శుభ వాస్తు

అన్నదమ్ములు, అక్కచెల్లెళ్లు ఒక్కచోట నిర్మాణం చేసుకొని ఉండటం ఈ రోజుల్లో ఎంతో గొప్ప విషయం. కలిసి ఉండే తత్వంలోనే ఆయుష్షు అధికమవుతుంది. బలం పెరుగుతుంది. మెట్లు పడమరలోనే ఎందుకు కట్టాలి? తూర్పు-ఆగ్నేయంలో, పడమర-నైరుతిలో, ఉత్తర-వాయవ్యంలో, దక్షిణ-నైరుతిలో కూడా మెట్ల నిర్మాణం చేయవచ్చు.

ఇంటికి పడమర వైపు మెట్లు పెట్టి అన్నదమ్ములు మూడు అంతస్తుల నిర్మాణం చేసుకోవచ్చా? ఇందులో ఎవరు ఏ ఫ్ల్లోర్‌లో ఉండాలి?

– చంద్రం, ఇబ్రహీంపట్నం

అన్నదమ్ములు, అక్కచెల్లెళ్లు ఒక్కచోట నిర్మాణం చేసుకొని ఉండటం ఈ రోజుల్లో ఎంతో గొప్ప విషయం. కలిసి ఉండే తత్వంలోనే ఆయుష్షు అధికమవుతుంది. బలం పెరుగుతుంది. మెట్లు పడమరలోనే ఎందుకు కట్టాలి? తూర్పు-ఆగ్నేయంలో, పడమర-నైరుతిలో, ఉత్తర-వాయవ్యంలో, దక్షిణ-నైరుతిలో కూడా మెట్ల నిర్మాణం చేయవచ్చు. మీరు ఉండే వీధిని బట్టి మెట్లు, లిఫ్ట్‌ నిర్మాణం ప్లాన్‌ చేసుకోవచ్చు. పడమరనే కావాలనుకుంటే.. ఆ చోట స్థలం కట్‌ చేయాల్సి వస్తుంది. అప్పుడు ఇల్లు భాగంలో పశ్చిమవైపు కట్‌ అవుతుంది. ఆ కటింగ్‌ లోపలికి రాకుండా జాగ్రత్త పడాలి. తూర్పు, పడమరల పొడవును బట్టి దానిని నాలుగు భాగాలుగా విభజించి ఒక భాగం మాత్రం కట్‌ అయ్యేలా మెట్లు వేసుకోవచ్చు. అదేచోట లిఫ్ట్‌ కూడా పెట్టుకోవచ్చు. అన్నదమ్ముల్లో పెద్దవాడు మీదనే ఉండాలన్న ఆలోచనకు బదులు.. కింది నుంచి పైకి లెక్కించి పెద్దవాళ్లు కింద ఆపైన వరుసగా చిన్నవారి నివాసం ఉండాలి. మీ నిర్మాణానికి ప్రహరీని కట్టుకోవడం తప్పనిసరి.

పడక గదిలోని మంచం.. తలుపులకు ఎదురుగా వస్తే ఏమైనా దోషం అవుతుందా?

– దానం జానకమ్మ, ఆలేరు

ఇల్లు విస్తీర్ణం.. ఇక్కడ గమనించాల్సిన విషయం. తొమ్మిది అడుగుల వెడల్పు, తొమ్మిది అడుగుల పొడవు లేకుండా ఏ గదినీ నిర్మాణం చేయకూడదు. మాకు స్థలం లేదు, మేము పేదవాళ్లమనే అంశాలు వివరణకు రావు. ఆరోగ్యకరమైన భోజనం తినమని డాక్టర్‌ సూచిస్తే.. మా వద్ద డబ్బుల్లేవు, పేదవాళ్లమని చెబితే వైద్యశాస్త్రం ఒప్పుకోదు కదా! అలా మనకు అవసరమున్న కొలతలకంటే తక్కువ కొలతలున్న గదుల్లో ఉంటే వాటిని జైలు గదులంటారు.

మీరు గది కొలతలు సరిపడేలా ఇల్లు నిర్మించి ఉంటే.. తలుపులకు ఎదురుగా మంచం రాదుకదా. ద్వారాలకు ఎదురుగా మంచం రావడం వల్ల నడిచేవాళ్లకు ఇబ్బందిగా ఉంటుంది. తలుపు మూసి, తెరవాలంటే కూడా కష్టంగా మారుతుంది. మనం ఇంట్లో లేచినా, పడుకున్నా మన కాళ్లు బయటికి కనిపించకుండా ప్రైవసీని పాటించాలి. మీరుంటున్న గదిలో సజ్జలు, సెల్ఫులు ఉంటే వాటిని తొలగించి గదిని విశాలంగా మార్చుకోండి.

మేము కట్టబోయే షాపింగ్‌ కాంప్లెక్స్‌కు పడమర, దక్షిణం దిక్కులకు రోడ్డు ఉంది. వీటిలో మేము నిర్మాణం చేపట్టేందుకు ఏ రోడ్డు మంచిది?

– గూడెం రాజు, వెల్డండ

మీరు రోడ్ల గురించి ఇబ్బంది పడకండి. అక్కడ దిశ ఎలా ఉందో గమనించండి. ఇంటికైనా, వ్యాపార భవనాలకైనా స్థలం ఆటిట్యూడ్‌ అంచనా వేయడం ముఖ్యం. ఒక నిర్మాణం జరుగుతుంది అంటే.. మనం ఒక జీవితాన్ని కట్టబోతున్నామని మరువద్దు. అది మనం వాడుకోవచ్చు లేదా ఇతరులకు అద్దెకివ్వొచ్చు. ఇరువురికీ మంచి జరిగేలా ఉండాలి. మనకెప్పుడూ బరువు కాకూడదు.

వాణిజ్య నిర్మాణాలకు ఒకటికన్నా రెండు రోడ్లు ఉండటం ఎంతో అనుకూలం. మీరు పడమర వైపు షెట్టర్లు చేసుకొని వాడొచ్చు. ఎన్ని అంతస్తులు కడుతున్నారో.. దాన్ని దృష్టిలో ఉంచుకొని దక్షిణం-నైరుతిలో మెట్లు, తూర్పు-ఆగ్నేయంలో లిఫ్ట్‌ వచ్చేలా ప్లాన్‌ చేసుకోవాలి. వాటి నిర్మాణం మూలల్లో రాకుండా చూసుకోండి. మీది నైరుతి బ్లాక్‌ కాబట్టి ఈ జాగ్రత్త తప్పనిసరిగా పాటించాలి. కాంప్లెక్స్‌ నిర్మాణం హద్దు మీద కాకుండా ముందు నుంచే నిర్మించేలా ప్లాన్‌
చేసుకొని పని ప్రారంభించండి.

మా ఇంటికి ఆగ్నేయంలో పెద్ద గుండ్లు ఉన్నాయి. అవేమైనా చెడు చేస్తాయా?

– సుమిత్ర, ప్రగతి నగర్‌

అవును. కొన్ని ప్రదేశాలు చెట్లు, రాళ్లు, పుట్టలు, బండలు, గుండ్లతో నిండి ఉంటాయి. వాటిని తొలగించేందుకు ఆస్కారం లేకుండా ఇతరుల స్థలం మనకు ఆనుకొనే ఉంటుంది. వాళ్లు కూడా మనకోసం ఏ మాత్రం కూడా ఆలోచించరు. ఇలాంటి విషయంలోనే జాగ్రత్తలు అవసరం. మనస్థలంలో ఇల్లు కట్టేముందు దక్షిణం కాంపౌండ్‌ పూర్తి చేయాలి. అలాగే ఇంటిచుట్టూ ఖాళీ స్థలం ఎక్కువ వదలాలి.

కనీసం దక్షిణం దిక్కు ఆరు అడుగులు, ఉత్తరం వైపు ఎనిమిదిన్నర అడుగులు, పడమర కంటే తూర్పు వైపు ఎక్కువ స్థలం వదలాలి. ఇలా కొంత ప్రదక్షిణ స్థలం ఎక్కువ వదిలినప్పుడు వాటి ప్రభావం ఉండదు. అలాగే అవి శాశ్వతంగా ఉండవు కూడా. పక్కవాళ్లు ఇల్లు కట్టేదాక మాత్రమే అవి ఉంటాయి కాబట్టి వాటివల్ల భయంలేదు. మీరు గ్రౌండ్‌ఫ్లోర్‌ వదిలి ఫస్ట్‌ఫ్లోర్‌లో నివాసముండండి. ప్రహరీ లేకుండా ఇల్లు కడితే మంచిది కాదు. ఇప్పటికైనా ఇంటి చుట్టూ ప్రహరీ కట్టుకోండి.

-సుద్దాల సుధాకర్‌ తేజ
suddalavasthu@gmail.com
Cell: 98492 78143