ఇంటిభద్రత మన చేతుల్లోనే..

• చిన్నపాటి జాగ్రత్తలతో రక్షణ
• పండుగలకు ఊరెళ్తే పోలీసులకు చెప్పండి
• చోరీల నివారణకు పోలీసుల సూచనలు

హైదరాబాద్‌, అక్టోబర్‌ 11 (నమస్తే తెలంగాణ): దసరా పండుగను సొంత ఊరిలో చేసుకొనేందుకు పట్టణాల నుంచి ప్రజలు పెద్ద సంఖ్యలో పల్లెలకు వెళ్తున్నారు. ఇదే అదనుగా దొంగల ముఠాలు రెచ్చిపోయే ప్రమాదం ఉన్నది. పోలీసులు గస్తీ ఎంత పెంచినా మన ఇంటి భద్రతకు మనమూ కొన్ని జాగ్రత్తలు తీసుకుంటే మంచిది. చిన్నపాటి జాగ్రత్తలతో దొంగల బెడదకు చెక్‌ పెట్టొచ్చు అంటున్నారు పోలీసులు.

ఈ జాగ్రత్తలు తీసుకోండి

• దొంగల దృష్టి ప్రధానంగా బంగారు, వెండి ఆభరణాలు, డబ్బులు దాచే బీరువాలు, లాకర్లపైనే ఉంటుంది. ఊరు వెళ్లాల్సి వస్తే విలువైన వస్తువులు, డబ్బు బ్యాంకు లాకర్లలో లేదంటే ఇంట్లోని రహస్య ప్రదేశాల్లో దాచుకోవాలి.
• ఇంటికి సెంట్రల్‌లాక్‌ సిస్టమ్‌ ఉన్న తాళం అమర్చుకోవడం ఉత్తమం.
• ఊరికి వెళ్లాల్సి వస్తే తప్పకుండా స్థానిక పోలీస్‌స్టేషన్‌లో సమాచారం ఇవ్వాలి. అప్పుడు పోలీసులు ఆ ప్రాంతాల్లో గస్తీ పెంచేందుకు అవకాశం ఉంటుంది.
• ఫేస్‌బుక్‌, ఇన్‌స్టాగ్రాం, ట్విట్టర్‌, వాట్సాప్‌ వంటి సోషల్‌ మీడియాలో మీరు ఊరు వెళ్తున్న విషయం, ట్రిప్‌ వివరాలు షేర్‌ చేయవద్దు.
• ద్విచక్రవాహనాలుంటే ఇంటి ఆవరణ లోపలే పెట్టి తాళాలు వేయాలి.
• నమ్మకమైన వ్యక్తులను మాత్రమే సెక్యూరిటీ గార్డులుగా నియమించుకోవాలి.
• ఇంటి చుట్టూ సీసీటీవీ కెమెరాలు ఏర్పాటు చేసుకోవడం ఉత్తమం. ఈ కెమెరాలను ఆన్‌లైన్‌ ద్వారా లింక్‌ చేసుకుంటే లైవ్‌లో కెమెరాను చూసుకొనే అవకాశం ఉంటుంది.
• మీరు ఊరెళ్లేముందే న్యూస్‌పేపర్లు, పాల ప్యాకెట్లు వేయవద్దని సదరు వ్యక్తులకు చెప్పండి. ఇంటిముందు అవి జమైతే దొంగలు వాటిని గమనించి చోరీకి వచ్చే ప్రమాదం ఉన్నది.
• మెయిన్‌డోర్‌కు తాళం వేసినప్పటికీ అది కనిపించకుండా కర్టెన్స్‌తో కవర్‌ చేయాలి.
• బయటకు వెళ్లినప్పుడు ఇంటిలోపల, బయట లైట్లు వేసి ఉంచడమే మంచిది. తగినంత వెలుతురు ఉంటే దొంగలు లోనికి వచ్చేందుకు జంకుతారు.
• మీ ఇంటి పొరుగున నమ్మకంగా ఉండేవారిని మీ ఇంటివైపు అప్పుడప్పుడు గమనించమని చెప్పండి.
• కప్‌బోర్డు, బీరువా తాళాలు రహస్య ప్రదేశాల్లో పెట్టుకోండి. కామన్‌ ఏరియాల్లో తాళంచేతులు ఎట్టిపరిస్థితుల్లో పెట్టవద్దు.