Fourth City | ఫోర్త్‌ సిటీ.. ‘ఫ్యూచర్‌’ ట్రేడింగ్‌..! సూట్‌కేస్‌ కంపెనీల పేరిట నాల్గో నగరంలో భూముల చెర..!!

Fourth City | అవి మారుమూలన రాళ్లు, గుట్టలు, ఏనెలతో నిండిన భూములు.. తొండలు కూడా గుడ్లుపెట్టని నేలలు.. అందుకే దశాబ్దాల కిందట ప్రభుత్వాలు ఆ భూములను భూమిలేని నిరుపేదలకు సాగు చేసుకునేందుకు ఇచ్చాయి. దశాబ్దాలుగా ఆ రైతులు తమ కండల్ని కరిగించి, వాటిని చదును చేసుకుని సాగు చేసుకుంటున్నారు.

• నిబంధనలకు పాతరేసి అసైన్డ్‌, సీలింగ్‌ భూములకు ఎసరు
• పేదలే టార్గెట్‌
• ఫ్యూచర్‌ సిటీ, ట్రిపుల్‌ఆర్‌ గ్రామాల్లో బెంజ్‌ కార్ల చక్కర్లు
• 99 ఏండ్ల లీజుపై చేతులు మారుతున్న వందల ఎకరాలు
• బెదిరించి, భయపెట్టి, ఎంతోకొంత ముట్టజెప్పి ఒప్పందాలు
• తిలాపాపం తలా పిడికెడు!.. సర్వీస్‌, రిటైర్డ్‌ ఆఫీసర్లకూ భాగం
• రికార్డుల్లో పట్టాలుగా మార్చేందుకు కదులుతున్న పావులు

Fourth City | హైదరాబాద్‌ సిటీబ్యూరో ప్రధాన ప్రతినిధి, సెప్టెంబరు 24 (నమస్తే తెలంగాణ): అవి మారుమూలన రాళ్లు, గుట్టలు, ఏనెలతో నిండిన భూములు.. తొండలు కూడా గుడ్లుపెట్టని నేలలు.. అందుకే దశాబ్దాల కిందట ప్రభుత్వాలు ఆ భూములను భూమిలేని నిరుపేదలకు సాగు చేసుకునేందుకు ఇచ్చాయి. దశాబ్దాలుగా ఆ రైతులు తమ కండల్ని కరిగించి, వాటిని చదును చేసుకుని సాగు చేసుకుంటున్నారు. ఇప్పుడు ఆ భూములకు దశ తిరిగింది. పాలకులు ప్రకటిస్తున్న ఫోర్త్‌ అలియాస్‌ ఫ్యూచర్‌ సిటీలు ఆ భూముల పక్కనే వెలుస్తున్నాయి. సర్కారు పెద్దలు గీస్తున్న ట్రిపుల్‌ఆర్‌ రింగులు.. గ్రీన్‌ ఫీల్డ్‌ రోడ్లు వాటి సమీపంలో నుంచే దూసుకుపోనున్నాయి. మరి.. పడావు పడిన ఆ భూముల్లో ఇప్పుడు సిరులు పండి పేదోళ్లు పెద్దోళ్లు కావాలి. అదే జరిగితే బ్రహ్మాండం బద్దలై… భూమి-ఆకాశం ఏకమవుతుంది కదా. అందుకే ఆ విపత్తు రాకుండా పెద్దోళ్లు రంగంలోకి దిగారు.

పేదోళ్ల చేతుల్లో భూములను మాయం చేస్తున్నారు. అడ్డికి పావుసేరులా అనధికారికంగా కొనుగోలు చేస్తున్నారు. ఇలా ఒకటీ అరా కాదు సుమా! గత నాలుగైదు నెలల్లోనే వందల ఎకరాల అసైన్డ్‌, సీలింగ్‌ భూములను కొందరు పెద్దలు బినామీ పేర్లతో పాటు సూట్‌కేస్‌ కంపెనీల పేరిట చెరపడుతున్నారు. ఒకవైపు హైదరాబాద్‌లో రియల్‌ రంగం వెలవెలబోతూ, హైడ్రా బుల్డోజర్లు హడావుడి చేస్తుంటే.. మరోవైపు పాలకులు ప్రకటించిన ఫోర్త్‌ సిటీ పరిధిలో మాత్రం నిబంధనలకు పాతర వేస్తూ పేదోళ్ల భూముల్లో పెద్దలు వాలిపోతున్నారు. ఇందుకు సర్వీసులో ఉన్న వారితో పాటు పదవీ విరమణ పొందిన పలు శాఖల ఉన్నతాధికారులూ అతీతం కాకపోవటం శోచనీయం.

పేదోళ్ల భూములన్నీ పెద్దోళ్లపరం

గత 9 నెలలుగా రాష్ట్రంలో రియల్‌-నిర్మాణ రంగం కుదేలైందని సర్వేలు ఘోషిస్తున్నాయి. ట్రై సిటీల్లో ఒక్క మెగా నిర్మాణ ప్రాజెక్టు మొదలైన దాఖలాలు లేవు. ఇక్కడ రియల్‌-నిర్మాణ రంగం దివాలా తీస్తే.. ఫోర్త్‌ సిటీలో మాత్రం అనధికారిక రియల్‌ రంగం మాత్రం జోరు మీదున్నది. గత నాలుగైదు నెలలుగా గుట్టుగా సాగుతున్న ఈ భూ దందాలో పేదోళ్ల భూములన్నీ పెద్దోళ్ల పరం అవుతున్నాయి.

• ఫోర్త్‌ సిటీ పరిధిలోని తిమ్మాయిపల్లి గ్రామ పరిధిలోని సర్వే నంబరు 9లో వందల ఎకరాల్లో అసైన్డ్‌ భూములు ఉన్నాయి. వీటికి ఇప్పటికే రేటు నిర్ధారించి, అడ్వాన్స్‌ కూడా చెల్లించినట్టు తెలిసింది. ప్రభుత్వ పెద్ద ఒకరు ఇందులో కీలక పాత్ర పోషిస్తున్నారనే ప్రచారం స్థానికంగా ఉన్నది. బాండ్‌ పేపరుపై 99 ఏండ్ల లీజు ప్రాతిపదికన భూమి ఇస్తున్నట్టు అసైన్డ్‌దారుల నుంచి ఒప్పంద పత్రం రాయించుకున్నట్టు సమాచారం.
• లేమూరు గ్రామ పరిధిలో 65 ఎకరాల అసైన్డ్‌ భూములను మాజీ పోలీస్‌ ఉన్నతాధికారి ఒకరు రూ.కోటికి ఎకరం చొప్పున కొనుగోలు చేసినట్టు తెలిసింది. ఇక్కడే మరో 80 ఎకరాల వరకు అందుబాటులో ఉండటంతో బ్రోకర్లు ఎకరా కోటిన్నరకు ఇప్పించేందుకు బేరసారాలు సాగిస్తున్నారు.
• మహేశ్వరం మండలం సరస్వతిగూడ-లేమూరు దారిలో వంద ఎకరాలకు పైగా అసైన్డ్‌ భూములు చేతులు మారినట్టు తెలిసింది. ఇక్కడ ఎకరాకు రూ.40-60 లక్షలకు కొంటున్నారు.
• కందుకూరు మండలం మంఖాల్‌ పరిధిలో ఇప్పటికే 47 ఎకరాల లావణి పట్టా చేతులు మారి పట్టాగా రూపాంతరం చెందిన విషయం తెలిసిందే. వీటికి సమీపంలోనే ఉన్న మరికొన్ని అసైన్డ్‌ భూములకు కూడా కొందరు పెద్దలు అడ్వాన్స్‌ ఇచ్చినట్టు తెలిసింది.
• హర్షగూడ, సర్దార్‌నగర్‌ గ్రామాల్లో కూడా ఇప్పటికే అసైన్డ్‌ భూములు చేతులు మారాయి.
• ఫోర్త్‌ సిటీ పరిధిలోని పలు గ్రామాల్లో ప్రభుత్వ పెద్దకు చెందిన సమీప బంధువు (ఎన్నారై)కు ఏకంగా 600 ఎకరాల భూములు ఉన్నట్టు తెలుస్తున్నది. ఇందులో అసైన్డ్‌ భూములు కూడా ఉన్నాయి.

నెమ్మదిగా మారుతున్న రికార్డులు

కొందరు ప్రభుత్వ పెద్దల కనుసన్నల్లోనే అసైన్డ్‌ భూముల కొనుగోళ్ల ప్రక్రియ జోరుగా సాగుతున్నట్టు ఆరోపణలున్నాయి. తొలుత గ్రామంలోని ఒకరిద్దరు బ్రోకర్లను రంగంలోకి దింపి.. రోడ్డువైపున ఉన్న అసైన్డ్‌ భూముల వారిని మచ్చిక చేసుకుంటున్నారు. వారికి కొంత రేటు ఎక్కువ ఇచ్చి ఒప్పందం చేసుకుంటున్నారు. ఈ ప్రక్రియ ముగిసిన వెంటనే దాని వెనక భూముల వారిని బ్రోకర్లు సంప్రదిస్తున్నారు. వీరికి తక్కువ ధర చెప్తున్నారు. ఎవరైనా రైతులు ఇవ్వబోమంటే బెదిరింపులకు పాల్పడుతున్నారని రైతులు తెలిపారు. దీంతో తప్పని పరిస్థితుల్లో అమ్ముకోవాల్సి వస్తున్నదని రైతులు వాపోయారు. ఈ ప్రక్రియ 99 ఏండ్ల లీజు ఒప్పందంపై చేస్తున్నారు. అనంతరం రెవెన్యూ కార్యాలయాల్లో ఆ సర్వే నంబర్‌కు సంబంధించిన రికార్డులను మాయం చేస్తున్నట్టు సమాచారం. ఇందులో కొన్ని ఏండ్లుగా పట్టాగా నమోదు అయ్యాయని చూపి.. దాన్ని ఆసరాగా చేసుకొని ఆ భూములన్నీ పట్టాగా మార్చేందుకు పావులు కదుపుతున్నారు.

ఈ భూమాయకు సంబంధించిన వివరాలు మీ దగ్గర ఉంటే మాకు వాట్సాప్‌ చేయండి : 91827 77711