హైదరాబాద్, జూలై 3 (నమస్తే తెలంగాణ): ‘అదిగో గోల్కొండ.. లక్నవరం, రంగనాయకసాగర్ అందాలు ఆస్వాదించు.. సోమశిలలో ప్రకృతి సోయగాలు చూడు.. రామప్ప గొప్పతనం వీక్షించు.. ఇదీ చార్మినార్, బిర్లామందిర్ చరిత’ అంటూ బిగ్బీ అమితాబ్ బచ్చన్ గళం వినిపించనున్నది. రాష్ట్రంలో పర్యాటకరంగాన్ని పెద్దఎత్తున ప్రోత్సహిస్తున్న తెలంగాణ ప్రభుత్వం.. అదేస్థాయిలో ప్రచారం చేయాలని నిర్ణయించింది. ఈ మేరకు రాష్ట్రంలోని పర్యాటక ప్రాంతాలపై 15 నిమిషాల నిడివిగల వీడియోను విడుదలచేసేందుకు కసరత్తు చేస్తున్నది. ప్రముఖ పర్యాటక ప్రాంతాలను ఈ వీడియోలో చూపిస్తూ వాటి చారిత్రక నేపథ్యాన్ని బిగ్బీ గొంతుకతో వివరించనున్నది. గంభీరమైన ఆయన వాయిస్ ఓవర్తో ఆకట్టుకునేలా వీడియోను తీర్చిదిద్దుతున్నామని తెలంగాణ రాష్ట్ర పర్యాటక అభివృద్ధి సంస్థ (టీఎస్టీడీసీ) చైర్మన్ ఉప్పల శ్రీనివాస్గుప్తా తెలిపారు. టీఎస్టీడీసీ వెబ్సైట్ను సైతం ఆధునీకరిస్తున్నామని పేర్కొన్నారు. అధునాతన సాంకేతికతతో యూజర్ ఫ్రెండ్లీగా ఉండేలా, ఒక్క క్లిక్తో రాష్ట్రంలోని పర్యాటక ప్రాంతాల సమస్త సమాచారం తెలుసుకునేలా వెబ్సైట్ను రూపొందిస్తున్నామని ఆయన చెప్పారు.