తొలిసారి అధ్యక్షా!..

శాసనసభకు ఎన్నికై ఎమ్మెల్యే హోదాలో అధ్యక్షా.. అంటూ ప్రసంగించాలన్నది ఎంతో మంది రాజకీయ నాయకుల కల. నియోజకవర్గ ప్రజల ప్రతినిధిగా హాజరై తమ ప్రాంత సమస్యలను అసెంబ్లీలో ప్రస్తావించాలని భావిస్తుంటారు. ఆ అవకాశం పలువురు నూతన ఎమ్మెల్యేలకు గురువారం కలిగింది.

• మొదటిసారి అసెంబ్లీలో మాట్లాడిన పలువురు సభ్యులు
• నూతన ఎమ్మెల్యేలకు జీరో అవర్‌లో దక్కిన అవకాశం
• నియోజకవర్గ సమస్యలను ప్రస్తావించిన కొత్త సభ్యులు

హైదరాబాద్‌, ఫిబ్రవరి 15 (నమస్తే తెలంగాణ):శాసనసభకు ఎన్నికై ఎమ్మెల్యే హోదాలో అధ్యక్షా.. అంటూ ప్రసంగించాలన్నది ఎంతో మంది రాజకీయ నాయకుల కల. నియోజకవర్గ ప్రజల ప్రతినిధిగా హాజరై తమ ప్రాంత సమస్యలను అసెంబ్లీలో ప్రస్తావించాలని భావిస్తుంటారు. ఆ అవకాశం పలువురు నూతన ఎమ్మెల్యేలకు గురువారం కలిగింది. ఉదయం సభ ప్రారంభమైన తర్వాత మొదట ‘జీరో అవర్‌’ నిర్వహిస్తున్నట్టు స్పీకర్‌ ప్రసాద్‌కుమార్‌ ప్రకటించారు. మొదటిసారి ఎన్నికైన శాసనసభ్యులు సభలో 57 మంది ఉన్నారని, వారిలో కొందరికి తమ నియోజకవర్గ సమస్యలను ప్రస్తావించే అవకాశం ఇస్తున్నట్టు చెప్పారు.

• ఖానాపూర్‌ ఎమ్మెల్యే వెడ్మ బొజ్జు మాట్లాడుతూ.. కడెం ప్రాజెక్టు మరమ్మతులకు రూ.5.45 కోట్లు విడుదల చేసినందుకు, సదర్‌మాట్‌ కెనాల్‌ నిర్మాణ ప్రకటన చేసినందుకు ప్రభుత్వానికి ధన్యవాదాలు తెలిపారు.
• నారాయణపేట ఎమ్మెల్యే చిట్టెం పర్ణికారెడ్డి మాట్లాడుతూ.. జీవో 69 ద్వారా నారాయణపేట-కొడంగల్‌ లిఫ్ట్‌ ఇరిగేషన్‌కు పరిపాలన అనుమతుల మంజూరీపై నియోజకవర్గ రైతుల్లో హర్షం వ్యక్తమవుతున్నదని తెలిపారు. టెక్స్‌టైల్‌ పార్క్‌ ఏర్పాటు చేయాలని, జిల్లా దవాఖానలో సిబ్బంది సంఖ్య పెంచాలని విజ్ఞప్తి చేశారు.
• నిజామాబాద్‌ అర్బన్‌ ఎమ్మెల్యే ధన్‌పాల్‌ సూర్యనారాయణ గుప్తా మాట్లాడుతూ.. ఒక్కో నియోజకవర్గానికి 3,500 ఇందిరమ్మ ఇండ్లు కట్టిస్తామని ప్రభుత్వం చెప్తున్నదని, తమ నియోజకవర్గానికి 7 వేల ఇండ్లు మంజూరు చేయాలని కోరారు. పాఠశాలల్లో మౌలిక వసతులు పెంచాలని విజ్ఞప్తి చేశారు.
• జుక్కల్‌ ఎమ్మెల్యే లక్ష్మీకాంతారావు మాట్లాడుతూ.. 2021లో ప్రారంభించిన నాగమడుగు లిఫ్ట్‌ పనులు త్వరితగతిన పూర్తిచేసి 41 వేల ఎకరాలకు సాగునీరు అందించాలని కోరారు. నియోజకవర్గానికి ట్రామాకేర్‌ సెంటర్‌ను ఏర్పాటు చేయాలని కోరారు.
• భూపాలపల్లి ఎమ్మెల్యే గండ్ర సత్యనారాయణ మాట్లాడుతూ.. కాళేశ్వరం ప్రాజెక్టుకు మరమ్మతులు చేసి నీళ్లు అందించాలని కోరారు. మెడికల్‌ కాలేజీ, సింగరేణి దవాఖానలో వసతులు కల్పించాలని విన్నవించారు. నిరుడు మోరంచపల్లెలో కుంభవృష్టితో నష్టపోయిన చిరు వ్యాపారులకు రుణాలు మంజూరు చేయాలని కోరారు.
• కోరుట్ల ఎమ్మెల్యే కల్వకుంట్ల సంజయ్‌రావు మాట్లాడుతూ.. ప్రత్యేక అభివృద్ధి నిధులతో చేపట్టిన పనులు కొనసాగిస్తారో.. లేదో స్పష్టత ఇవ్వాలని కోరారు. .
• ముథోల్‌ ఎమ్మెల్యే రామారావు పటేల్‌ సైతం తన నియోజకవర్గ సమస్యలను ఏకరువు పెట్టారు. రాజీవ్‌గాంధీ టెక్నికల్‌ యూనివర్సిటీ ఇన్‌చార్జి వీసీ వెంకటరమణ ఇష్టారాజ్యంగా వ్యవహరిస్తున్నారని ఆరోపించారు. బాసర సరస్వతి ఆలయ అభివృద్ధికి రూ.50 కోట్లు విడుదల చేయాలని కోరారు.
• వర్ధన్నపేట ఎమ్మెల్యే కేఆర్‌ నాగరాజు మాట్లాడుతూ.. కాకతీయ యూనివర్సిటీలో వసతులు కల్పించాలని కోరారు. ప్రొఫెసర్ల నియామకం చేపట్టాలని విన్నవించారు.
• దుబ్బాక ఎమ్మెల్యే కొత్త ప్రభాకర్‌రెడ్డి మాట్లాడుతూ.. దుబ్బాకకు రెవెన్యూ డివిజన్‌ మంజూరు చేయాలని కోరారు. రింగ్‌రోడ్డు నిర్మాణానికి నిధులు మంజూరు చేయాలని విన్నవించారు.
• సత్తుపల్లి ఎమ్మెల్యే ఎం రాగమయి తమ నియోజవకర్గ పరిస్థితిని వివరించారు. సింగరేణి గనుల్లో తమ ప్రాంతంలో 80 శాతం స్థానిక కోటా అమలు చేయాలని కోరారు. సింగరేణి కాలుష్యంతో అనారోగ్య సమస్యలు వస్తున్నాయని తెలిపారు. సింగరేణి సంస్థతో మాట్లాడి సూపర్‌ స్పెషాలిటీ దవాఖాన ఏర్పాటు చేయాలని సూచించారు.
• తుంగతుర్తి ఎమ్మెల్యే మందుల సామేల్‌ మాట్లాడుతూ.. తిరుమలగిరికి జూనియర్‌ కాలేజీ ఇవ్వాలని కోరగానే సీఎం మంజూరు చేశారని చెప్పారు. పాలిటెక్నిక్‌ కాలేజీని బీటెక్‌ కాలేజీగా అప్‌గ్రేడ్‌ చేయాలని కోరారు. మోత్కూరులో డిగ్రీ కాలేజీ ఏర్పాటు చేయాలని విన్నవించారు.
• జడ్చర్ల ఎమ్మెల్యే అనిరుధ్‌రెడ్డి మాట్లాడుతూ.. ఉద్ధండాపూర్‌ రిజర్వాయర్‌ పనులు వేగంగా పూర్తి చేయాలని కోరారు. తిమ్మాజీపేట-జడ్చర్ల మధ్య 132 కేవీలైన్‌ పూర్తి చేయాలని కోరారు.
• ఆదిలాబాద్‌ ఎమ్మెల్యే పాయల్‌ శంకర్‌ మాట్లాడుతూ.. రేణుక సిమెంట్‌ కంపెనీకి 2 వేల ఎకరాల సున్నపురాయి గనుల కేటాయింపుపై సమీక్ష చేయాల్సిన అవసరం ఉన్నదని తెలిపారు. ఆదిలాబాద్‌లో టెక్స్‌టైల్‌ పార్క్‌ పెట్టాలని కోరారు.
• భద్రాచలం ఎమ్మెల్యే తెల్లం వెంకట్రావ్‌ మాట్లాడుతూ.. గత ఏడాది పోలవరం బ్యాక్‌ వాటర్‌ వల్ల భద్రాచలం పట్టణం 40 శాతం ముంపునకు గురైందని, కరకట్ట నిర్మాణానికి నిధులు మంజూ రు చేయాలని కోరారు. ఏరియా దవాఖానలో సిబ్బంది సంఖ్యను పెంచాలని విన్నవించారు.
• వేములవాడ ఎమ్మెల్యే ఆదిశ్రీనివాస్‌ మాట్లాడుతూ.. వేములవాడ అలయ అభివృద్ధికి నిధులు మంజూరు చేయాలని కోరారు. శ్రీపాద సాగర్‌ ప్రాజెక్టు స్టేజ్‌-2 ఫేజ్‌-1 కింద 10 శాతం పనులు పెండింగ్‌ ఉన్నాయని తెలిపారు.
• సీనియర్‌ సభ్యుడు, బీఆర్‌ఎస్‌ ఎమ్మెల్యే దానం నాగేందర్‌ మాట్లాడుతూ.. తమ నియోజకవర్గంలోని మూడు ఈద్గా గ్రౌండ్లలో వ్యర్థాలు వేస్తున్నారని చెప్పారు. రంజాన్‌ వస్తున్నందున ఈ సమస్యను నియంత్రించాలని కోరారు.
• కాలేరు వెంకటేశ్‌ మాట్లాడుతూ.. నియోజకవర్గంలో ఎమ్మెల్యేలకు ప్రాధాన్యం ఇవ్వడం లేదని చెప్పారు. జీహెచ్‌ఎంసీలో జీతాలు ఇవ్వలేని పరిస్థితి నెలకొన్నదని వాపోయారు. రూ.వెయ్యి కోట్లు మంజూరు చేయాలని డిమాండ్‌ చేశారు.
• జగిత్యాల ఎమ్మెల్యే సంజయ్‌ మాట్లాడుతూ.. తన నియోజకవర్గంలో నిర్మించిన 4,580 డబుల్‌ బెడ్రూం ఇండ్లను లబ్ధిదారులకు అప్పగించాలని కోరారు. గృహలక్ష్మి పథకం కింద ఇప్పటికే కొందరు నిర్మాణ పనులు మొదలు పెట్టారని వాటిని కొనసాగించాలని విన్నవించారు.
• తమ ప్రాంతానికి వచ్చిన కంపెనీలకు ప్రభుత్వం సహకరించి, త్వరితగతిన ప్లాంట్లు ఏర్పాటయ్యేలా చూడాలని జహీరాబాద్‌ ఎమ్మెల్యే మాణిక్‌రావు కోరారు. మెడికల్‌ కాలేజీని ప్రారంభించాలని గద్వాల ఎమ్మెల్యే కృష్ణమోహన్‌రెడ్డి కోరారు. కుమ్రం భీం ప్రాజెక్టుకు మరమ్మతులు చేయించాలని ఆసిఫాబాద్‌ ఎమ్మెల్యే కోవ లక్ష్మి కోరారు. ఎంఐఎం ఎమ్మెల్యేలు బలాల, మీర్‌ జుల్ఫికర్‌ అలీ, కౌసర్‌ మొయినొద్దీన్‌, మాజిద్‌ హుస్సేన్‌ తదితరులు కూడా తమ నియోజకవర్గ సమస్యలను సభలో ప్రస్తావించారు.

జనగామ ఎమ్మెల్యే పల్లా రాజేశ్వర్‌రెడ్డి మాట్లాడుతూ.. పాల ఉత్పత్తిదారులకు ఇచ్చే 4 శాతం బోనస్‌ను మరింత పెంచాలని గత ప్రభుత్వం నిర్ణయించిందని గుర్తుచేశారు. పెంచిన బోనస్‌ రెండు నెలలుగా అందడం లేదని, వెంటనే ఇప్పించాలని కోరారు. పాలను సేకరించి హైదరాబాద్‌కు పంపిన తర్వాత నాణ్యతగా లేవంటూ తిప్పి పంపుతుండటంతో రైతులు నష్టపోతున్నారని సభ దృష్టికి తెచ్చారు. పాల సేకరణ సమయంలోనే నాణ్యత పరీక్షించేలా ప్రభుత్వం చర్యలు తీసుకోవాలని సూచించారు.

హుజూరాబాద్‌ ఎమ్మెల్యే కౌశిక్‌రెడ్డి మాట్లాడుతూ.. తాను అసెంబ్లీకి రావడానికి కారణమైన బీఆర్‌ఎస్‌ అధినేత కేసీఆర్‌కు ధన్యవాదాలు తెలిపారు. తమ నియోజకవర్గంలో 18,021 మందికి దళితబంధు ఇచ్చారన్నారని చెప్పారు. రెండో విడతలో 2,800 మంది అర్హులకు ఇవ్వాల్సిన నిధులను విడుదల చేయాలని కోరారు. దళితబంధు లబ్ధిదారులు ప్రస్తుతం నెలకు రూ.20-30 వేలు సంపాదిస్తున్నారని తెలిపారు. 100 పడకల దవాఖానలో ఐసీయూ పూర్తయిందని, అందుబాటులోకి తేవాలని కోరారు. కేసీఆర్‌ ప్రభుత్వం 1.63 లక్షల మందికి ఉద్యోగాలు ఇచ్చిందని చెప్పారు. మరికొన్ని ఉద్యోగ నోటిఫికేషన్లు విడుదలయ్యాయని తెలిపారు. మొత్తంగా బీఆర్‌ఎస్‌ ప్రభుత్వం ఇచ్చిన 2.33 లక్షల ఉద్యోగాలకు అదనంగా 2 లక్షల ఉద్యోగాల జాబ్‌ క్యాలెండర్‌ విడుదల చేయాలని ప్రభుత్వాన్ని కోరారు.