వాసవి మోసంపై ఆగ్రహం

‘లేని ఫ్లాట్లకు కిస్తీలు కడుతున్నాం.. సొంతింటి కల సాకారం కాక అద్దెల భారాన్ని మోయలేకపోతున్నం’ అంటూ వాసవి గ్రూప్‌ వినియోగదారులు ఆ గ్రహం వ్యక్తంచేశారు.

• లేని ఫ్లాట్లకు కిస్తీలు కడుతున్నం
• అద్దెల భారాన్ని మోయలేకపోతున్నం
• ఆర్థిక ఇబ్బందులకు ఆత్మహత్యలే శరణ్యం
• ఫ్లాట్ల కొనుగోలుదారుల ఆవేదన
• ఫ్లాట్లు అప్పగించ లేదని ఆందోళన
• చర్యలు తీసుకోవాలని డిమాండ్‌

దుండిగల్‌, నవంబర్‌ 29: ‘లేని ఫ్లాట్లకు కిస్తీలు కడుతున్నాం.. సొంతింటి కల సాకారం కాక అద్దెల భారాన్ని మోయలేకపోతున్నం’ అంటూ వాసవి గ్రూప్‌ వినియోగదారులు ఆ గ్రహం వ్యక్తంచేశారు. జనాల ఆశలతో జేబు లు నింపుకుని, వాసవీ గ్రూప్‌ చేసిన రియల్‌ మాయాజాలంతో మోసపోయామని వాసవీ కొనుగోలుదారులు శనివారం బాచుపల్లిలోని వాసవి అర్బన్‌ నిర్మాణ సంస్థ ఎదుట ఆందోళనకు దిగారు. ఈ సందర్భంగా యాజమాన్యానికి వ్యతిరేకంగా నినాదాలు చేస్తూ.. త మను నమ్మించి మోసగించారంటూ ప్లకార్డులను ప్రదర్శించి నిరసన వ్యక్తం చేశారు. వందలాదిమంది ఆందోళనలో పాల్గొనడంతో పోలీసులు రంగప్రవేశం చేసి శాంతింప చేసే ప్ర యత్నం చేశారు. అనంతరం వారు మాట్లాడు తూ.. మియాపూర్‌-గండిమైసమ్మ ప్రధాన ర హదారికి ఆనుకుని బాచుపల్లిలోని సర్వే నం బర్‌ 126 పార్ట్‌, 136 పార్ట్‌లలో కోమటికుంటలో వాసవి అర్బన్‌ నిర్మాణ సంస్థ 12టవ ర్లు, 24ఫోర్లతో పెద్దఎత్తున 3714 ఫ్లాట్లను నిర్మిస్తున్నదని తెలిపారు.

2020లో పనులు ప్రారంభం కాగా, డిసెంబర్‌ 2024 వరకు ని ర్మాణాలు పూర్తిచేసి కొనుగోలుదారులకు అ ప్పగిస్తామని ఒప్పందం చేసుకున్నదని పేర్కొన్నారు. దీనికి లక్షలాది రూపాయలు వసూలు చేశారని వివరించారు. ఆనాటి నుంచి ఇప్పటి వరకు కొనుగోలుదారులకు ఫ్లాట్లు కట్టించి ఇవ్వకుండా వేధింపులకు గురిచేస్తుందని ఆవేదన వ్యక్తంచేశారు. ఈ ఏడాది జనవరిలోనే ఫ్ల్లాట్లను అప్పగిస్తామని ఇచ్చిన హామీని నిర్మాణ సంస్థ నిర్వాహకులు విస్మరించారని ఆందోళన వ్యక్తంచేశారు. దీంతో తాము ఆర్థ్ధికంగా పలు ఇబ్బందులను ఎదుర్కొంటున్నట్టుగా వాపోయారు.

సొంతింటి మాయలో అద్దెల భారం
ఈ ఏడాది జనవరిలోనే సొంతింట్లోకి వెళ్తామని, అర్బన్‌ నిర్మాణసంస్థ సమీపంలో అద్దె ఇండ్లలో ఉంటూ.. తమ పిల్లలను అక్కడే స్కూల్లో చేర్పించామని బాధితులు పేర్కొన్నా రు. దీంతో అదనపు భారంతోపాటు, లేని ఫ్లాట్లకు ఈఎంఐలూ కట్టాల్సిన పరిస్థితి వ చ్చిందని ఆందోళన చెందారు. కొత్త ఇండ్లు కొనుగోలు చేశామనే సంతోషం లేకుండా, ఇంటినొక పీడకలగా వాసవి గ్రూప్‌ మార్చిందని మండిపడ్డారు. పలుమార్లు చర్చలకు పిలిచి.. త్వరగా పూర్తి చేస్తామని హామీ ఇచ్చారని, కానీ ఇప్పటికీ అతీగతీ లేదని ఆగ్రహం వ్యక్తంచేశారు. కల్లబొల్లి మాటలతో కాలం గ డుపుతున్నారే తప్పా… తమకు ఫ్లాట్లను అప్పగించడం లేదని పేర్కొన్నారు. చేసుకున్న ఒ ప్పందం ప్రకారం, రెండింతల గడువు ముగిసినా.. నిర్మాణ పనులు పూర్తి చేయకుండా, ఫ్లాట్లను అప్పగించకుండా వాసవి గ్రూప్‌ యా జమాన్యం చేస్తున్న నిర్లక్ష్యం తమకు ఆర్థికభారంగా మారుతుందని వాపోయారు.

ఆర్థిక నష్టాలను సాకుగా చూపుతున్న యాజమా న్యం.. తాము 90% డబ్బులు చెల్లించామని, ఆ డబ్బులతో ఏం పనులు చేశారని ప్రశ్నించా రు. ఇటు కిరాయిలు, అటు బ్యాంకు ఈఎంఐలు చెల్లించాల్సి రావడంతో ఆర్థిక ఇబ్బందులతో ఆత్మహత్యలు చేసుకునే పరిస్థితి దాపురించిందని ఆవేదన వ్యక్తంచేశారు. ఇలాంటి సంస్థలపై ప్రభుత్వం చట్టపరమైన చర్యలు తీసుకోవాలని డిమాండ్‌ చేశారు. సమాచారం తెలుసుకున్న వాసవి గ్రూప్‌ డైరెక్టర్‌ అవినాశ్‌ ఘటనా స్థలానికి చేరుకుని వచ్చే ఏడాది ఆగ స్టు నాటికి ఫ్లాట్లను అప్పగిస్తామని చెప్పగా, మరోసారి మభ్యపెట్టేందుకు చూస్తున్నారా..? అని బాధితులు ఆగ్రహం వ్యక్తంచేశారు.

వివాదాల పుట్ట… వాసవి అర్బన్‌
నిర్మాణానికి మొదటి నుంచే వాసవి అర్బ న్‌ వివాదాల్లో కొట్టుమిట్టాడుతున్నది. ఇందు కు బాచుపల్లి కోమటికుంటలో వాసవి అర్బన్‌ నిర్మాణ సంస్థ నిర్మాణం చేపట్టడమే ప్రధాన కారణం. నిర్మాణం అవుతున్న టవర్లు కోమటికుంట చెరువు ఎఫ్‌టీఎల్‌ 8,9 పరిధిలో ఉ న్నాయని గతంలో హెచ్‌ఎండీఏ ఉన్నతాధికారులు, హైకోర్టుకు ఫిర్యాదులు వెళ్లాయి. కొనుగోలుదారులకు ఇచ్చిన హామీలను పలుమా ర్లు దాటవేయడంతో పాటు, మొత్తం డబ్బులతో జేబులు నింపుకున్న తీరును కొనుగోలుదారులు బయటపెట్టారు. వసూలు చేసిన మొ త్తానికి తగినట్టు కూడా నిర్మాణంలో పురోగతి లేదని, కనీస సౌకర్యాలు కల్పించడం లేదని కొనుగోలుదారులు మండిపడుతున్నారు.