ఎన్‌ఐవోఎస్‌ డీఎడ్‌ అభ్యర్థులకు టీచర్‌ ఉద్యోగాలు ఇవ్వండి

రాష్ట్రంలో డీఎస్సీ-2024 నియామకాలపై సుప్రీంకోర్టు బుధవారం కీలక తీర్పు వెలువరించింది. నేషనల్‌ ఇన్‌స్టిట్యూట్‌ ఆఫ్‌ ఓపెన్‌ స్కూలింగ్‌ (ఎన్‌ఐవోఎస్‌) డీఎడ్‌ కోర్సు పూర్తిచేసిన 11 మందికి టీచర్‌ ఉద్యోగాలు ఇవ్వాలని రాష్ట్ర ప్రభుత్వాన్ని ఆదేశించింది.

• డీఎస్సీ-2024 నియామకాలపై సుప్రీంకోర్టు కీలక తీర్పు
• ఇన్‌ సర్వీస్‌ టీచర్లకు ఎలాంటి ఇబ్బందులు కలుగరాదని స్పష్టీకరణ
• ఇంకా తేలని క్రీడల కోటా ఉపాధ్యాయుల నియామకాలు

హైదరాబాద్‌, మార్చి 25 (నమస్తే తెలంగాణ): రాష్ట్రంలో డీఎస్సీ-2024 నియామకాలపై సుప్రీంకోర్టు బుధవారం కీలక తీర్పు వెలువరించింది. నేషనల్‌ ఇన్‌స్టిట్యూట్‌ ఆఫ్‌ ఓపెన్‌ స్కూలింగ్‌ (ఎన్‌ఐవోఎస్‌) డీఎడ్‌ కోర్సు పూర్తిచేసిన 11 మందికి టీచర్‌ ఉద్యోగాలు ఇవ్వాలని రాష్ట్ర ప్రభుత్వాన్ని ఆదేశించింది. ఈ ప్రక్రియలో ఇన్‌ సర్వీస్‌ టీచర్లకు ఇబ్బందులు కలగకుండా చూడాలని స్పష్టం చేస్తూ.. తదుపరి విచారణను ఏప్రిల్‌ 10కి వాయిదా వేసింది. అయితే ఇప్పటికే సర్వీస్‌లో ఉన్న 11 మంది టీచర్లకు సంబంధిత జిల్లాల డీఈవోలు షోకాజ్‌ నోటీసులు జారీచేశారు. మిమ్మల్ని ఎందుకు టెర్మినేట్‌ చేయకూడదో 3 రోజుల్లోగా సమాధానమివ్వాలని ఆ నోటీసుల్లో పేర్కొన్నారు. సుప్రీంకోర్టు తాజా తీర్పుతో ఇప్పటికే ఉద్యోగాలు పొందిన వారికి ఊరట లభించనున్నది.

తప్పుల మీద తప్పులు
డీఎస్సీ-2024 కొలువుల భర్తీలో అధికారులు ఇష్టారాజ్యంగా వ్యవహరించి, తప్పుల మీద తప్పులు చేశారు. దీంతో ఆ నియామకాలపై రోజుకో వివాదం తలెత్తుతున్నది. ఈ వ్యవహారంలో ప్రభుత్వ తప్పిదం కూడా ఉన్నట్టు స్పష్టమవుతున్నది. 2024 సెప్టెంబర్‌ 30న డీఎస్సీ ఫలితాలను వెలువరించిన ప్రభుత్వం.. ఆ అభ్యర్థులకు అక్టోబర్‌ 9న నియామక పత్రాలు ఇచ్చింది. లెక్క ప్రకారం 15 రోజులు నిర్వహించాల్సిన సర్టిఫికెట్ల వెరిఫికేషన్‌ ప్రక్రియను హడావుడిగా 5 రోజుల్లోనే పూర్తిచేసింది. దీంతో తప్పులు జరిగాయని అభ్యర్థులు ఆరోపిస్తున్నారు.

ఇవీ వివాదాలు..

• నిజామాబాద్‌ జిల్లాలో ఓ అభ్యర్థికి టీచర్‌ కొలువు ఇచ్చినట్టే ఇచ్చి నెల రోజుల తర్వాత ఉద్యోగం నుంచి (టెర్మినేట్‌) తొలగించారు. 25 రోజులపాటు విధులు నిర్వహించిన తర్వాత ఆ టీచర్‌ను ఉద్యోగం నుంచి తొలగించడం అప్పట్లో వివాదాస్పదమైంది.
• ఖమ్మం జిల్లాలో ఏడుగురు హిందీ పండిట్ల కు టీచర్‌ ఉద్యోగాలిచ్చి 22 రోజుల తర్వాత తొలగించారు. ఆదిలాబాద్‌లో ఓ టీచర్‌ను ఇలాగే టెర్మినేట్‌ చేశారు. వరంగల్‌ జిల్లాలో ఓ టీచర్‌ను ఉద్యోగం నుంచి తీసేశారు.
• స్పోర్ట్స్‌ కోటా ఉద్యోగాల కోసం కొందరు అభ్యర్థులు బోగస్‌ సర్టిఫికెట్లు సమర్పించిన ట్టు ఫిర్యాదులొచ్చాయి. దీంతో ఈ కోటాలో ఉద్యోగాలు పొందిన 33 మందితోపాటు స ర్టిఫికెట్ల వెరిఫికేషన్‌కు హాజరైన 393 మంది అభ్యర్థుల సర్టిఫికెట్లను మూడుసార్లు పరిశీలించారు. ఉద్యోగాల భర్తీ కొలిక్కి రాకపోవడంతో ఇదో స్కామ్‌ అని ఆరోపణలున్నాయి.
• హైదరాబాద్‌ జిల్లాలో బోగస్‌ సర్టిఫికెట్ల విషయంపై అనేక ఫిర్యాదులు రావడంతో 32 మంది అభ్యర్థుల నియామకాలను పక్కనపెట్టారు. వారికి బోనాఫైడ్‌ సర్టిఫికెట్లు ఉన్నా అడ్మిషన్‌ రిజిస్టర్లలో పేర్లు లేకపోవడం, కుల ధ్రువీకరణ పత్రాలపై అనుమానాలు తలెత్తడంతో విచారణ జరిపించారు.
• బీకాంలో బిజినెస్‌ ఎకనామిక్స్‌ సబ్జెక్టు ఉన్నవారికి ఉద్యోగాలు ఇవ్వడం నిబంధనలకు విరుద్ధమని అప్పట్లో అభ్యర్థులు ఆరోపించారు. వాస్తవానికి ఎకనామిక్స్‌, బిజినెస్‌ ఎకనామిక్స్‌ వేర్వేరు సబ్జెక్టులని స్పష్టం చేశారు.