CP Tarun Joshi | హైదరాబాద్ సిటీబ్యూరో, ఏప్రిల్ 6 (నమస్తే తెలంగాణ): రంగారెడ్డి జిల్లా తుక్కుగూడలో కాంగ్రెస్ పార్టీ నిర్వహించిన జనజాతర సభావేదిక సమీపంలో హంగామా చేసిన డిప్యూటీ సీఎం భట్టి విక్రమార్క కారు డ్రైవర్పై పోలీసులు చేయిచేసుకున్నారు. ఈ విషయం సోషల్ మీడియాలో వైరల్ అయింది. పోలీసుల కథనం ప్రకారం.. శనివారం తుక్కుగూడలో కాంగ్రెస్ జనజాతర సభకు సీఎం కాన్వాయ్తోపాటు డిప్యూటీ సీఎం కాన్వాయ్ ముందుకు వస్తున్నది.
ఈ దశలో డిప్యూటీ సీఎం కాన్వాయ్కు చెందిన ఓ కారు డ్రైవరును పోలీసులు ఆపారు. దాంతో డ్రైవర్ పాస్ చూపించగా, నిర్ధారించిన పార్కింగ్ వైపు వెళ్లాలని పోలీసులు సూచించారు. తన కారును పార్కింగ్ వీవీఐపీ వద్దకు వెళ్లేందుకు అనుమతించాలని డ్రైవర్ వాదించాడు. అక్కడే ఉన్న రాచకొండ సీపీ తరుణ్ జోషి ఇతరులకు ఇబ్బంది కలిగిస్తున్నావంటూ డ్రైవర్పై ఆగ్రహం వ్యక్తం చేసుకోగా, అక్కడున్న పోలీసులు అతడిపై చేయిచేసుకున్నారు. ఈ ఘటన వీడియోలు ‘డిప్యూటీ సీఎం డ్రైవర్పై రాచకొండ సీపీ చేయి చేసుకున్నాడు’ అంటూ సోషల్ మీడియాలో వైరల్ అయ్యాయి.