దేవరకద్ర రూరల్ (చిన్నచింతకుంట), జూలై 21: ప్రతిపక్ష నాయకుడి ఇంటి పరిస్థితిని చూసి చలించిపోయి సాయం చేసేందుకు ముందుకు వచ్చారు అధికార పార్టీ ఎమ్మెల్యే ఆల వెంకటేశ్వర్రెడ్డి. వారి ఇల్లు కూలేందుకు సిద్ధంగా ఉండటంతో డబుల్ బెడ్రూం ఇల్లు మంజూరు చేస్తానని హామీ ఇచ్చారు. వివరాలు ఇలా.. మహబూబ్నగర్ జిల్లా చిన్నచింతకుంట మండల కేంద్రంలో పెంటన్న అనే వ్యక్తి వామపక్ష పార్టీలో తిరుగుతుండగా.. ఆయన కొడుకు ప్రిన్స్ కాంగ్రెస్ కార్యకర్త. అయితే వారు పురాతన ఇంట్లో బిక్కుబిక్కుమని కుటుంబ సభ్యులతో కలిసి కాలం వెళ్లదీస్తున్నారు. అయితే ఇద్దరు చెరో పార్టీలో పనిచేస్తున్నా సదరు పార్టీలు వారి బాగోగులు పట్టించుకోలేవు. పైగా వీరికి ఇంటి మీద ధ్యాసే లేదు.
శుక్రవారం గ్రామ పర్యటకు వచ్చిన దేవరకద్ర ఎమ్మెల్యే ఆల వెంకటేశ్వర్రెడ్డిని పెంటన్న భార్య సంతోషమ్మ కలిసి తమ గోడు వెల్లబోసుకున్నది. ‘సారూ.. మాది పాతబడిన మట్టిల్లు. నా భర్త, కొడుకు తలో పార్టీలో తిరుగుతున్నారు. మిమ్మల్ని సాయం అడగడానికి ధైర్యం చాలడంలేదు.. కానీ, మాపై దయచూపి ఇల్లు మంజూరు చేయండి’ అంటూ ఎమ్మెల్యేకు విజ్ఞప్తి చేసింది. వెంటనే స్పందించిన ఎమ్మెల్యే ఆల తాము పార్టీలకతీతంగా అర్హులైన అందరికీ డబుల్ బెడ్రూం ఇండ్లు మంజూరు చేస్తున్నట్టు తెలిపారు. తప్పకుండా ఇల్లు మంజూరు చేయిస్తానని మాట ఇచ్చారు. దీంతో ఆ ఇల్లాలి సంతోషానికి అవధుల్లేకుండా పోయాయి. ఇల్లు మంజూరు హామీ ఇచ్చిన ఎమ్మెల్యేకు ఆమె కృతజ్ఞతలు తెలిపింది.