గౌడ, ఎస్సీల సాంఘిక బహిషరణ దారుణం

బాధ్యులపై కఠిన చర్యలు తీసుకోవాలి.. సీపీఎం రాష్ట్ర కార్యదర్శి జాన్‌వెస్లీ

హైదరాబాద్‌, అక్టోబర్‌ 9 (నమస్తే తెలంగాణ): నిజామాబాద్‌ జిల్లా ఏర్గట్ల మండలం తాళ్లరాంపూర్‌ గ్రామంలో 39 గౌడ కుటుంబాలు, 11 ఎస్సీ కుటుంబాలను గ్రామ అభివృద్ధి కమిటీ సాంఘిక బహిషరణ చేయడం దుర్మార్గమని, ఘటన జరిగి 17 రోజులు గడుస్తున్నా చర్యలు తీసుకోకపోవడం దారుణమని సీపీఎం రాష్ట్ర కార్యదర్శి జాన్‌వెస్లీ విమర్శించారు.

ఈ ఘటనపై కఠిన చర్యలు తీసుకొని, బాధిత కుటుంబాలకు ప్రాణ, ఆస్తి రక్షణకు చర్యలు తీసుకోవాలని డిమాండ్‌ చేశారు. గౌడ్‌ల జీవనాధారమైన ఈతవనం కాల్చివేసినందున వారికి నష్టపరిహారం చెల్లించాలని శుక్రవారం ఒక ప్రకటనలో డిమాండ్‌ చేశారు. వీడీసీ సభ్యులు అడిగిన 6 లక్షలు వారికి ఇవ్వనందుకే పాతకక్షలను ముందుకు తెచ్చి ఈ సాంఘిక బహిషరణ చేశారని ఆరోపించారు. వీరిని సాంఘిక బహిషరణ చేయడం ఇది రెండోసారి అని పేర్కొన్నారు.