ప్రముఖ నటుడు సోనూసూద్ విపరీతమైన అభిమానులను సంపాదించుకున్నాడు. కరోనా కాలంలో ఎంతో మందిని ఆదుకుని ఆపద్భాందవుడిగా నిలిచాడు. రీల్ లైఫ్లో విలన్గా నటించినప్పటికీ, రియల్ లైఫ్లో మాత్రం హీరోగా పేరు ప్రఖ్యాతులు గడించాడు. అలాంటి సోనూసూద్ పట్ల ఓ బుడ్డోడు అభిమానం పెంచుకున్నాడు. ఓ సినిమాలో సోనూసూద్ను హీరో కొట్టడంతో.. తన అభిమాన నటుడిని కొడుతావా అంటూ కోపంతో ఊగిపోయి.. ఆ టీవీనే రాయితో పగులగొట్టాడు. ఈ ఘటన సంగారెడ్డి జిల్లాలోని న్యాల్కల్లో చోటు చేసుకుంది. దీనిపై సోనూసూద్ తనదైన స్టైల్లో స్పందించారు.
న్యాల్కల్ గ్రామానికి చెందిన ఓ ఏడేళ్ల బాలుడు.. టీవీలో దూకుడు సినిమా చూస్తున్నాడు. ఈ సినిమాలో హీరో.. విలన్ సోనూసూద్తో ఫైట్ చేస్తూ కొడుతాడు. ఈ ఫైట్ ఆ బాలుడికి కోపం తెప్పించింది. కరోనా కాలంలో ఎంతో మంది ప్రాణాలను కాపాడిన సోనూసూద్ సార్ను విలన్గా ఎందుకు చూపిస్తున్నారని ఆవేదన వ్యక్తం చేశాడు. ఆ ఫైట్ను తట్టుకోలేని ఆ బుడ్డోడు ఏకంగా టీవీని రాయితో పగులగొట్టాడు.
ఈ ఘటనను హరీష్ అనే నెటిజన్ సోనూసూద్ దృష్టికి తీసుకెళ్లాడు. దీనిపై సోనూసూద్ తనదైన శైలిలో స్పందించారు. ‘అరేయ్.. మీ టీవీ పగలగొట్టకు.. మళ్లీ మీ నాన్న నన్ను కొత్త టీవీ కొనాలని అడుగుతాడు’ అంటూ సోనూసూద్ చమత్కారంగా ట్వీట్ చేశాడు.