DA | ఉద్యోగుల డీఏపై చేతులెత్తేసిన కేంద్రం

కేంద్ర ప్రభుత్వ వ్యతిరేక విధానాలపై రైల్వే ఉద్యోగుల సంఘం కన్నెర్ర చేసింది. పాత పెన్షన్‌ విధానం, డీఏ డిమాండ్లను కేంద్రం నెరవేర్చకపోవడంపై గుర్రుగా ఉంది.

• డిమాండ్లు నెరవేర్చాలని రైల్వే ఎంప్లాయీస్‌ ఆందోళనబాట
• 12న డిపోలు, స్టేషన్లలో భారీ ధర్నాలు
• ఎస్‌సీఆర్‌ మజ్దూర్‌ నేత శంకర్‌రావు పిలుపు

DA | హైదరాబాద్‌, ఆగస్టు 8 (నమస్తే తెలంగాణ): కేంద్ర ప్రభుత్వ వ్యతిరేక విధానాలపై రైల్వే ఉద్యోగుల సంఘం కన్నెర్ర చేసింది. పాత పెన్షన్‌ విధానం, డీఏ డిమాండ్లను కేంద్రం నెరవేర్చకపోవడంపై గుర్రుగా ఉంది. కేంద్రం తీరుకు నిరసనగా 12న రైల్వే డిపోలు, రైల్వే స్టేషన్ల వద్ద ధర్నాలు, నిరసనలు నిర్వహిస్తామని ఎస్సీఆర్‌ఎంయూ జనరల్‌ సెక్రటరీ శంకర్‌రావు ప్రకటించారు. ఈ కార్యక్రమానికి కార్మికులు, ఉద్యోగులు భారీగా హాజరై విజయవంతం చేయాలని పిలుపునిచ్చారు.

కేంద్ర ఆర్థిక శాఖ మంత్రి తిరస్కరించిన ఉద్యోగుల డిమాండ్లు ఇవే..

• ఉద్యోగులు, పెన్షనర్లకు కొవిడ్‌ సమయంలో నిలిపివేసిన 18 నెలల డీఏ /డీఆర్‌ బకాయిల విడుదలకు నిరాకరణ
• 8వ కేంద్ర పే కమిషన్‌ ఏర్పాటు చేసే ఆలోచన లేదని ప్రకటన
• పాతపెన్షన్‌ విధానాన్ని పునరుద్ధరించకపోవడం
• ఎన్‌సీ/జేసీఎమ్‌ చర్చల పేరుతో ఒపీఎస్‌లోని 50 శాతం పెన్షన్‌ + డీపీ ఇవ్వాలని ఎన్‌సీ/జేసీఎంల డిమాండ్లకు ఆమోదం తెలపడంలో కాలాయాపన
• సీనియర్‌ సిటిజన్‌ రాయితీ పునరుద్ధరణ తిరస్కరణ
• ప్రతి ఐదేండ్లకు 5 శాతం పెన్షన్‌ పెంచడం, ఫిక్స్‌డ్‌ మెడికల్‌ అలవెన్సు (ఎఫ్‌ఎంఎ)ని రూ.1000 నుంచి 3000కి పెంచడానికి పార్లమెంటరీ స్టాండింగ్‌ కమిటీ చేసిన సిఫార్సులను కూడా తిరస్కరించడం.
• 5వ వేతన సంఘం సిఫార్సులు, అనేక కోర్టు తీర్పులు ఉన్నప్పటికీ కమ్యూటేషన్‌ పెన్షన్‌ వ్యవధిని 15 ఏండ్ల నుంచి 12 ఏండ్లకు తగ్గించడానికి ఒప్పుకోకపోవడం, అందరికీ నోషనల్‌ ఇంక్రిమెంట్లు ఇవ్వడాన్ని గతంలో నిలిపివేసి, తిరిగి దాని అమలుకు నిరాకరించింది.