మునుగోడుకు జమున హ్యాచరీస్‌ మనీ

మునుగోడు ఉపఎన్నికలో బీజేపీ అభ్యర్థికోసం భారీఎత్తున తరలిస్తున్న డబ్బు ఆదివారం రాత్రి పోలీసు తనిఖీలలో పట్టుబడింది. బీజేపీ ఎమ్మెల్యే ఈట ల రాజేందర్‌కు చెందిన జమునా హ్యాచరీస్‌ నుంచి సుమారు రూ.90 లక్షలను తరలిస్తున్న ట్టు వెల్లడయ్యింది.

• 90 లక్షలు వయా త్రిపుర కన్‌స్ట్రక్షన్‌!
• ఈటల అనుచరుడి డ్రైవర్‌ అరెస్టు
• పోలీసుల తనిఖీలలో బయటపడ్డ రూ. 89.92 లక్షల నగదు

హైదరాబాద్‌ సిటీబ్యూరో, అక్టోబర్‌ 31 (నమస్తే తెలంగాణ)/బంజారాహిల్స్‌: మునుగోడు ఉపఎన్నికలో బీజేపీ అభ్యర్థికోసం భారీఎత్తున తరలిస్తున్న డబ్బు ఆదివారం రాత్రి పోలీసు తనిఖీలలో పట్టుబడింది. బీజేపీ ఎమ్మెల్యే ఈట ల రాజేందర్‌కు చెందిన జమునా హ్యాచరీస్‌ నుంచి సుమారు రూ.90 లక్షలను తరలిస్తున్న ట్టు వెల్లడయ్యింది. పోలీసుల కథనం ప్రకారం.. శామీర్‌పేట సమీపంలోని పూడూరులో ఉంటు న్న కడారి శ్రీనివాస్‌ (28) మూడేండ్లుగా హుజూరాబాద్‌ ఎమ్మెల్యే ఈటల రాజేందర్‌ వ్యక్తిగత సహాయకుడు జనార్దన్‌ వద్ద కారు డ్రైవర్‌గా పనిచేస్తున్నాడు. జమునా హ్యాచరీస్‌ వ్యవహారాలను జనార్దన్‌ చూస్తుంటాడు. త్రిపుర కన్‌స్ట్రక్షన్‌ సంస్థ కార్యాలయానికి వెళ్తే, కొంత డబ్బు ఇస్తారని, దానిని తీసుకొని మునుగోడు వెళ్లాల్సి ఉంటుందని డ్రైవర్‌ శ్రీనివాస్‌కు జనార్దన్‌ సూచించాడు. ఇందులో భాగంగా శ్రీనివాస్‌ ఆదివారం రాత్రి జూబ్లీహిల్స్‌ రోడ్‌ నెం.82 లోని త్రిపుర కన్‌స్ట్రక్షన్స్‌ సంస్థ కార్యాలయానికి వెళ్లాడు.

అక్కడ కన్‌స్ట్రక్షన్‌కు చెందిన నాగరాజు అనే వ్యక్తి నుంచి రూ.89,92,000 నగదు బ్యాగ్‌ తీసుకున్నాడు. అక్కడినుంచి మహేంద్ర థార్‌ కారు (టీఎస్‌ 27 డీ 7777)లో బయలుదేరాడు. భారతీయ విద్యాభవన్‌ సమీపంలో వెస్ట్‌జోన్‌ టాస్క్‌ఫోర్స్‌ పోలీసులు థార్‌ కారులో తనిఖీలు చేయగా నోట్ల కట్టల బ్యాగ్‌ బయటడింది. ఈ నగదుకు సంబంధించిన పత్రాలు చూపించకపోవడంతో, నగదుతో పాటు శ్రీనివాస్‌ను అదుపులోకి తీసుకొని తదుపరి విచారణ కోసం జూబ్లీహిల్స్‌ పోలీసులకు అప్పగించారు. శ్రీనివాస్‌ను విచారించగా ఈ నగదును ఎమ్మెల్యే ఈటల రాజేందర్‌ వద్ద పీఏగా పనిచేస్తున్న జనార్దన్‌ సూచనల మేరకు తరలిస్తున్నానని, మునుగోడు ఎన్నికల్లో బీజేపీ అభ్యర్థికి అందజేయాల్సి ఉన్నదని వెల్లడించాడు. ఈ మేరకు నిందితులపై కేసు నమోదు చేసి దర్యాప్తు చేపట్టారు.

హైదరాబాద్‌ నుంచి నోట్ల కట్టల ప్రవాహం
మునుగోడుతో పాటు హైదరాబాద్‌లో పోలీసుల తనిఖీలలో బీజేపీ నోట్ల కట్టల పాములు బయటపడుతున్నాయి. మునుగోడు ఉప ఎన్నికల నోటిఫికేషన్‌ వచ్చినప్పటి నుంచి హైదరాబాద్‌లో హవాలా ద్వారా నగదు తరలిస్తున్న పలు ముఠాలు బయటపడ్డాయి. పోలీసుల విచారణలో ఈ హవాలా గమ్యం మునుగోడు బీజేపీ అభ్యర్థేనని తేలింది. నెలరోజులుగా పెద్దఎత్తున డబ్బు పట్టుబడ్డ ఘటనలు…

• మాసబ్‌ట్యాంక్‌ వద్ద షోహెబ్‌ మాలిక్‌ అనే తుక్కు వ్యాపారి వద్ద నుంచి రూ.1.24 కోట్లు టాస్క్‌ఫోర్స్‌ పోలీసులు సీజ్‌ చేశారు.
• బంజారాహిల్స్‌లో కార్తీక్‌గౌడ్‌ అనే వ్యక్తి నుంచి రూ.50 లక్షలు పట్టుకున్నారు, ఆ తరువాత రెండు రోజుల్లో రూ.25 లక్షలు చాదర్‌ఘాట్‌లో పట్టుబడ్డాయి.
• శ్రీకాకుళం జిల్లా రాజం మండలానికి చెందిన బచ్చు రాము ఢిల్లీలో పనిచేసే తన సహోద్యోగి సత్యనారాయణ సూచనలతో జూబ్లీహిల్స్‌ రోడ్డు నెం.76లో ఒక గుర్తుతెలియని వ్యక్తి నుంచి రూ.2.5 కోట్ల నగదు అందుకున్నాడు. ఆ డబ్బును బేగంబజార్‌, కోల్సావాడీలో ఉండే గుజరాత్‌కు చెందిన హవాలా వ్యాపారి, బీజేపీ నాయకుడు లలిత్‌ వద్దకు తరలిస్తుండగా టాస్క్‌ఫోర్స్‌ పోలీసులకు అడ్డంగా దొరికిపోయాడు.
• హిమాయత్‌నగర్‌లో ఉండే వెంకటేశ్వర్‌రావు వద్ద రూ.3.5 కోట్లు తీసుకొని, వాటిని హయత్‌నగర్‌లోని అంబికా పెట్రోల్‌ యజమాని మహేందర్‌కు ఇచ్చేందుకు వెళ్తున్న సాయికుమార్‌రెడ్డి, గుండె మహేశ్‌, సందీప్‌కుమార్‌, మహేందర్‌, అనూష్‌రెడ్డి, భరత్‌ మారియెట్‌ హోటల్‌ వద్ద పట్టుబడ్డారు. ఈ సొమ్మును హయత్‌నగర్‌లో పెట్రోల్‌ బంక్‌కు పంపి, అక్కడి నుంచి చిన్నచిన్న మొత్తాలలో మునుగోడుకు తరలించే ప్లాన్‌ చేశారు.
• నార్సింగి పోలీస్‌స్టేషన్‌ పరిధిలో పోలీసులు నిర్వహించిన తనిఖీల్లో రెండు కార్లు, ఒక ద్విచక్ర వాహనంలో తరలిస్తున్న రూ.కోటి నగదును స్వాధీనం చేసుకున్నారు. ఈ నగదును మునుగోడులో పోటీచేస్తున్న బీజేపీ అభ్యర్థి కోసం తరలిస్తున్నట్టు పోలీసు విచారణలో తేలింది.
• గౌలిగూడకు చెందిన కాంతిలాట్‌ ట్రూప్‌ బజార్‌లోని రంజా మార్కెట్‌ గోడౌన్‌లో కిశోర్‌సింగ్‌, పెప్‌సింగ్‌, మహ్మద్‌ ఫరీద్‌, సందీప్‌సింగ్‌ రూ.63.5 లక్షలు తరలించేందుకు ప్రయత్నిస్తుండగా టాస్క్‌ఫోర్స్‌ పోలీసులు పట్టుకున్నారు.