వెదురు నుంచి కరెంటు!

వెదురు నుంచి విద్యుత్తును ఉత్పత్తి చేస్తే..? దేశంలోనే తొలిసారిగా తెలంగాణ ఉద్యానశాఖ ఇప్పుడు ఇలాంటి ప్రాజెక్టునే చేపట్టింది. నిర్మల్‌ జిల్లా భైంసాలో 15 ఎకరాల్లో 2019 నుంచే విద్యుత్తు ఉత్పత్తికి అవసరమైన భీమా బ్యాంబూ రకం వెదురు చెట్లను పెంచుతున్నది. ఏపుగా పెరిగిన వెదురు కర్రల నుంచి ప్రత్యేక యంత్రాల ద్వారా ఇప్పటికే వెదురు పెల్లెట్స్‌ను విజయవంతంగా తయారుచేసింది.

• థర్మల్‌ ప్రాజెక్టుల్లో బొగ్గుకు బదులుగా వినియోగం
• దేశంలోనే తెలంగాణ ఉద్యానశాఖ తొలి ప్రయత్నం
• భైంసాలో విజయవంతంగా వెదురు పెల్లెట్స్‌ తయారీ
• త్వరలో ఎన్టీపీసీలో విద్యుత్తు ఉత్పత్తి ప్రయోగం
• రాష్ట్రంలో వెదురు సాగు పెంచేందుకు ప్రణాళికలు
• రైతుకు ప్రతి ఏటా రూ.2 లక్షల నికర ఆదాయం

హైదరాబాద్‌, ఏప్రిల్‌ 19 (నమస్తే తెలంగాణ): వెదురు నుంచి విద్యుత్తును ఉత్పత్తి చేస్తే..? దేశంలోనే తొలిసారిగా తెలంగాణ ఉద్యానశాఖ ఇప్పుడు ఇలాంటి ప్రాజెక్టునే చేపట్టింది. నిర్మల్‌ జిల్లా భైంసాలో 15 ఎకరాల్లో 2019 నుంచే విద్యుత్తు ఉత్పత్తికి అవసరమైన భీమా బ్యాంబూ రకం వెదురు చెట్లను పెంచుతున్నది. ఏపుగా పెరిగిన వెదురు కర్రల నుంచి ప్రత్యేక యంత్రాల ద్వారా ఇప్పటికే వెదురు పెల్లెట్స్‌ను విజయవంతంగా తయారుచేసింది. త్వరలోనే జాతీయ థర్మల్‌ విద్యుత్తు కేంద్రంలో బొగ్గుకు బదులుగా ఈ పెల్లెట్స్‌ను వినియోగించి, పరీక్షించనున్నారు. ఇప్పటికే చైనా, జర్మనీ, అమెరికా వంటి అనేక దేశాల్లో వెదురు పెల్లెట్స్‌తో థర్మల్‌ విద్యుత్తును ఉత్పత్తి చేస్తున్నారు. మన దేశంలో కూడా థర్మల్‌ విద్యుత్తు ఉత్పత్తిలో వెదురు పెల్లెట్స్‌ను 7% తప్పనిసరిగా వినియోగించాలని కేంద్రం నిర్ణయించింది. ఈ లెక్కన తెలంగాణలో ఉత్పత్తి చేస్తున్న థర్మల్‌ విద్యుత్తుకు ఏటా 67 లక్షల టన్నుల పెల్లెట్స్‌ అవసరమని అధికారుల అంచనా. ఇంత భారీ మొత్తంలో డిమాండ్‌ ఉండటంతో దాదాపు 2.80 లక్షల ఎకరాల్లో వెదురు సాగును ప్రోత్సహించాలని ఉద్యానశాఖ నిర్ణయించింది.వెదురు ఉత్పత్తికి ఎకరాకు అయ్యే ఖర్చు రూ.50 వేలు

• ఉత్పత్తి అయ్యే వెదురు కర్ర 30 టన్నులు
• ఉత్పత్తి అయ్యే పెల్లెట్స్‌ 20 టన్నులు
• ఏడాదికి నికర ఆదాయం రూ.2 లక్షలు

ఎకరాకు 2 లక్షల ఆదాయం

• వెదురు సాగుతో రైతులకు భారీ ఆదాయం సమకూరే అవకాశం ఉన్నది.
• తొలుత ఎకరాకు రూ.50 వేలు పెట్టుబడి పెట్టాల్సి ఉంటుంది.
• తయారీకి అవసరమైన వెదురు కర్ర ఏడాది తరువాత చేతికి వస్తుంది.
• ఎకరానికి 30 టన్నుల వెదరు కర్ర ఉత్పత్తి అవుతుంది. దాని నుంచి 20 టన్నుల పెల్లెట్స్‌ తయారుచేయవచ్చు.
• పెల్లెట్స్‌ తయారీ ద్వారా ఏటా ఎకరాకు రూ.2 లక్షల నికర ఆదాయం లభిస్తుందని ఉద్యానశాఖ అధికారులు చెప్తున్నారు.
• ఈ పంట ఒకసారి వేస్తే 50 ఏండ్ల వరకు పెరుగుతూనే ఉంటుంది.
• దీనికి ప్రత్యేకంగా నీళ్లు, ఎరువులు అవసరం లేదు.
• వెదురు చెట్లతో వాతావరణానికి కూడా మేలు జరుగుతుంది. ఇతర చెట్ల కంటే 33 శాతం అధికంగా ఆక్సిజన్‌ను అందిస్తాయి.
• వెదురును చేల గట్లు, రోడ్ల వెంట కూడా సాగు చేయవచ్చు.