‌ సాయంతో గుంతలు తవ్విస్తున్నారు. తొమ్మిదేళ్ల కాలంలో ఇంతటి కరువు పరిస్థితిని చూడలేదని, ఇప్పటికైనా సంబంధిత అధికారులు, ప్రజాప్రతినిధులు చేతికొస్తున్న వరి పంట కాపాడేందుకు ఆకేరు వాగులోకి ఎస్సారెస్పీ జలాలను వదలాలని కోరుతున్నారు.

నీటి కోసం అరిగోస పడుతున్నాం
నాలుగు నెలల నుంచి వాగులో నీరు లేక చేతికొచ్చిన పంటలను కాపాడేందుకు అరిగోస పడుతున్నాం. నలుగురం కలిసి తలా కొంత వేసుకుని వాగులో గుంత తీయిస్తున్నాం. వాగులో ఉన్న తుమ్మచెట్టు కింద నీడకు కూర్చొని ఒక వాటకు గంట చొప్పున ముగ్గురం వరికి నీళ్లు పారిస్తున్నం. 10రోజుల వరకైనా వాగులోకి నీరొస్తే పంట బతుకుతుంది. లేకపోతే కష్టమే.
– ఎర్పుల శ్రీరాం, రైతు, కౌసల్యదేవిపల్లి

కూలికి పోయిన పైసలతో గుంత తీయిస్తున్నా..
ఎకరంపావు పొలంలో నీరు పారించేందుకు చాలా ఇబ్బంది పడుతున్నా. వాగులో గుంత తీసేందుకు మిరపకాయలు ఏరబోయిన కూలి పైసలు తెచ్చి ఇచ్చిన. తొమ్మిదేళ్లలో ఎప్పుడూ వాగు ఎండిపోలే. వరి పంట కోసం ఇప్పటికే రూ.25వేలు ఖర్చు చేసిన. తీరా పొట్ట దశకు వచ్చే సరికి నీళ్లు అందక ఎండిపోతున్నది. పొత్తు మోటర్‌ కావడంతో అందరం తలా రూ.3వేలు వేసుకుని జేసీబీతో గుంత తీయించినం. వాగులోకి నీళ్లు వచ్చే విధంగా చూడాలె. లేకుంటే మా పంటలు ఎండిపోతాయి.
– ఎర్పుల బీబమ్మ, కౌసల్యదేవిపల్లి