Suicide | నా చావుకు కారణం మోదీనే.. ‘సర్‌’ ఫామ్‌పై సూసైడ్‌ లెటర్‌ రాసి.. యువకుడి ఆత్మహత్య

Suicide | తన మరణానికి ప్రధానినరేంద్రమోదీ కారణం అంటూ ఎస్‌ఐఆర్‌ ఫారమ్‌పై సూసైడ్‌ నోట్‌ రాసి రాజన్న సిరిసిల్ల జిల్లాలో ఓ యువకుడు ఆత్మహత్య చేసుకున్నాడు.

Suicide | ఎల్లారెడ్డిపేట, జూలై 23: తన మరణానికి ప్రధాని నరేంద్రమోదీ కారణం అంటూ ఎస్‌ఐఆర్‌ ఫారమ్‌పై సూసైడ్‌ నోట్‌ రాసి రాజన్న సిరిసిల్ల జిల్లాలో ఓ యువకుడు ఆత్మహత్య చేసుకున్నాడు.

కుటుంబసభ్యులు, గ్రామస్తులు తెలిపిన వివరాల ప్రకారం..ఎల్లారెడ్డిపేట మండలం గొల్లపల్లికి చెందిన పిట్ల బాలయ్య-భారతవ్వ దంపతులకు కొడుకు వంశీ(25), కూతురు పూజ ఉన్నారు. ఇంట్లో ఆర్థిక పరిస్థితి బాగాలేని కారణంగా డిగ్రీ మొదటి సంవత్సరంలోనే వంశీ చదువు ఆపేశాడు. పెయింటర్‌గా పనిచేస్తున్నాడు. బుధవారం రాత్రి 10 గంటల సమయంలో ఇంట్లో తన గదిలోకి వెళ్లి తలుపు వేసుకొని పడుకున్నాడు. గురువారం ఉదయం తల్లిదండ్రులు తలుపు తీసి చూసేసరికి ఉరేసుకొని ఆత్మహత్య చేసుకున్నాడు. అయితే అప్పటికే బీఎల్‌వో ఇచ్చిన ఎస్‌ఐఆర్‌ ఫారమ్‌లో సూసైడ్‌ లెటర్‌ రాసి రాత్రి 11.30 గంటలకు తన వాట్సాప్‌ స్టేటస్‌గా పెట్టుకున్నాడు. సదరు లేఖలో తన చావుకు కారణం కుటుంబం కాదని, కేవలం నరేంద్రమోదీనేనని పేర్కొన్నాడు. ఎవరినీ ఇబ్బందులు పెట్టకుండా తన దహన సంస్కారాలు ఆనవాయితీగా జరిపించాలని రాశాడు. తన ఆందోళనను అర్థం చేసుకుంటారని, చావాలంటే భయమైతున్నదని అందులో పేర్కొన్నాడు.

అలాగే, అంతకు ముందు బ్లేడ్‌తో చేతి మణికట్టుపై, గొంతుపై కోసుకునే ప్రయత్నం చేసుకున్నట్టు తెలుస్తున్నది. చివరకు ఉరేసుకుని ఆత్మహత్య చేసుకున్నాడు. లేఖ చివర్లో ఇట్లు భారత పౌరుడు, వంశీ రాయల్‌, జైహింద్‌, థాంక్యూ గవర్నమెంట్‌ అంటూ ముగించాడు.

ఢిల్లీలోని జంతర్‌మంతర్‌ వద్ద ఉద్యమ తీరును వంశీ ఫోన్‌, టీవీల్లో చూస్తూ భావోద్వేగానికి గురయ్యాడా? అనే అనుమానాలు ఉన్నాయి. కాగా, వంశీ ఉపయోగించిన ఫోన్‌ గదిలో లభించలేదని కుటుంబ సభ్యులు తెలిపారు. పోలీసులు ఘటనా స్థలానికి చేరుకొని వివరాలు సేకరిస్తున్నారు. కాగా, వంశీ తన తల్లితో బుధవారం సాయంత్రం గొడవ పెట్టుకున్నట్టు సమాచారం. ఇదే విషయమై తన కుమారుడి మృతికి కారణాలపై దర్యాప్తు చేయాలని తండ్రి బాలయ్య ఫిర్యాదు చేసినట్టు ఎస్‌ఐ రాహుల్‌రెడ్డి తెలిపారు.

వంశీది కేంద్ర ప్రభుత్వ హత్యే..

పిట్ల వంశీది ముమ్మాటికీ కేంద్ర ప్రభుత్వ హత్యే అని బీఆర్‌ఎస్‌ జిల్లా అధ్యక్షుడు తోట ఆగయ్య విమర్శించారు. అంతకుముందు వంశీ మృతదేహాన్ని చూసేందుకు వచ్చిన తనను పోలీసులు అడ్డుకోవడంతో వారితో వాగ్వాదానికి దిగారు. . వంశీ మృతిపై కేటీఆర్‌ ఆరా తీసినట్టు తెలిపారు.