నల్లగొండ బైపాస్‌ రోడ్డుకే నిధులు.. రాష్ట్ర రహదారుల అప్‌గ్రేడ్‌ ప్రతిపాదన ఇంకా పెండింగులోనే

రాష్ట్రంలోని రోడ్డు ప్రాజక్టులపై కేంద్ర ప్రభుత్వం తీవ్ర ఉదాసీన వైఖరిని ప్రదర్శిస్తున్నది. తెలంగాణలోని పలు రాష్ట్ర రహదారులను జాతీయ రహదారులుగా అభివృద్ధి చేయాలన్న ప్రతిపాదనలు ఎంతోకాలంగా పెండింగులో ఉండటమే ఇందుకు నిదర్శనం.

హైదరాబాద్‌, అక్టోబర్‌ 15 (నమస్తే తెలంగాణ): రాష్ట్రంలోని రోడ్డు ప్రాజక్టులపై కేంద్ర ప్రభుత్వం తీవ్ర ఉదాసీన వైఖరిని ప్రదర్శిస్తున్నది. తెలంగాణలోని పలు రాష్ట్ర రహదారులను జాతీయ రహదారులుగా అభివృద్ధి చేయాలన్న ప్రతిపాదనలు ఎంతోకాలంగా పెండింగులో ఉండటమే ఇందుకు నిదర్శనం. నరేంద్రమోదీ సర్కారు తాజాగా రాష్ట్రంలోని ఒకే ఒక్క ప్రాజెక్టుకు గ్రీన్‌సిగ్నల్‌ ఇచ్చి మిగిలిన ప్రాజెక్టులను విస్మరించడం చర్చనీయాంశమైంది.

ఆర్‌అండ్‌బీ శాఖ మంత్రి సొంత జిల్లాలోని నల్లగొండ బైపాస్‌కు మాత్రమే కేంద్రం అనుమతి ఇవ్వడంతో సంబంధిత పత్రాలను తీసుకునేందుకు రాష్ట్ర అధికారులు బుధవారం ఢిల్లీ వెళ్తున్నారు. నల్లగొండ పట్టణంలో 14 కి.మీ. మేర నాలుగు లేన్ల రోడ్డు నిర్మాణానికి కేంద్రం రూ.516 కోట్లు మంజూరు చేసింది. వీటితో నకిరేకల్‌-నాగర్జునసాగర్‌ మధ్య బైపాస్‌ రోడ్డు పనులు ప్రారంభించనున్నట్టు ట్వీట్‌ చేసిన కేంద్ర మంత్రి నితిన్‌ గడ్కరీ.. రాష్ట్రంలోని పలు ఇతర రోడ్డు ప్రాజక్టుల ప్రతిపాదనలను పెండింగ్‌లో పెట్టారు. వీటిలో ఇరుగు పొరుగు రాష్ర్టాలను అనుసంధానించే రహదారులు, ప్రసిద్ధ పుణ్యక్షేత్రాలకు వెళ్లే మార్గాలు, కీలక బ్రిడ్జీలు ఉన్నాయి. వీటిపై సీఎం రేవంత్‌రెడ్డితోపాటు పలువురు రాష్ట్ర మంత్రులు ఇటీవల కేంద్ర పెద్దలను కలిసి సవివరంగా నివేదికను సమర్పించినప్పటికీ ఒక్క నల్లగొండ బైపాస్‌ పనులకు మాత్రమే గ్రీన్‌ సిగ్నల్‌ ఇవ్వడం గమనార్హం.

కేంద్రం వద్ద పెండింగులో ఉన్న కొన్ని ముఖ్యమైన ప్రాజెక్టులు

• కల్వకుర్తి-నంద్యాల రహదారి (ఎన్‌హెచ్‌-167కే) పనులు ఇప్పటికే ప్రారంభమైనప్పటికీ ఆ రహదారికి అనుసంధానమై ఉన్న హైదరాబాద్‌-శ్రీశైలం మార్గంలో హైదరాబాద్‌-కల్వకుర్తి మధ్య ప్రస్తుతమున్న రెండు వరుసల రోడ్డును 4 లేన్లకు విస్తరించాలని రాష్ట్ర ప్రభుత్వం కేంద్రానికి ప్రతిపాదించింది.
• హైదరాబాద్‌-శ్రీశైలం (ఎన్‌హెచ్‌-765) మార్గంలో 62 కిలోమీటర్లు అమ్రాబాద్‌ టైగర్‌ రిజర్వు ఫారెస్టు పరిధిలో ఉన్నందున ఆ ప్రాంతంలో 4 వరుసల ఎలివేటెడ్‌ కారిడార్‌కు అనుమతులు మంజూరు చేయాలని రాష్ట్ర ప్రభుత్వం కోరుతున్నది.
• మంథని నియోజకవర్గంలో జగిత్యాల-పెద్దపల్లి-మంథని-కాటారం రాష్ట్ర రహదారిని జాతీయ రహదారిగా ప్రకటించి, నిధులు మంజూరు చేయాలని ప్రభుత్వం కోరుతున్నది. దీనివల్ల ఎన్‌హెచ్‌-565, ఎన్‌హెచ్‌-353సీ అనుసంధానమై తెలంగాణ, మహారాష్ట్ర, ఛత్తీస్‌గఢ్‌ మధ్య రాకపోకలు సులభతరం కావడంతోపాటు దక్షిణ కాశీగా గుర్తింపుపొందిన కాళేశ్వరం క్షేత్రానికి అనుసంధానత పెరుగుతుంది.
• సేతు బంధన్‌ సీం కింద 12 ఆర్వోబీలు/ఆర్‌యూబీలు మంజూరు చేయాలని రాష్ట్ర ప్రభుత్వం ఇదివరకే ప్రతిపాదించింది.
• జగిత్యాల-కాటారం (130 కి.మీ), దిండి-నల్లగొండ (100 కి.మీ), భువనగిరి-చిట్యాల (44 కి.మీ), చౌటుప్పల్‌-సంగారెడ్డి (182 కి.మీ), మరికల్‌-రామసముద్రం (63 కి.మీ), వనపర్తి-మంత్రాలయం (110 కి.మీ), మన్నెగూడ-బీదర్‌ (134 కి.మీ), కరీంనగర్‌-పిట్లం (165 కి.మీ), ఎర్రవెల్లి క్రాస్‌రోడ్‌ -రాయచూర్‌ (67 కి.మీ), కొత్తపల్లి-దుద్దెడ (75 కి.మీ), సారపాక-ఏటూరునాగారం (93 కి.మీ), దుద్దెడ-రాయగిరి క్రాస్‌రోడ్‌ (63 కి.మీ), జగ్గయ్యపేట-కొత్తగూడెం (100 కి.మీ), సిరిసిల్ల-కోరుట్ల (65 కి.మీ), భూత్పూర్‌-సిరిగిరిపాడు (166 కి.మీ), కరీంనగర్‌-రాయపట్నం (60 కి.మీ) కలిపి మొత్తం 1,617 కి.మీ. రాష్ట్ర రోడ్లను జాతీయ రహదారులుగా అప్‌గ్రేడ్‌ చేయాలని కోరుతున్నది.