తక్కువ ఈవెంట్లతో పీఈసెట్‌

బీపీఈడీ, యూజీ డీపీఈడీ కోర్సుల్లో ప్రవేశాలకు నిర్వహించే ఫిజికల్‌ ఎడ్యుకేషన్‌ ఎంట్రెన్స్‌ టెస్ట్‌ (పీఈసెట్‌)లో పలు సంస్కరణలు చేయాలని నిపుణుల కమిటీ సూచించింది.

• లాంగ్‌, హైజంప్‌, 1500 పరుగు వద్దు
• జాతీయ, అంతర్జాతీయ పోటీల్లో పాల్గొన్నవారికి ప్రత్యేకంగా మార్కులు కేటాయించాలి
• సిఫారసులు చేసిన నిపుణుల కమిటీ

హైదరాబాద్‌, డిసెంబర్‌ 17 (నమస్తే తెలంగాణ): బీపీఈడీ, యూజీ డీపీఈడీ కోర్సుల్లో ప్రవేశాలకు నిర్వహించే ఫిజికల్‌ ఎడ్యుకేషన్‌ ఎంట్రెన్స్‌ టెస్ట్‌ (పీఈసెట్‌)లో పలు సంస్కరణలు చేయాలని నిపుణుల కమిటీ సూచించింది. దీంట్లోభాగంగా నిర్వహించే ఫిజికల్‌ ఎఫిషియన్సీ టెస్ట్‌లో ఈవెంట్స్‌ను తగ్గించాలని ఈ కమిటీ సిఫారసు చేసింది. వచ్చే విద్యాసంవత్సరం నుంచి పీఈసెట్‌ను తక్కువ ఈవెంట్స్‌తో నిర్వహించాలని, అభ్యర్థులకు ఇబ్బందిగా ఉన్న వాటిని రద్దు చేయాలని సూచించింది. బీపీఈడీ, యూజీ డీపీఈడీ కోర్సుల్లో ప్రవేశాలను 2004లో ఇచ్చిన జీవో-168 ప్రకారం చేపడుతున్నారు. అయితే ఈ మార్గదర్శకాలపై అభ్యంతరాలు వ్యక్తం అవుతున్నాయి. ఈ మేరకు ఎంట్రెన్స్‌ టెస్ట్‌ నిర్వహణలో మార్పులు చేసేందుకు, అధ్యయనానికి తెలంగాణ ఉన్నత విద్యామండలి ఓ కమిటీని నియమించింది. పాలమూరు వర్సిటీ వీసీ ప్రొఫెసర్‌ లక్ష్మీకాంత్‌ రాథోడ్‌, ప్రొఫెసర్‌ రమేశ్‌బాబు, ప్రొఫెసర్‌ రాజేశ్‌ ఈ కమిటీలో సభ్యులుగా ఉన్నారు. ఇటీవలి కాలంలో ఈ రెండు కోర్సులకు పెద్దగా డిమాండ్‌ ఉండటం లేదు. మొత్తంగా 2 వేల సీట్లుంటే, 700 సీట్లు కూడా భర్తీ కావడంలేదు. ఈ నేపథ్యంలో ఈ సీట్లకు డిమాండ్‌ పెంచడం, ప్రవేశ పరీక్షను సులభంగా నిర్వహించడంపై ఈ కమిటీ ఇటీవలే కసరత్తు చేసింది. ఇటీవలే సమావేశమైన ఈ కమిటీ పలు సూచనలు, సిఫారసులను సూచించింది. ఆయా సిఫారసులను ప్రభుత్వం ముందు ఉంచనున్నారు.

సిఫారసులివే..

• ఫిజికల్‌ ఎఫిషియన్సీ టెస్ట్‌ ఈవెంట్స్‌లో మూడింటిని రద్దు చేయాలి. లాంగ్‌జంప్‌, హైజంప్‌, 1500 మీటర్ల పరుగులను ఎంట్రెన్స్‌ టెస్ట్‌ నుంచి మినహాయించాలి. కేవలం 100 మీటర్ల పరుగు, పురుషులకు 800, మహిళలకు 400 రన్‌, షాట్‌పుట్‌ తప్పనిసరి.
• నేషనల్‌, ఇంటర్నేషనల్‌ గేమ్స్‌లో పాల్గొన్నవారికి 100 మార్కులకు సర్టిఫికెట్స్‌ ఆధారంగా మార్కులు కేటాయిస్తారు. ఇదివరకు ఈ విధానం లేదు. దీన్ని కొత్తగా సిఫారసు చేశారు.
• జాతీయంగా గ్వాలియర్‌లో ఈ కోర్సుల్లో ప్రవేశాలకు రాత పరీక్షను నిర్వహిస్తున్నారు. అయితే అక్కడ ఫిజికల్‌ ఎఫిషియన్సీ టెస్ట్‌లను సైతం నిర్వహిస్తున్నారు. తెలంగాణలో ఈ ఏడాది ఫిజికల్‌ టెస్ట్‌లను నిర్వహించాలి. వచ్చే ఏడాది రాత పరీక్షను నిర్వహించడం ఉత్తమమని కమిటీ సూచించింది.
• ఏటా పీఈసెట్‌ అడ్మిషన్లు ఆలస్యంగా నవంబర్‌లో నిర్వహిస్తున్నారు. దీంతో విద్యార్థులంతా మిగతా కోర్సుల్లో చేరుతున్నారు. అప్పటికే మరో కోర్సు లో అడ్మిషన్లు పొందడంతో విద్యార్థులు మళ్లీ బీపీఈడీ, యూజీడీపీఈడీ కోర్సుల వైపు రావడంలేదు. ఈ నేపథ్యంలో ఇక నుంచి జూన్‌, జూలై మాసాల్లోనే అడ్మిషన్లు కల్పించాలి.