‘రెరా’లో ప్రాజెక్టుల నమోదు తప్పనిసరి

రియల్‌ ఎస్టేట్‌ రెగ్యులేటరీ అథారిటీ (రెరా) నిబంధనలను పాటించని రియల్‌ ఎస్టేట్‌ సంస్థలపై కఠిన చర్యలు తప్పవని తెలంగాణ రెరా చైర్మన్‌ డాక్టర్‌ ఎన్‌ సత్యనారాయణ హెచ్చరించారు. ఈ నిబంధనలను ఉల్లంఘించిన పలు సంస్థలకు రెరా సెక్రటరీ బాలకృష్ణ బుధవారం షోకాజ్‌ నోటీసులు జారీచేసి, 15 రోజుల్లోగా సంజాయిషీ ఇవ్వాలని ఆదేశించారు.

• లేకుంటే రియల్టర్లపై కఠిన చర్యలు
• రెరా చైర్మన్‌ సత్యనారాయణ
• పలు సంస్థలకు నోటీసులు

హైదరాబాద్‌, ఆగస్టు 23 (నమస్తే తెలంగాణ): రియల్‌ ఎస్టేట్‌ రెగ్యులేటరీ అథారిటీ (రెరా) నిబంధనలను పాటించని రియల్‌ ఎస్టేట్‌ సంస్థలపై కఠిన చర్యలు తప్పవని తెలంగాణ రెరా చైర్మన్‌ డాక్టర్‌ ఎన్‌ సత్యనారాయణ హెచ్చరించారు. ఈ నిబంధనలను ఉల్లంఘించిన పలు సంస్థలకు రెరా సెక్రటరీ బాలకృష్ణ బుధవారం షోకాజ్‌ నోటీసులు జారీచేసి, 15 రోజుల్లోగా సంజాయిషీ ఇవ్వాలని ఆదేశించారు. హెచ్‌ఎండీఏ/జీహెచ్‌ఎంసీ/యుడీఏ/స్థానిక సంస్థల అనుమతులతోపాటు టీఎస్‌ రెరా రిజిస్ట్రేషన్‌ లేకుండా రియల్‌ ఎస్టేట్‌ ప్రాజెక్టులు, ప్రీ లాంచింగ్‌, యూడీఎస్‌, ఈవోఐ తదితర కార్యక్రమాలకు పాల్పడితే కఠిన చర్యలు తప్పవని డాక్టర్‌ సత్యనారాయణ స్పష్టం చేశా రు. 500 చదరపు మీటర్ల కంటే ఎక్కువ స్థలం లో చేపట్టే నిర్మాణాలతోపాటు ఎనిమిది లేదా అంతకుమించిన ప్లాట్లు, నిర్మాణాలకు రెరా చట్టం వర్తిస్తుందని తెలిపారు. అటువంటి ప్రాజెక్టులను చేపట్టేవారంతా ఆయా సంస్థల అనుమతులు పొందిన తర్వాత విధిగా రెరాలో రిజిస్టర్‌ చేసుకోవాలని సూచించారు.

రెరా ప్రాజెక్టుల్లోనే కొనుగోలు చేయాలి

• రెరా నిబంధనల మేరకు రియల్టర్లు పారదర్శకత, జవాబుదారీతనంతో పనిచేయాలని, రియ ల్‌ ఎస్టేట్‌ ఏజెంట్లు కూడా విధిగా రెరాలో రిజిస్టర్‌ కావాలని డాక్టర్‌ సత్యనారాయణ స్పష్టం చేశారు. రెరాలో నమోదైన ప్రాజెక్టుల్లోనే ఇండ్లు, ప్లాట్లు కొనుగోలు చేయాలని కోరారు.
• రెరా నోటీసులు జారీచేసిన ప్రాజెక్టులు రెరాలో రిజిస్టర్‌ కాకుండా సంగారెడ్డి జిల్లా రామచంద్రపురం మండలంలోని ఉస్మాన్‌నగర్‌లో ‘రాధే పనోరమా’ ప్రాజెక్టును ప్రీ-లాంచింగ్‌ పేరుతో అమ్మకానికి పెట్టిన రాధే గ్రూప్‌ రియల్‌ ఎస్టేట్‌ సంస్థకు షోకాజ్‌ నోటీసు జారీచేశారు.
• ఓంశ్రీ సిగ్నెట్‌ పేరుతో చేపట్టిన ప్రాజెక్టులో ఏ, బీ, సీ, డీ బ్లాక్‌లకు మాత్రమే రెరా నుంచి రిజిస్ట్రేషన్‌ అనుమతి పొందిన ఓంశ్రీ బిల్డర్స్‌ అండ్‌ డెవలపర్స్‌ సంస్థ.. అక్రమంగా ‘ఈ’ బ్లాక్‌ నిర్మాణాన్ని చేపట్టడంతో నోటీసు జారీచేశారు.
• తకువ రేట్లకే ప్లాట్లు అంటూ హైదరాబాద్‌తోపాటు రాష్ట్రంలోని ఇతర ప్రాంతాల్లో ప్రీ-లాంచ్‌లు నిర్వహించిన భువన తేజ ఇన్‌ఫ్రా ప్రాజెక్టు యాజమాన్యానికి షోకాజ్‌ నోటీసు జారీ చేశారు.
• రెరా రిజిస్ట్రేషన్‌ ఉన్నప్పటికీ నిబంధనల ప్రకారం రిజిస్ట్రేషన్‌ నంబర్‌ను ప్రదర్శించకుండా కరపత్రాలు, బ్రోచర్లతో ప్రచార కార్యక్రమాలు చేపట్టిన టీఎంఆర్‌ నిర్మాణ సంస్థకు నోటీసు జారీచేశారు.
• రెరా రిజిస్ట్రేషన్‌ లేకుండా సంగారెడ్డి జిల్లా పటాన్‌చెరు సమీపంలోని ఎల్లాపూర్‌లో ‘లేక్‌వ్యూ’ పేరిట ప్లాట్లు విక్రయించిన సువర్ణ భూమి ఇన్‌ఫ్రా డెవలపర్స్‌కు షోకాజ్‌ నోటీసు జారీచేశారు.