Karimnagar | ఆధ్యాత్మిక చింతనతో మురిసిన కరీంనగరం.. టీటీడీ ఆలయ నిర్మాణానికి అంకురార్పణ

ఆధ్యాత్మిక చింతనతో కరీంనగరం (Karimnagar) మురిసిపోయింది. గోవిందనామస్మరణతో పులకించిపోయింది. సోమవారం ఉదయం మిథునలగ్నంలో భూకర్షణంతో తిరుమల శ్రీవారి ఆలయ నిర్మాణానికి అంకురార్పణ జరిగింది.

కరీంనగర్‌: ఆధ్యాత్మిక చింతనతో కరీంనగరం (Karimnagar) మురిసిపోయింది. గోవిందనామస్మరణతో పులకించిపోయింది. సోమవారం ఉదయం మిథునలగ్నంలో భూకర్షణంతో తిరుమల శ్రీవారి ఆలయ నిర్మాణానికి అంకురార్పణ జరిగింది. తెల్లవారుజామునుంచే ఆలయం నిర్మించే స్థలంలో వేదపండితులు ప్రత్యేక పూజాకార్యక్రమాలు చేపట్టారు. తిరుమల తిరుపతి దేవస్థానం (TTD) ప్రధాన అర్చకులు వేణుగోపాల దీక్షితులు ఆధ్వర్యంలో భూకర్షణ హోమం, కలశారాధన, అష్టదిక్పాలకుల పూజ, మండప పూజ, కన్యకాపూజ, గోపూజ, ముత్తైదువ పూజ నిర్వహించారు. అనంతరం శ్రీవారి గర్బాలయం నిర్మించే స్థలంలో నాగలితో దున్ని నవధాన్యాలు వెదజల్లారు. ఈ కార్యక్రమంలో మంత్రి గంగుల కమలాకర్ (Minister Gangula Kamalakar) కుటుంబ సమేతంగా హాజరు కాగా ప్రణాళిక సంఘం ఉపాధ్యక్షులు బోయినిపల్లి వినోద్ కుమార్ (Boinapalli Vinod kumar), జిల్లా కలెక్టర్ ఆర్వీ. కర్ణణ్, ఎమ్మెల్యేలు రసమయి బాలకిషన్, సుంకె రవిశంకర్‌, జిల్లా బీఆర్ఎస్ అధ్యక్షుడు జీవీ. రామకృష్ణారావు, మేయర్ సునీల్ రావు తదితరులు హాజరై ప్రత్యేక పూజ కార్యక్రమాలను నిర్వహించారు.

మంత్రి గంగుల కమలాకర్, బోయినిపల్లి వినోద్ కుమార్ నాగలిపట్టుకుని దున్నారు. అనంతరం మహా పూర్ణాహుతి, విశేష ఆశీర్వచనం కార్యక్రమాలను నిర్వహించారు. కరీంనగర్ వాసులకు తిరుమల శ్రీవారి దర్శనం కల్పించేందుకే పట్టణంలో టీటీడి క్షేత్రాన్ని నిర్మిస్తున్నామని మంత్రి గంగుల అన్నారు. ఈ నెల 31న ఆలయ నిర్మాణ పనులకు శంకుస్థాపన చేయనున్నామని చెప్పారు.